काठमाडौं- स्पेनिस क्लब बार्सिलोनाका कप्तान लियोनल मेस्सीले क्लब छाड्न चाहेका छन्। मेस्सीले बुरोफ्याक्स मार्फत आफूले क्लब छाड्न चाहेको र त्यसका लागि वातावरण बनाउन बार्सिलोना ब्यवस्थापनलाई आग्रह गरेका हुन्।
स्पेनमा व्यापारिक सरसल्लाहका लागि बुरोफ्याक्स विशेष प्रचलनमा छ, जसको मान्यता अदालतमा समेत प्रमाणका रुपमा स्थापित हुन सक्छ। मेस्सीको आग्रहपछि बार्सिलोना ब्यबस्थापनको आकस्मिक बैठक बसेको थियो। जसमा केही पदाधिकारीले अध्यक्ष जोसेप मारिया बर्टामेउले राजीनामा दिनुपर्ने तर्क अघि सारेका थिए।
तर बर्टामेउको राजीनामा विषयमा कुनै निर्णय भएको छैन। जसका कारण मेस्सीलाई बार्सिलोनामा राख्न सकिने भनिएको अन्तिम आश क्लबसँग देखिँदैन। बार्सिलोना ब्यवस्थापनको बैठकपछि बुरोफ्याक्स मार्फत नै मेस्सीलाई क्लब नछाड्न आग्रह गरिएको थियो।
बार्सिलोना ब्यवस्थापनसँगको अविश्वास, बार्साको कमजोर अवस्थामा सुधार भएर पहिलेको जस्तै युरोपको अब्बल टिम बनाउन सक्नेमा दुविधा, खेलाडी किनबेचमा राम्रो काम गरेर प्रतिस्पर्धात्मक टिम नबनाउने कारण र टिमकै साथीहरुमाथि भइरहेको अपमानजनक व्यवहार जस्ता कारण मेस्सीले क्लब छाड्न चाहेको बताइएको छ।
मेस्सीले क्लब छाड्न चाहेका विषय यसअघि पनि विभिन्न समय चर्चामा रहने गरेको भए पनि यसपटक विषय गम्भीर देखिन्छ। नवनियुक्त प्रशिक्षक रोनाल्ड कोम्यानसँगको भेटमा उनले आफूले बार्सिलोनामा भविष्य नदेखेको बताएका थिए। कोम्यानसँग गरिएको गोप्य वार्ताका विषयसमेत बाहिरिएपछि उनी थप चिढिएका थिए।
यो सिजन उपाधिविहीन रहेको बार्सिलोना च्याम्पियन्स लिग क्वाटरफाइनलमा बायर्न म्युनिकसँग ८–२ ले हारेपछि मेस्सीले क्लब छाड्ने हल्लाहरु बढिरहेका थिए। अहिले नयाँ प्रशिक्षकसँगको भेटमा पनि मेस्सी विश्वस्त हुन सकेनन् र बार्सिलोना ब्यवस्थापनसँग चिसिएको उनको सम्बन्ध थप बिग्रिएको छ।
च्याम्पियन्स लिगको हारपछि बिदामा रहेका मेस्सी बिदा छोट्याएर गएको हप्ता प्रशिक्षकसँग भेट्न गएका थिए। क्लबमा अझै एक वर्षको सम्झौता बाँकी रहेका मेस्सीलाई सहज रुपमा बाहिरिने अवसर नदिन प्रयास गरिरहेको छ। उनको ७०० मिलियन पाउण्डको महँगो रिलिज क्लज देखाएर ब्यवस्थापनले तर्साइरहेको छ भने मेस्सीले आफ्नो सम्झौतामा उल्लेख भएको– ‘हरेक सिजनको अन्त्यमा आफूले चाहेमा क्लब छाड्न सक्ने’ भन्ने बुँदालाई अघि सारिरहेका छन्।
क्लबले मेस्सीले त्यसरी सिजनको अन्त्यमा क्लब छाडेर जान सक्ने बुँदा जुनको मध्यदेखि अन्त्य भइसकेको बताइरहेको छ। तर कोरोना माहामारीका कारण रोकिएर ढिलो सकिएको लिग सिजनका कारण त्यो समय अझ रहेको मेस्सीको तर्क छ। जसले यदि मेस्सीले क्लब छाडेर गएमा ब्यवस्थापन अदालती प्रक्रियामा जाने देखिन्छ। जहाँ विश्व फुटबलको सबैभन्दा ठूलो ट्रान्सफर विवाद अझ लम्बिने छ।
