काठमाडौं- नेपाल पर्यटन बोर्डका पूर्व प्रमुख कार्यकारी अधिकृत (सिइओ) दिपकराज जोशीले ‘निःशुल्क भिषा र अनिवार्य पिसिआर’ को नीति अवलम्बन गरे बाह्य पर्यटन प्रवर्द्धन गर्न सकिने बताएका छन्।
विश्व नै कोरोनासँग जुधिरहेको भएपनि नेपालका पर्यटकीय गन्तव्य कोरोनाबाट सुरक्षित रहेको सन्देश प्रवाह गर्दै ‘निःशुल्क भिषा र अनिवार्य पिसिआर’को नीति अबलम्बन गरे बाह्य पर्यटन प्रवर्द्धन गर्न सकिने उनको भनाइ छ।
नेपाल सुरक्षित गन्तव्य बनेको सन्देश दिन आन्तरिक पर्यटन खुला गर्नुपर्ने उनको धारणा छ। विदेशबाट आउने व्यक्तिलाई कम्तीमा १४ दिन क्वारेन्टिनमा बस्नैपर्ने नीतिका कारण पर्यटकहरु आउन नचाहेको उल्लेख गर्दै उनले क्वारेन्टाइन नभएर पिसिआरलाई अनवार्य बनाउनुपर्ने बताए।
न्यूज एजेन्सी नेपालसँगको कुराकानीमा उनले विदेशी पर्यटकलाई आफ्ने देशमा नै पिसिआर टेस्ट गर्ने र नेपाल आएपछि पुनः पिसिआर टेस्ट गर्ने प्रावधान राख्नुपर्ने बताए। सात दिन भन्दा बढी बस्नेको हकमा घुम्दाघुम्दैको अवस्थामा पनि पिसिआर परीक्षण गर्ने वातावरण सरकारले निर्माण गर्नुपर्ने उनको भनाइ छ। उनले भिषा शुल्क बापतको रकमले पिसिआर परीक्षण अनिवार्य बनाउन सकेमा बाह्य पर्यटक भित्र्याउन समस्या नहुने उल्लेख गरे।
'सरकारले पर्यटन पुनरुत्थानका लागि छुट्याएको ५० अर्बको कोष तत्काल परिचालन गर्नुपर्नछ। कोषलाई आवश्यक परेको समयमा परिचालन गर्न नसकिए कुनै अर्थ हुँदैन,' उनले भने, '१५/२० दिनभित्रमै यसको परिचालन गर्नसक्नुपर्ने हुन्छ। व्यवसायी र पर्यटन क्षेत्रका कर्मचारीहरु मर्कामा रहेको समयमा कोष परिचालन गर्न सके त्यसले ठूलो अर्थ राख्छ।'
गैरपर्यटन क्षेत्रका व्यक्तिहरुले समेत पर्यटन क्षेत्रमा लगानी बढाइरहेकले रोजगारीका अवसरहरुपनि सिर्जना भइरहेको उनले बताए। देशलाई समृद्ध बनाउन सक्ने क्षेत्र पर्यटन पनि भएकाले यसको विकासका आवश्यक नीति नियम अवलम्बन गर्दै अगाडि बढ्नुपर्ने उनले धारणा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
