तस्बिर : रासस
काठमाडौं-भक्तपुरको मध्यपुर थिमी नगरपालिका ९ निकोसेरामा एकै परिवारका तीन जनाकोे शव भेटिएको घटनाको प्रहरीले विभिन्न कोणबाट अनुसन्धान गरिरहेको छ। शुक्रबार शव भेटिएको भन्दै प्रहरीकहाँ खबर आएसँगै केन्द्रीय अनुसन्धान ब्यूरोे (सिआइबी), महानगरीय प्रहरी अपराध महाशाखा र महानगरीय प्रहरी परिसर भक्तपुरले घटनाको अनुसन्धान सुरु गरेका छन्।
प्रहरी घटनास्थल पुग्दा घरका ढोका खुल्लै रहेको अवस्थामा ३६ वर्षीय सुदीप अधिकारी, उनकी श्रीमती ३४ वर्षीया सम्झना अधिकारी र १५ वर्षीय छोरा सुशान्त अधिकारीको शव छुट्टाछुट्टै फेला परेको थियो।
पहिलो तलामा कुकुर र सम्झनाको शव भेटिएको छ। पहिलो तलाको कोठामा खाटमा भेटिएको सम्झनाको शव अर्धनग्न अवस्थामा थियो। दोस्रो तलाको खाटमै छोरा सुशान्तको शव भेटिएको थियो। सुशान्त र सम्झनाको शवको अवस्था हेर्दा केही दिनअघि नै मृत्यु भएको जस्तो देखिएको एसएसपी थापाको भनाइ छ। उनीहरुको शव सड्न थालेको अवस्थामा भेटिएको हो।
घरको माथिल्लो तलामा भने सुदीपको शव भेटिएको थियो। सुदीपको शव भने सड्न थालेको थिएन। घटनाको अनुसन्धान गरेका एक उच्च अधिकारीले नेपाल लाइभलाई भने, ‘शवको प्रकृति हेर्दा आमाछोराको केही दिनअघि नै मृत्यु भएजस्तो देखिन्छ। तर सुदीपको शव हेर्दा भर्खरै मृत्यु भएजस्तो देखिन्छ । जसका कारण उनीहरुको मृत्यु छुट्टाछुट्टै दिनमा भएको देखिन्छ।’
उक्त घरमा उनीहरुमात्रै बस्ने भएकाले यो घटनाबारे कसैले थाहा नपाएको हुनसक्ने प्रहरीले जनाएको छ। तर शुक्रबार भने सुदीपका भाइ नै दाइको घर गएपछि शव देखेपछि प्रहरीलाई खबर गरेका थिए । त्यसपछि घटना बाहिर आएको हो।
‘घरका तीनै जना मृत भेटिनु र कुकुरसमेत मर्नु, घरका ढोका खुल्लै रहनुले घटनामा बाहिरको मानिसको संलग्नता हुनसक्ने आशंका देखिन्छ। तर घटनाका अन्य पाटाहरु केलाउँदा भने बाहिरको मान्छेबाट यो घटना भएको होइन भन्ने शंका पनि गर्न सकिन्छ’ अनुसन्धानमा खटिएका एक अधिकारीले नेपाल लाइभसँग भने।
आमा छोराको शव गन्हाउन थालेको अवस्थामा भेटिनु तर बाबु सुदीपको शव भने भर्खरै मृत्यु भएजस्तो अवस्थामा भेटिनुले पनि घटनामा बाहिरको मान्छेको संलग्नता नरहेकोतर्फ संकेत गरेको ती अधिकारीको भनाइ छ।
प्रहरी स्रोतका अनुसार अर्कोतर्फ थालमा विष फेला परेको छ। मृतकको शरीरमा कुनै चोटपटक नलाग्नु र थालमा विष फेला पर्नुले विष सेवनबाट मृत्यु भएको आशंका गरिएको छ । स्रोतले नेपाल लाइभसँग भन्यो, ‘चोटकपटक कतै देखिदैन। थालमा विषसमेत फेला परेको छ। जसकारण विष सेवनमार्फत् मृत्यु भएको हुनसक्छ । तर पोष्टमार्टम रिपोर्ट नआई केही भन्न सकिने अवस्था छैन।’
अनुसन्धानमा खटिएको प्रहरीले सुदीप डिप्रेशनमा गइसकेको समेत पाइएको बताएको छ। पछिल्लो समय घर बनाउँदाको ऋणले उनी थप तनावमा थिए। उनी लागूऔषध प्रयोगकर्तासमेत भएको पाइएको प्रहरीले जनाएको छ। जसका कारण घटनाको क्लु घरबाहिर हुन नसक्ने आँकलन प्रहरीले गरेको जनाएको छ।
घटनास्थलमा प्रहरीसहित फरेन्सिक विज्ञ टोलीसमेत खटिएको थियो । मृत्यु संकास्पद भएकाले उनीहरुको पोष्टमार्टमसँगै भिसेरा परीक्षणसमेत गरिने भएको छ।
विष वा लठ्याउने अन्य कुनै औषधिको प्रयोगबाट मृत्यु भएको हो वा होइन भन्ने कुरा भिसेरा परीक्षणमार्फत् पत्ता लाग्छ। मृतकको शरीर हेर्दा शंकास्पद देखिएमा, विष खाए वा खुवाएको आशंका भएमा भिसेरा जाँच गरिन्छ । मृतकको जिब्रो, शरीर, जिब्रो, नङ, आँखालगायतका भाग निलो देखिएमा वा मुखबाट फिँज आएमा विषमार्फत् मृत्यु भएको आशंका गरिन्छ। तर अधिकारी परिवारको शव मृत्यु भएको केही दिनपछि फेला परेकाले यी चिजहरुको अध्ययनमा अप्ठेरो भएको प्रहरीले जनाएको छ।
भिसेरा परीक्षणका लागि मृत शरीरबाट स्प्लीन, लिभर र किड्नीको भाग संरक्षित गरिन्छ । यसको रिपोर्टमा आउन सामाान्यतया २१ दिन लाग्छ।
यसअघि २०७४ सालमा बनेपा–८ स्थित बसपार्कमा रहेको गौतम भोजनालयमा ६५ वर्षीय हरिभक्त दाहालसहित उनका परिवारका ४ जना मृत फेला परेका थिए। उनीहरुले विष सेवनमार्फत् आत्महत्या गरेको पाइएको थियो। पछि भिसेरा परीक्षण गर्दा पनि विषकै कारण मृत्यु भएको रिपोर्ट आएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
