काठमाडौं- कोभिड–१९ महामारीका बेला नेपालको पर्यटन पुनरुत्थानका लागि सार्वजनिक-निजी साझेदारीको अवधारणामा पर्यटन पुनरुत्थान टास्कफोर्स नेपाल गठन भएको छ।
विश्व पर्यटन दिवसका अवसरमा काठमाडौंमा आयोजित एक कार्यक्रमका बीच संस्कृति, पर्यटन तथानागरिक उड्डयन मन्त्री योगेश भट्टराईले पर्यटन पुनरुत्थानका लागि भएको कार्यदलको पहलको प्रशंसा गर्दै कार्यदलको औषचारिक घोषणा गरेका हुन्। सबै सरोकारवालाहरु एक भएर लागे मात्रै पर्यटन पुनरुत्थान छिटो हुन सक्ने भन्दै सबैलाई पर्यटनका लागि सँगसँगै हुन अनुरोध उनले गरेका थिए।
नेपाल पर्यटन बोर्डका पूर्व कार्यकारी प्रमुख तथा विश्वव्यापी रुपमा पर्यटन पुनरुत्थानका लागि शुरु भएको अभियान रिब्यूल्डिंग ट्राभलका कार्यदल सदस्यसमेत रहेका दीपकराज जोशी यो अभियानको संयोजकका रुपमा रहने छन्।
पाटा नेपाल च्याप्टर र स्कल नेपालबाट अघि बढाइएको यो पहलमा पर्यटन क्षेत्रका विशिष्ट व्यक्तित्वहरु सल्लाहकार, मुख्य छाता संगठनहरु संस्थागत संरक्षक, स्वास्थ्य तथा सुरक्षा निकायका संस्थाहरु स्वास्थ्य तथा सुरक्षा संरक्षक, नेपाल पर्यटन बोर्ड, संरक्षक छन्।
पाटा नेपाल च्याप्टरका सचिव खेमलकाई कार्यदलको प्रवक्ता छन् भने पाटा नेपाल च्याप्टरका सिइओ सुरेशसिंह बुडालले कार्यदलको सचिवालय व्यवस्थापन गर्ने बताइएको छ।
कार्यक्रममा,पर्यटन सचिवश्री केदारबहादुर अधिकारीले पर्यटन पुनरुत्थान कार्यदलद्वारा ग्रामिण गन्तव्य सशक्तीकरण अभियान को तालिम निर्देशिकाको उद्घाटन गरेका थिए।
उचित, उत्तरदायी, सुधारोन्मुख तथा रचनात्मक रुपमा पर्यटन क्षेत्रका नेतृत्वदायी भूमिकामा रहेका निर्णयकर्ता तथा नीतिनिर्माता माझ पर्यटनबारे बुझाई बढाउन, मुख्य सरोकारवाला निकायहरु बीच परिणाम मुखी समन्वय स्थापना गराउन, र देशका पर्यटन क्षेत्रका सरोकारवाला तथा स्रोत बजारका टुर अपरेटर्स र संभावित पर्यटकहरुबीच संचार गर्ने कार्यमा केन्द्रित रहने गरी कार्यदलले कार्यक्रम तथा गतिविधि गर्ने उद्देश्य लिएको छ।
कोभिड–१९ महामारीले अर्थतन्त्रमा पनि ठूलो चुनौती थपेको संकटको घडीमा सुुरक्षाका मापदण्ड अपनाउँदै पर्यटनका गतिविधि सुचारु हुँदा रोजगार र व्यवसाय पुनः सुरु गर्न र पर्यटन पुनरुत्थान हुन जाने कार्यदलको धारणा छ।
केही दिनभित्रै पर्यटन पुनःसंचालनका लागि पर्यटन क्षेत्रको तैयारीका सन्दर्भमा सर्भेक्षण गर्ने, सुरक्षा मापदन्ड सम्बन्धी सूचना तथा जनचेतनाका सचित्र सामग्री तयार पार्ने, विदेशका अन्य गन्तव्यहरुमा भएका अभ्यासबारे सूचना संकलन गर्ने, आन्तरिक पर्यटन बजार विस्तार गर्ने वातावरण बनाउने कार्यहरु शुरु गरिसकेको कार्यदलले जनाएको छ।
कार्यदलले पर्यटन क्षेत्रको विस्तारमा सहयोग हुने गरी सम्वाद शृंखला सुरु गर्ने समेत तयारी गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
