काठमाडौं-सरकारले कोटेश्वर-कलंकी खण्डमा ट्राफिक व्यवस्थापन गर्न तीन स्थानमा फ्लाइओभर बनाउने भएको छ। सडक विभागले यसका लागि प्रारम्भिक अध्ययन गरिसकेको जनाएको छ।
उपत्यकाको ट्राफिक चाप व्यवस्थित गर्न फ्लाइओभर निर्माण गर्न लागिएकाे हो। चक्रपथको कोटेश्वर-कलंकी खण्डको ग्वार्को, सातदोबाटो र एकान्तकुना चोकमा फ्लाइओभर बनाइने छ।
सडक विभाग अन्तर्गतको गुणस्तर अनुसन्धान तथा विकास केन्द्रले ट्राफिक व्यवस्थापन संरचना (फ्लाइओभर)को विस्तृत परियोजना प्रतिवेदन (डिपीआर) बनाउन केही समयअघि परामर्शदाता छनोट गरेको थियो। जियोकम/बीडीए/रेज जेभीले डिपीआर तयार पार्ने जिम्मा पाएको थियो।
डिपीआर निर्माण गर्न साउन पहिलोसाता सडक विभाग र परामर्शदाताबीच सम्झौता भइसकेको थियो। साढे ६ महिनाभित्र परामर्शदाताले डिपीआर तयार गरी विभागलाई दिने सम्झौता भएको छ। काठमाडौं उपत्यकाको बढ्दो ट्राफिक चापलाई व्यवस्थित गर्न फ्लाइओभर निर्माण हुन लागेको सडक विभागका महानिर्देशक केशवकुमार शर्माले बताए।
‘अहिले डिपीआर निर्माणका लागि तयार गरेको प्रारम्भिक अध्ययनमात्र आएको छ’ महानिर्देशक शर्माले भने, ‘उक्त प्रतिवेदन आएपछि मात्र कस्तो बन्छ, लागत कति लाग्छ भन्ने कुरा आउने छ,’ कोटेश्वर-कलंकी सडक खण्डको तीन स्थान ग्वार्को, सातदोबाटो र एकान्तकुनामा फ्लाइओभर बन्ने उनको भनाइ छ।
परामर्शदाताले ट्राफिकको अवस्था, माटोको गुणस्तर, सडकको लम्बाईलगायत विषय अध्ययन गरेर डिजाइन तयार गर्नेछ। डिपीआरमा फ्लाइओभरसहित ओभर पास तथा अन्डर पासबारे समेत अध्ययन हुनेछ। त्यसमध्ये उपयुक्त संरचनामध्ये कुनै एकको निर्माण हुने सडक विभागले जनाएको छ।
साढे १० किलोमिटर कलंकी-कोटेश्वर सडक चीनको सहयोगमा ८ लेनमा विस्तार भइसकेको छ। त्यस्तै अर्को खण्ड कलंकी-धोवीखोला निर्माणका लागि साइट क्लियर भइसकेको भए पनि कोरोना भाइरस संक्रमणका कारण सृजित समस्याले काम अघि बढ्न सकेको छैन।
२०७० देखि विस्तार प्रक्रिया अघि बढाइएको कोटेश्वर-कलंकी सडक निर्माण सम्पन्न गरि चीनले २०७५ माघमा नेपाल सरकारलाई हस्तान्तरण गरेको थियो। सडक विभागले विस्तारित सडक खण्डमा ट्राफिक व्यवस्थापन संरचना बनाउन लागेको हो।
चक्रथप हुँदै सहर भित्रिने र बाहिरिने सवारीका कारण ग्वार्काे, सातदोबाटो र एकान्तकुना चोकमा सवारी चाप अत्यधिक छ। ट्राफिक व्यवस्थापन गर्ने संरचना निर्माण गरेर ती चोकका सवारी जाम घटाउने योजनाअन्तर्गत विभागले बैकल्पिक संरचना निर्माण गर्ने योजना बनाएको हो।
चीन सरकारको आर्थिक तथा प्राविधिक सहयोगमा विस्तार भएको चक्रपथमा ट्राफिक व्यवस्थापन संरचना निर्माण भने सरकार आफैंले गर्न लागेको हो। विस्तारित कलंकी-कोटेश्वर खण्डकै कलंकी चोकमा अन्डरपास निर्माणपछि ट्राफिक व्यवस्थापन सहज भएको छ। त्यसैगरी अन्य चोकहरुमा पनि फ्लाइओभर वा अन्डरपास निर्माणको योजना सडक विभागले अघि सारेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
