काठमाडौं- सरकारले नेपालका ५ पर्यटकीय गन्तव्यबाहेक अन्य गन्तव्यको डलर फेयर (विदेशी नागरिकसँग लिने हवााई भाडा) हटाउने तयारी गरेको छ।नेपाल नागरिक उड्डयन प्राधिकरणको सिफारिसमा संस्कृति, पर्यटन तथा नागरिक उड्डयन मन्त्रालयले ५ वटा गन्तव्यबाहेक अन्य गन्तव्यको डलर फेयर घटाएर नेपाली नागरिक सरह हवाई भाडा लागू गर्ने तयारी गरेको हो।
डलर फेयरका भाडा हटाउने निर्णय मन्त्रीस्तरीय बैठकबाट गर्न सकिने भएपनि विरोध हुन सक्ने भएकाले मन्त्रिपरिषदबाट गर्ने तयारी गरिएको छ।मन्त्रिपरिषदबाट निर्णय गराउँदा विरोध हुने संभावना कम भएकाले मन्त्रालयको प्रस्तावमा मन्त्रिपरिषद् बैठकमा प्रस्ताव पठाउन लागिएको मन्त्रालयको उच्च स्रोतले नेपाल लाइभसमक्ष बताएको छ।'यस्तो निर्णय मन्त्रिस्तरीय बैठकबाट पनि गर्न सकिन्छ। तर मन्त्रालयबाटै निर्णय गर्दा विरोध हुने र दबाबसमेत पर्ने भएकाले मन्त्रिपरिषद्मा पठाउने तयारी गरिएको छ,' स्रोतले भनेको छ।
प्राधिकरणले पर्यटकीय गन्तव्यहरू कास्कीको पोखरा विमानस्थल, चितवनको भरतपुर विमानस्थल, सोलुखुम्बुको लुक्ला विमानस्थल, मुस्ताङकाे जाेमसाेम विमानस्थल र माउन्टेन उडानमा तत्काल डलर फेयर नहटाउने र अन्य सबै गन्तव्यको डलर फेयर हटाउनुपर्ने सिफासिस अध्ययन कार्यदलले गरेपछि सोही अनुसार व्यवस्था गर्न लागिएको हो।
संस्कृति, पर्यटन तथा नागरिक उड्डयन मन्त्रालयको जिम्मेवारी सम्हालेदेखि योगेश भट्टराईले विदेशी र नेपालीबीचको विभेदपूर्ण हवाई भाडा हटाउने बताउँदै आएका थिए। सोही अनुसार मन्त्रालयले प्राधिकरणका उपमहानिर्देशक नरेन्द्र थापा संयोजकत्वमा डलर फेयर समायोजन गर्न एक कार्यदल गठन गरेको थियो।
कार्यदलमा पर्यटन मन्त्रालयका उपसचिव प्रमोद नेपाल, प्राधिकरणकै उपप्रबन्धक हिराचन काफ्ले, चार्टर एकाउन्टेन सौरभ रिजाल र पर्यटन मन्त्रालयका पूर्व उपसचिव प्रभा वैद्य सदस्य थिए। त्यस्तै समितिमा वायुसेवा सञ्चालक संघका उपाध्यक्ष तथा यती एयरलाइन्सका सिइओ अनोज रिमाल र संघका महासचिव तथा समिट एअरका प्रबन्ध निर्देशक मनोज कार्की थिए।
कार्यदलले साउनको अन्तिम साता डलर फेयर हटाउनु पर्ने सुझावसहित प्रतिवेदन नेपाल नागरिक उड्डयन प्राधिकरणका महानिर्देशक राजन पोखरेललाई बुझाएको थियो। कार्यदलको प्रतिवेदनका आधारमा प्राधिकरणले डलर फेयर हटाउने सिफासिससहितको प्रतिवेदन मन्त्रालयमा बुझाएको थियो।
प्राधिकरणले एकैपटकमा सबै गन्तव्यमा डलर फेयरको भाडा घटाउँदा वायुसेवा कम्पनीलाई समस्या पर्ने र राज्यले पनि दुर्गम उडानमा सहुलियत दिनुपर्ने दायित्वको बोध गर्दै ५ गन्तव्यबाहेक अन्य गन्तव्यमा डलर फेयरको व्यवस्था खारेज गर्ने प्रस्ताव गरेको जनाएको छ।
अहिले वायुसेवा सञ्चालकले सबै गन्तव्यमा विदेशी नागरिकसँग डलर फेयर भन्दै नेपालीसँग लिनेभन्दा ३ देखि ४ गुणा भाडा बढी लिँदै आएका छन्।
सरकारले डलर फेयर कायम राखको सबै गन्तव्यमा प्रायः सबै कम्पनीको उडान रहेका कारण विभेद पनि नहुने ठहरसहित पहिलो चरणमा पाँच गन्तव्यमा डलर फेयरको भाडा लिने पाउने व्यवस्था यथावत राख्ने र अन्यको हकमा पनि नपाउने निर्णय गर्न लागेको मन्त्रालयलका एक अधिकारीले जानकारी दिए।
हाल माउन्टेन उडान सबै एयरलाइन्सले गर्दै आएका छन् भने लुक्लामा सीता, तारा र समिट एयरले उडान गर्दै आएका छन्। यसैगरी मुस्ताङकाे जाेमसाेम विमानस्थलमा पनि सीता, तारा र समिटले उडान गरिरहेका छन। यसैगरी, पोखरामा बुद्ध, यती, श्री र सिम्रिकले पनि उडान गरिरहेका छन्। सौर्य एयरलाइन्सले पनि नयाँ एटिआर जहाज ल्याउँदै पोखरा उडान गर्ने व्यवसायिक योजना अगाडि सारिसकेको छ। चितवनको भरतपुर विमानस्थलमा बुद्ध, यती र सिम्रिकले उडान गरिरहेका छन्। जसका कारण यसरी ५ गन्तव्यबाहेकका विमानस्थलमा डलर फेयर हटाउँदा विभेद नहुने मन्त्रालयको बुझाइ छ।
नोटः मुस्ताङको जोमसोम विमानस्थल हुनुपर्नेमा अन्यथा भएकाले सुधार गरिएकाे छ। (–स)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
