काठमाडौं- आइतबार राति पौने १ बजे हुने बायर्न म्युनिक र पिएसजीबीचको च्याम्पियन्स लिग फाइनल खेल तीब्रता, कला र गोलको संयोजन हुनेछ। विश्व उत्कृष्ट टिम र उत्कृष्ट खेलाडीहरुको मेलमा नतिजाको अनुमान सहज नभए पनि फुटबलप्रेमीले राम्रो खेल देख्न पाउनेमा दुविधा छैन।
विश्व फुटबलमा उस्तै दुई टिमको भिडन्त विरलै हुन्छ। हेरौँ कसले बढी गोल गर्नेछ। क्वाटरफाइनलमा बार्सिलोनाले आठ गोल हान्नु अघिदेखि नै बायर्न म्युनिक यो सिजन सबैको रोजाइँमा थियो। नेमार र एमबाप्पे जस्ता गोलकर्ता भएको पिएसजीलाई पनि कमजोर आँक्न सकिने ठाउँ छैन।
पिएसजी यसपटक पहिलो च्याम्पियन्स लिग उपाधिका लागि नजिक छ। अन्तिम १६ को पहिलो लेगमा बोरुसिया डोर्टमुन्डसँग २-१ ले हार्दा पिएसजीको निकै आलोचना भएको थियो। तर दोस्रो लेगको खेलमा २-० ले जित्दै पिएसजी खेलमा फर्कियो। जसमा नेमार र बेर्नाटले गोल गरेका थिए।
त्यस्तै अवस्था क्वाटरफाइनलमा पनि देखियो। एटलान्टासँग पहिलो हाफमा १-० ले पछि परेको पिएसजीले अन्तिम समयमा दुई गोल गर्दै सेमिफाइनल पक्का गरेको थियो। जहाँ माक्विनहस र मोटिङले गोल गरेका थिए। सेमिफाइनलमा पिएसजीले लाइपजिगलाई ३-० ले हरायो। त्यसअघि समूह चरणको खेलमा पिएसजीको लय अझ उत्कृष्ट देखिएको थियो।
पाँच पटक च्याम्पियन्स लिग जितेको बायर्न म्युनिक पाँचै पटक फाइनलमा पुगेर पराजित भएको टिम हो। यो सिजनमा गोलमा राम्ररी बढेको बायर्नलाई कसैले रोक्न सक्ला र जस्तो देखिएको छ। यो सिजन सबै खेल जितेको बायर्नका लागि अब फाइनल खेलमा जे पनि हुन सक्छ भनिने अनुमानबाहेक अरु हिसाबले बलियो देखिन्छ। क्वाटरफाइनलमा बार्सिलोनालाई ८ गोल हानेको बायर्नले सेमिफाइनलमा लियोनलाई ३ गोल हानेको थियो।
यो सिजन बुन्डेस लिगा र जर्मन कपको उपाधि जितेर बढेको बायर्न म्युनिकका लागि अरु टिममा जस्तो डिफेन्स लाइन अघि बढेर खेल्न पिएसजीसँग सहज हुने छैन। एमबाप्पे र नेमारको तीब्रतालाई रोक्न डिफेन्स पोजिसनमा नै रहनुको विकल्प छैन।
बायर्न म्युनिक र पिएसजीबीच यसअघि च्याम्पियन्स लिग समूह चरणमा आठ पटक भेट भएको छ। जसमा पिएसजीले पाँच खेल जितेको छ भने बायर्नले तीन खेल जितेको छ। आइतबार रातिको भेटमा दुवै टिमको अट्याक लाइन बलियो देखिँदा जसले डिफेन्समा कम गल्ती गर्नेछ जित उसैको हुनेछ।
पिएसजी
युइएफएमा स्थान- सातौँ
यो सिजनको अवस्था- खेल १०, जित ८, बराबरी १, हार १, गरेको गोल २५, खाएको गोल ५
अन्तिम १६ को खेलमा- बोरुसिया डोर्टमुन्डलाई ३-२ ले हराएको
क्वाटरफाइनल खेलमा- एटलान्टालाई २-१ ले हराएको
सेमिफाइनलमा- लाइपजिगलाई ३-० ले हराएको
धेरै गोल गर्ने- माउरो इकार्डी र केलियन एमबाप्पे, पाँच गोल
गएको सिजन- अन्तिम १६ बाट बाहिरिएको
युरोपियन प्रतिस्पर्धामा अहिलेसम्मको राम्रो- फाइनल (यही सिजन)
बायर्न म्युनिक
युइएफएमा स्थान- पहिलो
यो सिजनको अवस्था- खेल १०, जित १०, गरेको गोल ४२, खाएको गोल ८
अन्तिम १६ को खेलमा- चेल्सीलाई ७-१ ले हराएको
क्वाटरफाइनलमा- बार्सिलोनालाई ८-२ ले हराएको
सेमिफाइनलमा- लियोनलाई ३-० ले हराएको
धेरै गोल गर्ने- रोबर्ट लेवान्डोस्की, १५ गोल
गएको सिजन- क्वाटरफाइनलबाट बाहिरिएको
युरोपियन प्रतिस्पर्धामा अहिलेसम्मको राम्रो- पाँच पटकको विजेता (पछिल्लोपटक २०१३ मा जितेको)
के भन्छन् प्रशिक्षक?
थोमस टचेल, पिएसजी
उनीहरु निकै राम्ररी बढिरहेका छन्। उनीहरुमा जितको भोक रहेको युवा खेलाडी र अनुभवी खेलाडीको मिश्रण छ। हामीसँग पहिले च्याम्पियन्स लिग जितिसकेका अनुभवी गोलकिपर केलर नाभास छन्, हाम्रोमा एन्जेल डि मारिया र नेमारले पनि जितको अनुभव पाइसकेका छन्। बायर्नले यस्तो खाले फाइनलमा पहिले पनि खेलेको अनुभवले उनीहरु बलियो देखिन सक्छन् तर त्यो नतिजामा फरक पार्ने विशेषता होइन।
हान्स डिएटर फ्लिक्स, बायर्न म्युनिक
हामी फाइनल खेलमा आफूले सक्दो राम्रो गरेर उत्कृष्ट फुटबल खेल्नेछौँ। हामीले आफ्नो शैलीमा रहेर शतप्रतिशत दिन सक्यौँ भने अवश्य पनि जित्नेछौँ। उनीहरुले लिगमा जम्मा पाँच गोल खाएका छन्, त्यसैले उनीहरुको फरवार्ड लाइन जत्तिकै बलियो डिफेन्स लाइन पनि छ। त्यसका लागि हामीसँग विशेष योजना छ, आश गरौँ त्यसले काम गर्नेछ।
सम्भावित सुरुवाती ११
पिएसजी- रिको, केहेरर, सिल्भा, किम्पेम्बे, बेर्नाट, भेराटी, माक्र्विनहस, हेरेरा, डि मारिया, नेमार र एमबाप्पे।
बायर्न म्युनिक- नेउर, किमिच, बोएटेङ, अलाबा, डेभियस, गोर्तेज्का, थियागो, पेरेसिक, मुलर, गानाब्री र लेवान्डोस्की।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772091987.png)
-1772089410.png)
-1764146706.png)
