काठमाडौं- भारतले प्याज निर्यातमा प्रतिबन्ध लगाएपछि कृत्रिम अभाव सिर्जना गर्ने र मूल्य बढाउने ७ तरकारी पसललाई वाणिज्य, आपूर्ति तथा उपभोक्ता संरक्षण विभागले कारबाही गरेको छ।
काठमाडौंका विभिन्न स्थानमा रहेका तरकारी पसलमा अनुगमन गरी विभागले उपभोक्ता संरक्षण ऐन विपरित काम गर्ने ७ पसललाई ११ लाख ७० हजार रुपैयाँ बराबर कारबाही गरिएको जनाएको छ।
विभागले तीनकुनेस्थित तरकारी बजारका ३ वटा तरकारी पसल उलक सब्जी भण्डार, दुलाल आलु भण्डार र विजेश गौतम तरकारी पसललाई समान ५५ हजार रुपैयाँ जरिवाना गरेको छ।
त्यस्तै काठमाडौं महानगरपालिका वडा नंम्बर १३ स्थित रंजन आलु प्याज भण्डार र वडा नम्बर १४ स्थित पशुपति आलु प्याज स्टोरलाई समान २ लाख ५० हजार रुपैयाँ बराबर जरिवाना गरिएको छ। काठमाडौं महानगरपालिका वडा नम्बर १६ स्थित न्यु सापकोटा स्टोर्सलाई २ लाख ५५ हजार र वडा नम्बर १३ स्थित आरके ट्रेडर्सलाई ३ लाख रुपैयाँ जरिवाना गरिएको हो।
प्याज निर्यातमा भारतले गत सोमबारदेखि प्रतिबन्ध लगाएसँगै नेपाली बजारमा व्यापारीहरुले आफूसँग भएको प्याज लुकाएर कृत्रिम अभाव सिर्जना गरी उपभोक्तासँग चर्को मूल्य असुल्न थालेका छन्। व्यापारीले प्रतिकिलो ५० देखि ६० रुपैयाँमा किनेको प्याजको मूल्य बढाएर १ सय ३० रुपैयाँ सम्म पुर्याएका छन्। यसरी प्याजमा उपभोक्ता बढी ठगिन थालेपछि वाणिज्य विभाग र काठमाडौं महानगरपालिकाले अहिले तरकारी बजार केन्द्रित अनुगन गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772949758.png)
-1764146706.png)
