चितवन-चितवनमा उत्पादित केराले बजार नपाउँदा चरालाई आहारा बनेको छ । लकडाउनसँगै माग घटेका कारण बिक्री हुन नसकेपछि केरा बारीमै पाकेर चराको आहार बनेको हो।
मुख्य सिजनमा नै केरा बिक्री नभएपछि किसान चिन्तित बनेका छन्। यस वर्ष उत्पादन राम्रो भए पनि निषेधाज्ञाका कारण बारीमै पाकेर झर्ने अवस्था आएपछि किसानले लगानीसमेत गुमाउने अवस्था आएको छ।
निषेधाज्ञामा सरकारले कृषि उपजलाई ढुवानी गर्न सहज वातावरण बनाए पनि बजार नखुल्दा बिक्रीमा समस्या भएको हो। केरा व्यवसायी सङ्घ चितवनका अध्यक्ष घननाथ महतो केरा बिक्री नभएको बताउछन्। उनले भने, 'यो समयमा बजारको निकै ठूलो समस्या छ।' २५ देखि ३० प्रतिशत केरा खेतमै पाकेर झर्न थालेकाे र कतिपय चराको आहार बनेको उनले बताए। उनले भने, 'केरा बोटमै पाकेको छ, चराले आधा खाँदै छाड्दै गरेको देख्न सकिन्छ।'
नेपालमा लकडाउन सुरु सँगै केरा पाकेको थियो । बीचमा लकडाउन खुलेसँगै केही सहज भए पनि फेरि अवस्था झन् जटिल बनेको उनले बताए। 'यस वर्ष केराको उत्पादन राम्रो थियो', उनले भने 'बजार र मूल्य पाइएन, करोडौँको क्षति भयो ।' उनले निषेधाज्ञामा पनि भारतीय केरा नेपाली बजारमा आएको तर नेपाली केराले बजार नपाएको गुनासो गरे। यो समयमा व्यपारीले सहजै केरा लैजान नमानेको र लगिहाले पनि मूल्य निकै कम पाउने गरको महतोको भनाइ छ।
तीन तहका सरकारले छुट्टाछुट्टै निर्णय गर्दा झन् समस्या भएको उनकाे भनाइ छ। 'यहाँबाट केरा लगिए पनि जिल्ला र पालिकाहरुमा अवरोध गर्ने गरिएको छ, कतिपय अवस्थामा बाटोमै रोकिनुपर्ने अवस्था छ', उनले भने। उनका अनुसार यस वर्ष मलको अभाव छ । केराका लागि मल अत्यावश्यक छ, यस्तै भयो भने अर्को वर्ष उत्पादन घट्छ ।
केरा व्यवसायी यज्ञ सुवेदीले निषेधाज्ञाले ग्राहक बजार आउन नपाएपछि केरा बिक्री हुन छाडेको बताए। केरा बिक्री नभएपछि आफैँ पसल-पसलमा खुद्रा बिक्री गर्दै हिँड्न बाध्य भएको उनले बताए। 'बारीमा केरा पाकेको छ, बिक्री नभएर चराले खाइरहेको छ, केही झरेर नष्ट भएको छ', उनले भने। यस वर्ष समयमा नै पानी परेका कारण केराको उत्पादन राम्रो भएको उनले बताए।
उनले आफ्नो ५० लाख रुपैयाँको केरा क्षति भएको बताए। 'मैले एक सिजनमा रु तीन करोडको केरा बेच्थेँ', उनले भने 'यस वर्ष रु दुई करोड पुग्न पनि धौधौ छ ।' सुवेदीले ७० बिघामा केराखेती गर्दै आएका छन्। गत दर्जनकाे ७० रुपैयाँसम्म बिक्री भएको केराको मूल्य यस वर्ष ५० भन्दामाथि पुग्न नसकेको उनले बताए। जिल्लामा अधिकांश किसानले मालभोग र जिनाइन केरा लगाएका छन् ।
महानगर फलफूल तथा तरकारी बजार नारायणगढका प्रबन्ध निर्देशक थीरप्रसाद धितालले बजारमा फलफूलको बिक्री न्यून रहेको बताए। 'प्रशासनले तीन घण्टाभन्दा बढी समय पसल खोल्न दिँदैन, ग्राहक आउने समय नै छैन', उनले भने। ठेला र सडकपेटीमा व्यापार गर्नेलाई पनि प्रहरी र स्थानीयवासीले अवरोध गर्ने गरेको उनले बताए।
चितवनमा उत्पादन भएको केरा बाहिरी बजारमा निर्यात नभएपछि नारायणढको बजारमा थुप्रिएको धितालले बताए। यस वर्षमात्र जिल्लामा २०० बिघाभन्दा बढी क्षेत्रफलमा केराखेती विस्तार भएको छ। चितवन केरा उत्पादनका लागि अग्रणी जिल्ला मानिन्छ । जिल्लामा तीन हजार २०० बिघामा केराखेती गरिएको छ । चितवनको रत्ननगर, कालिका, खैरहनी नगरपालिका र भरतपुर महानगरपालिकाको पश्चिमी क्षेत्र केरा उत्पादनका लागि पकेट क्षेत्र मानिन्छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
