काठमाडौं- नियमित उडानमा भन्दा बढी भाडा नलिन एयरलाइन्स कम्पनीलाई मन्त्रालयले ध्यानाकर्षण गराएको छ। संस्कृति पर्यटन तथा नागरिक उड्डयन मन्त्रालयमा आइतबार भएको मन्त्रालयको उच्च स्तरीय व्यवस्थापन समूहको बैठकले यस्तो ध्यानाकर्षण गराएको हो।
बैठकले भाद्र १६ देखि नियमित उडान हुने हुदाँ वायुसेवा कम्पनीहरुले कोभिड-१९ को महामारीपूर्व नियमति अवस्थामा लिने हवाई भाडादरभन्दा बढी नलिन सबै वायुृसेवा निगमहरुसँग समन्वय गर्ने र नेपाल नागरिक उड्ड्यन प्राधिकरणमार्फत् वायुसेवा कम्पनीहरुलाई सचेत गराउने निर्णय गरेको छ।
यसैगरी नेपाल सरकारले तीनवटा देशसँग हवाई सम्झौता गर्ने निर्णयसमेत गरेको छ। बैठकले इन्डोनेसिया,फिनल्याण र रसियासँग हवाई सम्झौताको प्रकृया अघि बढाउने निर्णय गरिएको हो।
त्यस्तै नेपालीहरुको स्वदेश फिर्तीलगायत विषयलाई अनुगमन र सहजीकरण गर्न पर्यटन मन्त्रालयका उपसचिव रामकृष्ण लामिछानेको संयोजकत्वमा चार सदस्यीय समिति बनाएको छ। समितिका सदस्यहरुमा पर्यटन विभागका निर्देशक सुरेन्द्र थापा,नेपाल नागरिक उड्डयन प्राधिकरणका हिराजन काफ्ले र नेपाल पर्यटन बोर्डका प्रवन्धक सुुनिल शर्मा रहेका छन्।
समितिलाई हवाई उडान भाडादर यात्रुहरुको परिवहनका विषयमा अनुगमन गर्ने,होटलले प्रदान गर्ने मापदण्डको विषयमा स्थलगत अनुगमन गरी पृष्ठपोषण गर्ने,हान लगायतका संघ संस्थाहरुसँग आवश्यक समन्वय गर्ने र स्वदेशी फिर्ता प्रकृयासँग जोडिएको गुनासो व्यवस्थापन गर्ने कार्यादेश तोकिएका छ।
हिमाल आरोहणका लागि खटाइने सम्पर्क अधिकृत र रेस्क्युलगायतका विषयमा मापदण्ड र कार्यविधि बनाउने निर्णय समेत गरिएको छ।
बैठकमा संस्कृति पर्यटन तथा नागरिक उड्डयनमन्त्री योगेश भट्टराईले मन्त्रालयको वार्षिक कार्ययोजनामा समावेश गरिएका माइलस्टोनहरुलाई तोकिएको समयमै सम्पन्न गर्न निर्देशन दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
