काठमाडौंं-सरकारले देशभरका सञ्चालनमा रहेका अधिकांश विमानस्थलमा आर्थिक वर्ष २०७७/०७८ मा झन्डै २ अर्ब रुपैयाँ बराबरको यान्त्रिक उपकरण जडान गर्ने भएको छ।
नेपाल नागरिक उड्डयन प्राधिकरणले चालू आर्थिक वर्षका लागि ल्याएको ४१ अर्ब १० करोड रुपैयाँको बजेटबाट १ अर्ब ८३ करोड ९६ लाख रुपैयाँ बराबरको रकम उपकरण जडान खर्च गर्ने लक्ष्य लिएको छ।
प्राधिकरणले सञ्चालनमा रहको एकमात्रै अन्तर्राष्ट्रिय विमानस्थल त्रिभुवन विमानस्थलदेखि सञ्चालनको तयारीका रहेका विमानस्थलमा हवाई सुरक्षा र यात्रुको सुविधालाई मध्यनजर राख्दै उपकरण जडानको विषयलाई प्रमुख प्राथमिकतामा राखेको छ।
कुन विमानस्थलमा कस्तो उपकरण जडान र कति बजेट?
विराटनगर, राजविराज, थामखर्क, फाप्लु, नेपालगंज, दाङ, रारा, डोटी, साँफेबगर, बलेवा, रुम्जाटार र सिमिकोट विमानस्थलमा एटिसी टावर कन्ट्रोल जडानका लागि ८ करोड रूपैयाँ विनियोजन गरिएकाे छ।
यसैगरी प्राधिकरणले डोटी, साँफेबगर, राजविराज, रुकुम, जनकपुर, सिमरा, बलेवा, रारा, चन्द्रगढी, भरतपुर विमानस्थलमा मौसमी सूचना प्रणाली जडान तथा स्तरोन्नतिका लागि ४ करोड २६ लाख बजेट विनियोजन गरेको प्राधिकरण महानिर्देशक राजन पोखरेलले जानकारी दिए।
प्राधिकरणले निर्माणको काम अन्तिम चरणमा पुगेसँगै सञ्चालनको तयारी भएको गौतम बुद्ध अन्तर्राष्ट्रिय विमानस्थलका लागि यन्त्र तथा उपकरण खरीद तथा जडानका लागि ६० करोड बजेट विनियोजन गरेको छ। साथै प्राधिकरणले गौतम बुद्ध अन्तर्राष्ट्रिय विमानस्थल, चन्द्रगढी, जनकपुर, सिमरा, भरतपुर र धनगढी विमानस्थलमा एक्स-रे खरीद तथा जडानका लागि १४ करोड बजेट विनियोजन गरेको छ।
यसैगरी, काठमाडौं, धनगढी भैरहवा र नेपालगञ्ज विमानस्थलमा एडिएसबी सञ्चालका लागि ३ करोड रूपैयाँ छुट्याइएकाे छ। साथै प्राधिकरणले चालू आर्थिक वर्षमा नै गौतमबुद्ध, लुक्ला, विराटनगर र नेपालगञ्ज विमानस्थलमा इएफएस प्रणालीको उपकरण जडान गर्न १० करोड बजेट विनियोजन गरेको छ। साथै त्रिभुवन अन्तर्राष्ट्रिय विमानस्थलमा सियूपिपिएस र बिआरएस सेवा सञ्चालनका लागि २५ करोड बजेट विनियोजन गरेको छ।
यसैगरी प्राधिकरणले उडान निरीक्षणका लागि आवश्यक उपकरण जडानमा ५ करोड र डाटा सेन्टर स्थापना गर्न ५ करोड रूपैयाँ विनियोजन गरेको छ।
साथै प्राधिकरणाले गौतमबुद्ध अन्तर्राष्ट्रिय विमानस्थलका लागि आवश्यक फायर भेहिकल खरिदका लागि ४१ करोड ४० लाख, त्रिभुवन अन्तर्राष्ट्रिय विमानस्थलमा नयाँ बनेको रिमोट जहाज पार्किङ वेमा लाइट जडानका लागि ३ करोड रूपैयाँ र ब्यागेज ह्यान्डलिङ प्रणाली जडानका लागि ५ करोड ६० लागि रूपैयाँ विनियोजन गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775122347.png)
