काठमाडौं–राष्ट्रिय मानवअधिकार आयोगले डा गोविन्द केसीसँग भएका सम्झौताको कार्यान्वयन स्थिति सार्वजनिक गर्न र उनको जीवन रक्षाप्रति संवेदनशील बन्न सरकारको ध्यानाकर्षण गराएको छ।
आज एक विज्ञप्ति जारी गरी आयोगले आपसी विमतिका विषयहरु वार्ता र संवादको माध्यमबाट समाधान गर्न तथा आमरण अनशनजस्तो जीवन नै जोखिममा पर्नसक्ने जटील विकल्प नरोज्न पनि सम्बन्धित सबै पक्षलाई आग्रह गरेको छ।
डा केसीको जीवन रक्षाका लागि आवश्यक पहल गरिदिन अनुरोध गर्दै नेपाल चिकित्सक संघलगायत विभिन्न संघसंस्थाहरुले आयोगमा ज्ञापनपत्र पेश गरेकोप्रति पनि आफ्नो ध्यानाकर्षण भएको आयोगले जनाएको छ।
आयोगले आफ्नो कर्णाली प्रदेश शाखा कार्यालय जुम्ला र प्रदेश कार्यालय बागमतीले अनशनस्थल जुम्लादेखि नै निरन्तर अनुगमन गरिरहेको पनि जनाएको छ।
अनशनको नवौं दिन डा केसीलाई नेपालगन्ज हुँदै काठमाडौं ल्याई वीर अस्पतालस्थित ट्रमा सेन्टरमा लगिए पनि उनलाई हाल त्रिवि शिक्षण अस्पतालमा राखिएको पाइएको उल्लेख गर्दै आयोगले केसीको स्वास्थ्य अवस्था स्थिर रहेको,शरीरको पोटासियम, म्याग्नेसियम र ग्लुकोजको मात्रा कम हुँदै गएको,पटक–पटकको अनशनका कारण शरीरमा रोग प्रतिरोधात्मक क्षमता कमजोर रहेकाले संक्रमणको उच्च जोखिम रहेको अनुगमनका क्रममा बुझिएको जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
