मापदण्ड नपुगेका एन्टिबडी टेस्टले मानिसमा जोखिम बढाएको भन्दै बेलायती विज्ञहरूको आपत्ति

कोरोना अपडेट

नेपाल लाइभ शुक्रबार, भदौ ५, २०७७ १५:३२

एजेन्सी- दी रोयल कलेज अफ प्याथोलोजिस्टले आफ्ना स्वास्थ्य सचिवलाई एक पत्र लेख्दै बेलायती बजारमा आएका मापदण्ड नपुगेका एन्टिबडी टेस्टले मानिसमा जोखिम निम्त्याएको भन्दै किट वितरण गर्ने नियममा कडाइ गर्न आग्रह गरेका छन्।

पत्रमा यसले गर्दा मानिसलाई दिग्भ्रमित बनाउन सक्ने र व्यक्तिगत रूपमा थप जोखिम बढाउने चेतावनी दिइएको छ।

अहिलेसम्म बेलायतमा घरमा बसेर प्रयोग गर्न मिल्ने कुनै पनि एन्टिबडी टेस्टलाई मान्यता दिइएको छैन तर पनि बजारमा भने यसका धेरै प्रकारहरू उपलब्ध भइरहेका छन्।

विज्ञहरूका अुनसार एक पटक विकास भएको एन्टिबडीले गर्दा अर्कोपटक संक्रमण हुने/नहुने भन्ने विषयमा अहिलेसम्म कुनै तथ्य फेला परेको छैन।

उनीहरूले लेखेको पत्रमा यस विषयमा तुरून्त काम अगाडि बढाउन र यस्ता धन्दा रोक्नका लागि अपिल गरिएको छ। डाक्टरहरूका अनुसार ‘प्रफेसनल ब्यकअप’बिना यस्ता टेस्टहरू प्रयोगमा ल्याउनुहुँदैन। यसरी मानिसमा व्यक्तिगत प्रयोग गर्ने हेतुले ल्याइएका यस्ता टेस्टहरूले सही परिणाम दिनुपर्ने हुन्छ अन्यथा थप जोखिम बढ्ने डाक्टरहरू बताउँछन्।

बेलायतको मेडिसिन एन्ड हेल्थकेयर प्रोडक्ट्स रेगुलेटोरी एजेन्सीले भने ती सबै टेस्टहरू बेलायती सरकारसँगको समन्वयमा बनेको दाबी गरेको छ। तर रोयल कलेज अफ प्याथोलोजिस्टका प्रमुख प्रोफेसर जो मार्टिन भने इन्टरनेटमा उपलब्ध भएका अथवा कुनै बुटिक र पसलहरूबाट किनेका टेस्टहरू प्रयोग गर्न योग्य नभएको बताउँछन्।

यस्ता टेस्टहरूको प्रयोग मानिसमा गर्नाले अझ जोखिम निम्त्याउने भन्दै उनीहरूले यसप्रति आपत्ति जनाएका हुन्।

यूनिभर्सिटी अफ बर्मिङ्गमका बायो स्टाटिक्स विषयका प्रोफेसर तथा लिड रिसर्चर जोन डिक्स यस्ता टेस्टहरू प्रयोगमा आउनुअघि यसमाथि गहिरो अध्ययन अनुसन्धान हुनुपर्ने बताउँछन्। तर अहिलेको जस्तो नियमले मानिसमा झन् भयावह स्थिति ल्याउन सक्ने उनको तर्क छ।

डिपार्टमेन्ट अफ हेल्थ एन्ड सोसल केयरका अनुसार एन्टिबडी टेस्ट क्लिनिकल प्रयोगमा लैजानका लागि निश्चित मापदण्डहरू पुरा गर्नुपर्ने हुन्छ।

यसका अनसार कुनै व्यक्तिलाई घरमै एन्टिबडी परीक्षण गर्नका लागि अहिलेसम्म भएका कुनै पनि टेस्ट मान्यताप्राप्त छैनन्। अहिलेसम्म ४७ हजारभन्दा बडी मापदण्ड नपुर्‍याई बनाइएका यस्ता टेस्टहरूमाथि रोक लगाइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।