सफलतामा स्वारेज : बार्सिलोनाका उत्कृष्ट नम्बर ९

फिचर

ऋग्वेद शर्मा बिहीबार, असोज ८, २०७७ १४:२८

काठमाडौं- आर्थर मेलो, इभान राकिटिक, आर्टुरो भिडाल र नेल्सन सेमेडोपछि यो सिजन स्पेनिस क्लब बार्सिलोना छाड्ने खेलाडीमा जोडिए लुइस स्वारेज। नयाँ प्रशिक्षक रोनाल्ड कोम्यानको योजनामा नपरेका स्वारेज ला लिगामा प्रतिस्पर्धी क्लब एथ्लेटिको मड्रिड गएका छन्।

एथ्लेटिको मड्रिडले उनलाई फ्रि ट्रान्सफरमा रहेर आबद्ध गरेको हो, जहाँ विभिन्न सर्तअनुसार ६ मिलियन युरोसम्म तिर्न पर्न सक्ने क्लबले जनाएको छ। एथ्लेटिको मड्रिडका प्रशिक्षक डिएगो सिमोनसँगको सिधा कुराकानीमा स्वारेज एथ्लेटिको जाने सहमतिमा पुगेका हुन्।

स्वारेजलाई प्रतिस्पर्धी क्लब एथ्लेटिको मड्रिडमा पठाउन बार्सिलोनाले आनाकानी गरिरहे पनि अन्ततः सहमति जनाएको हो। स्वारेज एथ्लेटिकोमा आफूले बार्सिलोनामा पाइरहेको तलबमा कम गरेर जान तयार भएका हुन्। करबाहेक उनले अब वार्षिक नौ मिलियन युरो कमाउने छन्।

स्वारेज लैजानका लागि नै एथ्लेटिकोले अल्भारो मोराटालाई लोनमा इटालियन क्लब युभेन्टसमा पठाएको हो। बार्सिलोनाले स्वारेजलाई क्लबमा राख्न नचाएको भए पनि प्रतिस्पर्धी क्लबमा नजाओस् भन्ने सोचले मुस्किल बनाइरहेको थियो।

बार्सिलोना अध्यक्ष जोसेप मारिया बर्टामेउले एथ्लेटिको मड्रिड नजानेगरी स्वारेजसँग सहमति गर्न चाहिरहे पनि स्वारेजका एजेन्टसहितको बैठकमा समस्या पारेमा सार्वजनिक रुपमा मिडियामा बोल्ने भनाइपछि बार्सिलोना उनलाई एथ्लेटिको मड्रिड पठाउन तयार भएको हो। बार्सिलोनासँग सम्झौता सकिन एक वर्ष बाँकी हुँदै सम्झौता अन्त्य गर्ने सहमति भएको हो।

यो सिजन बार्सिलोनामा नयाँ प्रशिक्षकका रुपमा रहेका रोनाल्ड कोम्यानले स्वारेज आफ्नो योजनामा नरहेको सुरुदेखि बताएका थिए। जसले गएको सिजन क्लबका लागि लियोनल मेस्सीपछि सर्वाधिक गोल गरेका स्वारेज क्लब छाड्ने मनस्थितिमा पुगेका हुन्। युभेन्टस जाने हल्ला चलिरहँदा पासपोर्टका कारण त्यो सम्भव भएन, जसले उनलाई लाने इच्छा देखाइरहेको एथ्लेटिको मड्रिड नै गन्तव्य बनेको छ।

स्वारेज सन् २०१४ मा प्रिमियर लिग क्लब लिभरपुलबाट ७४ मिलियन पाउण्डमा बार्सिलोना गएका थिए। बार्सिलोनामा स्वारेजले चार ला लिगा उपाधि, चार कोपा डेल रे, दुई सुपर कोपा, एक च्याम्पियन्स लिग, एक युइएफए सुपर कप र एक फिफा क्लब विश्वकप जितेका छन्। ला लिगामा क्रिष्टियानो रोनाल्डो र मेस्सीको समयमा समेत वर्ष उत्कृष्ट खेलाडी र सर्वाधिक गोलकर्ता बनेका स्वारेज अझै केही वर्ष युरोपियन फुटबलमा नै रहन चाहन्छन्।

गएको सिजन बार्सिलोनामा स्वारेजले ३६ खेलमा २१ गोल र १२ असिस्ट गरेका थिए। समग्रमा बार्सिलोनामा २ सय ८३ खेल खेलेका स्वारेजले १ सय ९८ गोल र १ सय ९ असिस्ट गरेका छन्। गएको च्याम्पियन्स लिगमा बायर्न म्युनिकसँग ८-२ ले हार्दा गरेको एक गोल नै स्वारेजको बार्सिलोनाका लागि अन्तिम गोल बन्यो।

छाड्ने बेलाको समय सहज नदेखिए पनि बार्सिलोनामा स्वारेजले बिताएको छ वर्ष तथ्यांक र प्रस्तुति दुवैका हिसाबले राम्रो हो। स्वारेज बार्सिलोना आउने बेला मैदानमा उनको अनुशासनको व्यवहारका कारण पनि निकै प्रश्न उठिरहेको समय थियो। तर बार्सिलोना आएपछि उनको त्यो व्यवहार दोहोरिएन।

सन् २०१४ को विश्वकपको बेला उरुग्वेका स्वारेजको व्यवहारले फुटबलबाहेक उनको खराब चर्चा चल्यो। इटालीका खेलाडी जर्जियो चिलेनीलाई स्वारेजले टोकेको घटनाले विश्व फुटबल समर्थक अचम्मित थिए। तर त्यसरी स्वारेजलाई विपक्षी खेलाडीलाई टोकेको त्यो तेस्रो पटक थियो। जतिबेला उनी त्यही घटनाले चार महिनाको प्रतिबन्धमा समेत थिए।

