लकडाउनका बेला स्वदेश फर्कने तयारीमा नेपाल आएका जर्मन पर्यटक।
काठमाडौं- व्यावसायिक हवाई उडान बन्द भएको लकडाउन तथा निषेधाज्ञाका समयमा नेपालमा रहेका विभिन्न देशका विदेशी नागरिकलाई हवाइ सेवा उपलब्ध गराएका नेपाली तथा विदेशी एयरलाइन्स कम्पनीले नेपाल पर्यटन बोर्डलाई तिर्नुपर्ने शुल्क नतिरेको बताइएको छ। नेपाली तथा विदेशी एयरलाइन्स कम्पनीले झन्डै १ करोड रपैयाँ तिर्न बाँकी रहेको बोर्डले जानकारी दिएको हो।
नेपाल भ्रमणमा आएका विदेशी पर्यटकले नेपाल छोड्दा पर्यटन शुल्कबापत प्रतिव्यक्ति १ हजार रुपैयाँ तिर्नुपर्ने हुन्छ। उक्त रकम संकलनका लागि सहज हुने भन्दै बोर्डले एयरलाइन्स कम्पनीसँग टिकट काटेकै बेला १ हजार रुपैयाँ थप लिन दिने र उनीहरुले बोर्डमा बुझाउनु व्यवस्था छ।
तर, लकडाउनसुरु भएसँगै नेपालबाट विदेश फर्किएका विदेशी नागरिकले तिरेको पैसा नै एयरलाइन्स कम्पनीले बोर्डलाई नबुझाइका हुन्। बोर्डका अनुसार लकडाउनयता नेपाल भ्रमणमा आएका र विदेश फर्केका ९ हजार २ सय विदेशी पर्यटक बराबरको ९२ लाख रुपैयाँ पर्यटन शुल्क उठान ढिला भएको छ।
बोर्डका प्रमुख कार्यकारी अधिकृत धन्नजय रेग्मीका अनुसार केही सिमित एयरलाइन्सले सीमित रकम मात्रै दाखिला गरेका छन्। उनका अनुसार एयरलाइन्स कम्पनीले विदेशी नागरिक बोकेको विवरणसमेत बोर्डमा नबुझाउँदा समस्या आएको छ।
कसरी हुन्छ शुल्क संकलन?
नेपाल भ्रमण आउने विदेशी पर्यटकले नेपाल छोड्दा पर्यटन शुल्कबापत १ हजार रुपैयाँ तिर्नुपर्ने हुन्छ। उक्त रकम एयरलाइन्स कम्पनीको टिकटमा नै जोडिन्छ। एयरलाइन्स कम्पनीले पनि उडान गरेपछि सबै विवरण बोर्डमा बुझाउनु पर्छ। बोर्डले एयरलाइन्स कम्पनीले बुझाएका विवरण तयार पारी बिलबिजक जारी गर्छ।
बिलबिजक जारी भएको १५ दिनभित्र रकम भुक्तानी गरे ३ प्रतिशत छुटसमेत एयरलाइन्स कम्पनीले पाउने व्यवस्था छ। २२ दिनसम्म रकम बुझाएका कुनै थप रकम लाग्ने छैन। तर, २२ दिनपछि भने प्रतिदिन ०.०५ प्रतिशतका दरले जरिवाना लाग्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775122347.png)
