काठमाडौं- स्पेनिस क्लब बार्सिलोनाका कप्तान लियोनल मेस्सीले बिहीबार क्लबबाट बिदा भएका साथी खेलाडी लुइस स्वारेजलाई भावुक सन्देश लेखेका छन्। बार्सिलोनाबाट एथ्लेटिको मड्रिड गएका स्वारेजलाई आफूले धेरै सम्झिरहने भन्दै उनले बिदाइ राम्ररी नभएको बताएका छन्।
मेस्सीले शुक्रबार इन्स्टाग्राममा स्वारेजसहितको केही तस्बिर राखेर उनले क्लबमा दिएको योगदान ठूलो रहेका बताएका छन्। ‘तिमी बार्सिलोना इतिहासमा एक महत्वपूर्ण खेलाडी हौ। तिमी जे हौ त्यसका लागि तिमी राम्रो बिदाइको हकदार हौ, न कि उनीहरुले यसरी लात हानेर निकालुन्। तर अहिले अवस्था त्यस्तै छ, मलाई केही कुराले अचम्मित बनाउन छाडिसक्यो’ मेस्सीले लेखेका छन्।
‘पहिलेदेखि सोचिरहेको त हो तर आज लकर रुममा जाँदा अनौठो महसुस भयो। तिमीसँग मैदान र मैदानबाहिर उसैगरी दिनहरु बिताउन पाइँदैन भन्ने महसुस हुँदा निकै कठिन भयो। हरेक क्षणहरु निकै याद आउने छन्। अझ अनौठो त तिमीलाई अर्को जर्सीमा देख्नु र तिमीविरुद्ध खेल्नु हुनेछ। नयाँ गन्तव्यका लागि शुभकाना। धेरै माया। छिटै भेट्नेछौँ साथी’ मेस्सीले लेखेका छन्।
बार्सिलोनामा नयाँ प्रशिक्षक रोनाल्ड कोम्यानको योजनामा नपरेको जानकारीपछि स्वारेज ला लिगामा प्रतिस्पर्धी क्लब एथ्लेटिको मड्रिड गएका हुन्। शुक्रबार क्लबले उनको बिदाइ कार्यक्रम गरेको थियो। जहाँ स्वारेज पनि आफ्नो बितेका छ वर्षलाई लिएर भावुक भएका थिए।
नयाँ सिजन सुरु हुनुअघि नै बार्सिलोना छाड्न चाहेका मेस्सीलाई क्लबले जान नदिई रोकेको थियो। पहिले सार्वजनिक रुपमा स्पष्ट आफ्ना कुराहरु नबताउने मेस्सी त्यसपछि नै क्लबबारे पनि खुलेर बोल्न थालेका हुन्। त्यही परिस्थितिसँग जोडेर उनले आफूलाई अहिले कुनै कुराले पनि अचम्मित बनाउन छाडेको बताएका हुन्।
स्वारेज सन् २०१४ मा प्रिमियर लिग क्लब लिभरपुलबाट ७४ मिलियन पाउण्डमा बार्सिलोना गएका थिए। बार्सिलोनामा स्वारेजले चार ला लिगा उपाधि, चार कोपा डेल रे, दुई सुपर कोपा, एक च्याम्पियन्स लिग, एक युइएफए सुपर कप र एक फिफा क्लब विश्वकप जितेका छन्।
मेस्सीसँग त मैदानमा मात्र होइन मैदानबाहिर समेत स्वारेजको तालमेल गजव रहिरह्यो। जसको प्रभाव मैदानमा प्रत्यक्ष देखियो। स्वारेजका ३९ गोलमा मेस्सीको पास र मेस्सीको ४७ गोलमा स्वारेजको पास पनि त्यसको प्रमाण हो। मैदानबाहिरको सम्बन्ध अझै उस्त राख्न सकिए पनि मैदानमा मेस्सीलाई स्वारेजको अभाव खड्किने नै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
