काठमाडौं- मेडिकल शिक्षा सुधारको माग गर्दै जुम्लामा अनसन बसेका डा गोविन्द केसीको अनसनको छैटौं दिन पूरा भएको छ। डा केसीको स्वास्थ्य अवस्था बिग्रँदै गएपछि चिकित्सकले तत्कालै अस्पताल लैजानुपर्ने सुझाव दिएका छन्। तर डा केसी आफू अस्पताल नजाने भन्दै अनसनस्थलमै बसिरहेको उनका सहयोगी महेन्द्र कार्कीले बताए।
बिहान भएको परीक्षणमा डा.केसीलाई २४सै घण्टा नियमित मनिटर गर्न सकिने ठाउँमा यथाशीघ्र स्थानान्तरण गर्नु पर्ने कर्णाली स्वास्थ्य विज्ञान प्रतिष्ठानका चिकित्सकहरुले सुझाव दिएको उनले बताए।
‘प्रतिष्ठानका चिकित्सकको टोलीले दिनमा ३ पटक सामान्य स्वास्थ्य जाँच गरेर अस्पताल जान सुझाव दिएका छन्,’ कार्कीले भने, ‘तर, डा. केसी अस्पताल जान र स्लाइन लिन समेत मान्नु भएको छैन।’ यसैबीच हाल डा केसीलाई कर्णाली स्वास्थ्य विज्ञान प्रतिष्ठानमा राखिएको उनले बताए।
केसीले सरकारसँग कर्णाली स्वास्थ्य विज्ञान प्रतिष्ठानमा एमबिबिएसलगायतका कार्यक्रम संचालन गरिनुपर्ने र स्नातकोत्तर तहको अनुमति तत्काल पदान गर्नुपर्ने माग गरेका छन्।
गेटा मेडिकल कलेज र राप्ती स्वास्थ्य विज्ञान प्रतिष्ठानमा एमबिबिएस पठनपाठन सुरु गरिनुपर्ने, प्रदेश २ र गण्डकी प्रदेश तथा डोटी, डेडेलधुरा, उदयपुर र इलाम वा पाँचथरमा सरकारी मेडिकल कलेज तथा अस्पताल निर्माण प्रक्रिया अघि बढाइयोस भन्ने माग उनको रहेको कार्कीले बताए।
आफूसँग २०७५ साउन १० गते भएको सम्झौताअनुसार चिकित्सा शिक्षा ऐनमा संशोधन गरिनुपर्ने लगायतका माग राखेर डा.केसीले अनशन बसेका हुन्।
डा केसीको सर्मथनमा दीप प्रज्वलन
चिकित्सा शिक्षामा सुधारको माग गर्दै जुम्लामा अनशन बसेका डा.गोविन्द केसीको सर्मथनमा जुम्लामा शनिबार केसीको जीवन रक्षाको माग गर्दै दीप प्रज्वलन गरिएको छ।
संविधान दिवसको अवसरमा प्रत्येक असोज ३ गते संविधानको स्वागतको रुपमा दीप प्रज्वलन गरिन्थ्यो तर आज ‘खोजी संविधानको, खोजी अधिकारको’ भन्ने नाराका साथ डा. केसीको जीवन रक्षाको माग गर्दै दीप प्रज्वलन गरिएको कार्कीले बताए।
नागरिक समाज र पूर्व सांसद ललितजंग शाहीलगायतको टोलीले दीप प्रज्वलन गरेर केसीको जीवनरक्षा माग गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