मेस्सीले सित्तैमा छाडेर जाँदा लाग्न सक्ने घाँटालाई मध्यनजर गर्दै उनको बिक्रीमा नै लाग्न पनि बार्सिलोना ब्यवस्थापनमा छलफल भएको छ। अहिले युरोप ठूला भनिएका विभिन्न क्लब मेस्सी किन्ने होडमा लागिरहेका छन्। जसमा प्रमुख रुपमा म्यानचेस्टर सिटी, म्यानचेस्टर युनाइटेड, पिएसजी, युभेन्टस, इन्टर मिलान जस्ता क्लबको नाम आइरहेको छ।
मेस्सीले आफूले क्लब छाड्न चाहेको विषय पटक पटक अध्यक्ष बर्टामेउलाई जानकारी गराउँदै आइरहेका थिए। जसमा खराब सिजनपछि प्रशिक्षक क्विके सेटियन र टेक्निकल सेक्रेटरी इरिक अबिडाललाई बर्खास्त गरेको बार्सिलोनाले दुई दिन पछि नयाँ प्रशिक्षक नियुक्त गरेको थियो। नयाँ प्रशिक्षक नियुक्तिसँगै मेस्सीको बार्सिलोना बसाइ लम्ब्याउने सोचमा रहेको ब्यवस्थापनले त्यस्तो हुन नसक्ने बुझिरहेको छ।
मेस्सीले क्लब छाड्न चाहेको विषयमा बार्सिलोना ब्यवस्थापनको बैठक बसिरहँदा बार्सिलोनाको कार्यालयबाहिर सयौँ समर्थक भेला भएर अध्यक्ष बर्टामेउका विरुद्ध नाराबाजी गरेका थिए। केहीबेरमा नै प्रहरी परिचालन गरेर अवस्था सामान्य पारिएको थियो।
क्याटालोनिया राज्यका प्रमुखदेखि केही प्रतिष्ठित व्यक्तिले समेत मेस्सीको बार्सिलोनामा रहँदाको समयलाई धन्यबाद दिँदै सामाजिक सञ्जालमा बिदाइको सन्देश बुझिने पोस्टहरु गरिरहेका छन्। जसका कारण पनि मेस्सीले क्लब छाड्ने विषयलाई थप आधिकारिकता दिएको छ।
अबको समय ब्यवस्थापन र मेस्सीबीच क्लब छाड्ने र क्लबमै राखिरहने विषयमा थप विवाद बढ्ने देखिन्छ। बार्सिलोनाका केही पूर्वखेलाडीले पनि मेस्सीले छाड्न चाहेको विषय अन्तिम निर्णय भएको र त्यसलाई फर्काउन मिल्ने ठाउँ नहरेको बारेमा बताएको स्पेनिस सञ्चार माध्यममा खबर बनिरहेका छन्। केहीले भने अध्यक्ष बर्टामेउको राजीनामाले मेस्सीको बर्हिगमन रोक्न सक्ने बताइरहेका छन्।
१३ वर्षको उमेरमा अर्जेन्टिनाबाट स्पेन गएका मेस्सी आजको समयमा पुग्न मेहनत सानो छैन। बाल्यकाल कठीन रहेका मेस्सीले स्पेनिस टिम बार्सिलोनामा स्थान बनाएपछि उनको फुटबल यात्राले उचाइ लिँदै गयो। बार्सिलोनाबाट ७३१ खेल खेलेका मेस्सीले ६३४ गोलका साथै २८५ असिस्ट गरेका छन्।
बार्सिलोनामा रहँदा नै व्यक्तिगत रुपमा सबैभन्दा ठूलो मानिने बालोन डि’ओर अवार्ड कीर्तिमानी ६ पटक जितेका मेस्सीले १० ला लिगा, ६ कोपा डेल रे, ४ च्याम्पियन्स लिग, ३ क्लब विश्वकप, ३ युइएफए सुपर कप, ८ स्पेनिस सुपर कपलगायतका उपाधि जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