खेलमा भइरहेको तनावग्रस्त अवस्थालाई व्यवस्थापन गर्न नसक्दा आफ्नो व्यवहार त्यस्तो भएको स्वारेजले सार्वजनिक रुपमा बताएका थिए। खेल सकिएपछि सोचेर शान्त हुन सहज हुने गरी पनि खेल चलिरहेको दौरान आफूले आफैमा नियन्त्रण गर्न नसकेको उनको भनाइ थियो। तर बार्सिलोना आएपछि उनको त्यो बानी हट्यो।

बार्सिलोनामा लियोनल मेस्सी, स्वारेज र नेमारको फरवार्ड लाइन ‘एमएसएन’ का रुपमा खुबै चर्चित रह्यो। क्लब इतिहासमा नै सबैभन्दा योजनाबद्ध फरवार्ड लाइनका रुपमा समेत चर्चा भयो। जहाँ तीन दक्षिण अमेरिकी खेलाडीको उत्कृष्ट लयमा नै बार्सिलोनाले लुइस इनिरिक प्रशिक्षक रहेको समय २०१४-१५ मा च्याम्पियन्स लिग, कोपा डेल रे र ला लिगासहित तेहोरो उपाधि जिते। जहाँ स्वारेजले च्याम्पियन्स लिग फाइनलमा युभेन्टसविरुद्धको गोलसहित २५ गोल र २४ असिस्ट गरे।

त्यसपछि २०१५-१६ को सिजन त स्वारेजले अझ उत्कृष्ट लय नै देखाए। त्यो वर्ष ५९ गोल र २२ असिस्ट गरेका स्वारेजले क्रिष्टियानो रोनाल्डो र लियोनल मेस्सी चलिरहेको फुटबल समयमा समेत युरोपियन गोल्डेन बुटमा आफ्नो नाम लेखाउन सके। जहाँ बार्सिलोनाले सुपरकोपा, क्लब विश्वकप, कोपा डेल रे र ला लिगासहित चार उपाधि जितेको थियो।

२०१६-१७ को सिजनमा समेत स्वारेजले ४२ गोल र १६ असिस्ट गरेका थिए। जहाँ च्याम्पियन्स लिगमा पिएसजीविरुद्धाको ऐतिहासिक वापसीमा स्वारेजको पनि विशेष भूमिका थियो। त्यो सिजन ला लिगा र च्याम्पियन्स लिगमा रियल मड्रिड उत्कृष्ट बने पनि बार्सिलोनाको खेल तारिफयोग्य नै रह्यो। जहाँ कोपा डेल रे र सुपरकोपा बार्सिलोनाकै नाममा रह्यो।

२०१७ मा नै नेमार बार्सिलोना छाडेर पिएसजी गएपछि एमएसएन शैलीमा एक खेलाडी हराए। थप अरु कारणहरु जोडिँदै गए पनि बार्सिलोना त्यसपछि च्याम्पियन्स लिगमा कहिल्यै राम्रो देखिन सकेन। त्यसैको निरन्तरतामा गएको सिजन बायर्न म्युनिकसँगको ८-२ को हार त थप लज्जास्पद रह्यो। तर २०१७-१८ मा ३६ गोल र २०१८-१९ मा ३३ गोल गरेका स्वारेजको खेल नराम्रो भन्न सकिने आधार छैनन्।

तथ्यांकहरुलाई हेर्दा त बार्सिलोनामा सबैभन्दा उत्कृष्ट स्ट्राइकरका रुपमा आफ्नो नाम लेखाएर स्वारेजले छाडेका छन्। अफिसियल खेलहरुलाई हेर्दा बार्सिलोनको इतिहासमा नै मेस्सी र १९४० ताका बार्सिलोना खेलाडी रहेका सिजर रोड्रिग्वेजपछि धेरै गोल गर्ने खेलाडी स्वारेज नै हुन्।

मेस्सीसँग त मैदानमा मात्र होइन मैदानबाहिर समेत स्वारेजको तालमेल गजव रहिरह्यो। जसको प्रभाव मैदानमा प्रत्यक्ष देखियो। स्वारेजका ३९ गोलमा मेस्सीको पास र मेस्सीको ४७ गोलमा स्वारेजको पास पनि त्यसको प्रमाण हो। मैदानबाहिरको सम्बन्ध अझै उस्तै राख्न सकिए पनि मैदानमा मेस्सीलाई स्वारेजको अभाव खड्किने नै छ।

यी सबै कुरालाई विचार गर्दा र उनको तथ्यांक र खेल शैलीसमेतका आधारमा एउटा कुरा के स्पष्ट छ भने स्वारेज बार्सिलोनाका ‘आदर्श’ खेलाडी हुन्। बार्सिलोना आउने बेला अनुशासनहीन रिसाह खेलाडीको चरित्र बोकेका स्वारेज अहिले बार्सिलोना छाड्ने बेला समर्थकको प्रिय बनेका छन्।

पछिल्ला वर्ष उनको खेलमा तीब्रताको कमि देखिए पनि गोलमा बढ्ने उनको शैली अझै उत्कृष्ट नै छ। यसैले एथ्लेटिको मड्रिडमा सिमोनको प्रशिक्षणमा उनले अझै केही राम्रो गर्ने नै छन्। के थाहा बार्सिलोना समर्थकले एथ्लेटिको मड्रिड र बार्सिलोनाविरुद्धको महत्वपूणै खेलमा नै स्वारेजको गोलमा दुःखी हुनुपर्ने छ कि! आखिर डेभिड भिलाको समय पनि बिर्सिएका छैनन् नै।