काठमाडौं- इंग्लिस प्रिमियर लिगको नयाँ सिजनमा सीमित दर्शकसहित खेल खेलाउने तयारी भइरहे पनि यकिन हुन सकेको छैन। जसले कोरोना माहामारीका कारण कमजोर बनेको फुटबल बजारमा अझ ठूलो घाटा लाग्न सक्ने डर बढेको लिगसम्बद्धहरु बताइरहेका छन्।
बेलायतमा अक्टोवर १ देखि खेल हेर्न दर्शकलाई अनुमति दिने तयारी भइरहँदा त्यसमा पुनर्विचार गरिने बेलायतका प्रधानमन्त्री बोरिस जोनसनले बताएका छन्। थोरै संख्यामा दर्शकलाई अनुमति दिँदै अभ्यास गरिरहँदा ठूलो संख्यामा दर्शक उपस्थित गराउन सक्ने अवस्था नआइसकेको उनले बताएका हुन्।
प्रिमियर लिगका प्रमुख कार्यकारी रिचार्ड मास्टर्स दर्शक नहुँदा क्लबहरुलाई ७० करोड पाउण्ड घाटा हुन सक्ने देखिएको बताउँछन्। गएको सिजनको पछिल्ला खेलहरुमा नै क्लबलाई आधा बिलियन पाउण्ड घाटा लागेर कठीन भइरहँदा अझै उही परिस्थिति जटिल हुने उनले बताएका छन्।
‘हामीले जति सक्दो छिटो दर्शकलाई खेल हेर्न दिने वातावरण बनाउनुपर्छ। अहिले फुटबलमा कमी भइरहेको विषय पनि त्यही हो। आर्थिक रुपमा र अन्य रुपमा समेत। अबको प्रमुख लक्ष्य नै दर्शकलाई खेल हेर्न दिनेमा केन्द्रित हुनुपर्छ’ उनले भने।
गएको हप्ता नै फुटबल क्लबहरु ब्राइटन र चेल्सीबीच एमेक्स स्टेडियममा भएको प्रिसिजन मैत्रीपूर्ण खेलमा समर्थकहरु उपस्थित हुन पाएका थिए। जुन झण्डै ६ महिनापछि दर्शकसहित देखिएको पहिलो फुटबल खेल हो। जहाँ २५ सय दर्शकले प्रत्यक्ष खेल हेरे।
शारीरिक दुरी बनाएर नै राखिएका दर्शकहरुका लागि भित्र आउँदा र बाहिर निस्कँदा पनि दुरी कायम गरिएको थियो। रंगशालामा दर्शकसहित खेल गर्न सकिन्छ कि सकिँदैन भन्नेबारेमा यो एउटा प्रयोग पनि थियो। गएको मार्चमा कोरोना माहामारीका कारण फुटबल रोकिएको थियो। त्यसपछि जुनमा सुरु भएको खेल दर्शकबिना बन्द रंगशालामा गरिएका थिए।
यसका साथै हार्लिक्विन्स र बाथबीचको प्रिमियरसिप रग्बी युनियनको खेलमा पनि दर्शकहरुलाई अनुमति दिइने भएको बिबिसीले उल्लेख गरेको छ। टी २० ब्लास्ट क्रिकेटमा पनि केही समर्थकहरुलाई जान दिइने गरी तयारी भइरहेको समाचारमा उल्लेख छ।
कोरोना माहामारीका कारण दर्शकबिना चलिरहेको खेलहरुमा अब विस्तारै इंग्ल्याण्डमा दर्शकलाई अनुमति दिन थालिएको हो। डिजिटल, कल्चर, मिडिया एण्ड स्पोर्टस् विभागले दर्शकलाई अनुमति दिइने भए पनि खेल हुने स्थलमा दर्शक सीमित संख्यामा मात्र रहने जनाएको छ। त्यसमा पनि पुनर्विचार गर्ने गरी छलफल भइरहेका छन्।
हार्लिक्विन्स र बाथबीचको प्रिमियरसिप रग्बी युनियनको आउने महिना हुने खेलमा ४ हजार समर्थकलाई आउन दिइने गरी तयारी भइरहेको छ। यस्तै सेप्टेम्बर ९ देखि १२ सम्म हुने हर्स रेसमा पनि दर्शक आउन दिइने गरी तयारी भइरहेको छ।
गएको सिजन कोरोनाका कारण मार्चमा रोकिएकाखेलहरु त्यसको एक सय दिनपछि दर्शक बिना खालि रंगशालामा सुरु गरिएको थियो। जसले खेलको रोमाञ्चकता कम हुनुका साथै क्लबहरुलाई आर्थिक रुपमा घाटा लागेको आवाज उठिरहेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
