काठमाडौं-नेपाल नागरिक उड्डयन प्राधिकरणले कोरोना संक्रमण रोकथाम तथा नियन्त्रणका लागि प्राधिकरण प्रधान कार्यालय तथा मातहतका कार्यालयहरुले अवलम्वन गर्नुपर्ने सुरक्षात्मक कार्यविधि जारी गरेको छ।
प्राधिकरणले जारी गरेको निर्देशनअनुसार जुनसुकै पदमा रहेर काम गरिरहेका कर्मचारीले आफ्नो कार्यकक्ष खोल्ने, बन्द गर्ने, टेबल सफा गर्ने कार्यमा सहयोगी प्रयोग गर्न नपाउने भएका छन। यी सबै काम कर्मचारी स्वयंले गर्नु पर्ने सुरक्षात्मक कार्यविधिमा उल्लेख छ।
यसैगरी कार्यविधिमा गर्भवति (गर्भको अवधि तीन महिना कटिसकेपछि) कर्मचारीले कार्यालयलाई सूचना दिई अनुपस्थित रहन पाउनेसमेत उल्लेख छ।
कर्मचारीले अवलम्बन गर्नु पर्ने काम
- सबै कर्मचारीले अनिवार्य रुपमा सुरक्षित मास्क लगाएरमात्र प्रवेश गर्ने।
- मूल ढोकामा थर्मल गनले तापक्रम जाँच गर्दा निर्धारित मापदण्डभित्र पाइएपश्चात स्यानिटाइजर लगाएरमात्र कार्यालयमा प्रवेश गराउने।
- हाजिर गर्दा एक कर्मचारीदेखि अर्को कर्मचारीबीचको दूरी कम्तिमा २ मिटर रहने गरी फेस स्क्यानिंग मेशिनबाट हाजिर गर्ने।
- आफ्नो कार्यकक्ष खोल्ने, बन्द गर्ने, टेबल सफा गर्ने कार्य कर्मचारी स्वयंले गर्नु पर्ने।
- आफ्ना लागि खाजापानीको व्यवस्था कर्मचारी स्वयंले मिलाउने ।
- अति आवश्यक काममा बाहेक आफ्नो कोठा छोडी अन्यत्र नजाने।
- कार्य प्रक्रियालाई सरल बनाई सकेसम्म थोरै कर्मचारीहरु सम्पर्कमा आउने व्यवस्था सम्वन्धित निर्देशनालय, विभागले मिलाउने।
- कार्यालयमा हुने बैठकहरुमा एक कर्मचारीदेखि अर्को कर्मचारीबीचको दूरी कम्तिमा २ मिटरको रहने गरी व्यवस्था मिलाउने।
- कर्मचारीहरुले आफ्नो कार्यस्थल/बैठकस्थलमा रहेका झ्याल ढोका खुला राखी भेन्टिलेसनको व्यवस्था मिलाउने।
- कर्मचारीहरुले दश वर्ष मुनिका बच्चाहरुलाई कार्यालयमा प्रवेश नगराउने।
- कर्मचारीहरुले खोक्दा वा हाछ्यु गर्दा पूर्णरुपमा सभ्य आचरणको पालना गर्ने र कार्यालय परिसरमा जथाभावी नथुक्ने।
- रुघाखोकी लागेका, घॉटी दुख्ने, जीउ दुख्ने, ज्वरो आउने लगायतका समस्या भएका कर्मचारीहरु आफूलाई सञ्चो नभएसम्म कार्यालयमा नआउने।
सेवाग्राही तथा आगन्तुकले गर्नुपर्ने
- कार्यालयमा आउने सबै सेवाग्राही तथा आगन्तुकहरुलाई अनिवार्य रुपमा सुरक्षित मास्क लगाएरमात्र प्रवेश गर्न दिने।
- मूल ढोकामा थर्मल गनले तापक्रम जाँच गर्दा निर्धारित मापदण्डभित्र पाइए पश्चात स्यानिटाइजर लगाएरमात्र कार्यालयमा प्रवेश गराउने ।
- कामको प्रकृति, उद्देश्य पहिचान गरी भेट्नु पर्ने व्यक्तिको पूर्व स्वीकृति लिएर मात्र भेट्न पठाउने ।
- कार्यालयमा भेटघाट गर्नुपर्ने अवस्थामा कम्तिमा २ मिटरको दूरीमा बसी भेटघाट गर्ने। भेटघाटको समय बढीमा १५ मिनेटसम्म हुने।
- सेवाग्राही तथा आगन्तुकहरुले दश वर्ष मुनिका बच्चाहरुलाई कार्यालयमा प्रवेश नगराउने।
- सेवाग्राही तथा आगन्तुकहरुले खोक्दा वा हाछ्यु गर्दा पूर्णरुपमा सभ्य आचरणको पालना गर्ने र कार्यालय परिसरमा जथाभावी नथुक्ने ।
सवारी साधनको हकमा
- कार्यालयले प्रत्येक सवारी साधनलाई किटाणुबाट संक्रमणमुक्त गर्ने व्यवस्था मिलाउने।
- सवारी साधनमा चालकसमेत बढीमा ३ जनासम्मले मात्र यात्रा गर्ने व्यवस्था मिलाउने।
- सवारी चालकहरु कार्यालय आउजाउ गर्दा र विश्राम कक्षमा रहँदा कम्तीमा २ मिटरको दूरी कायम गरी मास्क र स्यानिटाइटर लगाएर सुरक्षित रहने।
- सवारी चालकहरुले सवारी साधनको स्टेरिङ्ग, सिट, सिट बेल्ट, साँचो, चावीलगायत अन्य प्रत्यक्ष हातले छोइने ठाँउहरुमा दैनिक डिसइन्फेक्सन गर्ने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1780635603.gif)
-1764146706.png)
