काठमाडौं- हाम्रो चाँगुनारायण नगरपालिकाका अधिकांश वडामा कोरोना फैलिसकेको छ। नगरपालिकामा अहिलेसम्म २१ जनामा कोरोना देखिएको छ। संक्रमितमध्ये ४ जना विदेशबाट आउनुभएकोहरू हुनुहुन्थ्यो। त्यस्तै पाइलट, सशस्त्र प्रहरी, गर्भवती महिला, अस्पतालमा बिरामी कुरुवा, पत्रकार, ड्राइभर तथा भिडभाडमा जानेहरुमा कोरोना देखिएको छ। भर्खरै गाइजात्रा मनाउन भिडभाडमा गएकी एक महिलामा समेत कोरोना देखिएको थियो।
पछिल्लोे समय चाहीँ नगरपालिकामा संक्रमितहरु निको हुने क्रम बढेको छ। आइतबारसम्म २१ संक्रमितमध्ये १६ जना निको भइसक्नु भएको छ। बाँकी ५ जना आइसोलेसनमा हुनुहुन्छ। सामान्य अवस्था भएका २ जना होम आइसोलेसनमा हुनुहुन्छ। ३ जना अस्पतालको आइसोलेसनमा हुनुहुन्छ। संक्रमितको सम्पर्कमा आएका व्यक्तिहरुको कारोना परीक्षण गर्दा हालसम्म कोरोना समुदायमा फैलिसकेको भने पाइएको छैन।
समुदायमा कोरोना फैलन नदिन हामीले सचेतनाका कार्यक्रम गरिरहेका छौं। भौतिक दूरीलाई समेत कायम राख्न नगरबासीलाई सुझाएका छौं। माइकिङ गरिरहेका छौं। आधारभूत स्वास्थ्य सामग्रीको उपलब्धतालाई सहज बनाएका छौं।
नगरपालिकाका बिरामीहरू पुर्याउने अधिकांश अस्पतालहरु भरिएको अवस्था छ। जसले गर्दा हामीले भक्तपुर जिल्लाका ४ वटै नगरपालिकाका बिरामीहरू राख्न साझेदारीमा २ सय बेडको आइसोलेसन बनाएका छौं।
अर्थात यसअघिको खरिपाटी क्वारेन्टाइनलाई नै हामीले आइसोलेसनमा परिणत गरेका छौं। यो भरिएपछि हामी आवश्यकताअनुसार थप्दै जान्छौं। कोरोना रोकथामका लागि हामीले सकेजति सबै काम गरिरहेका छौं। कोरोना समुदायमा पुगिसकेको छैन भनेर ढुक्क हुने अवस्था भने छैन। हामी अझ सचेत बन्नुपर्ने बेला आएको छ। सोहीअनुसार अगाडि बढिरहेका छौं।
(मिश्र चाँगुनारायण नगरपालिकाका मेयर हुन्)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1786513116.png)
