काठमाडौं-हवाई सेवा सञ्चालकहरुले भदौ १६ बाट पनि हवाई सेवा सञ्चालन गर्न नदिइए आन्दोलनमा जाने बताएका छन्। निजी क्षेत्रका हवाई सञ्चालकहरुको छाता संगठन वायुसेवा सञ्चालक संघ नेपालले बुधबार एक विज्ञप्ति जारी गरी यस्तो चेतावनी दिएका हुन्।
यसअघि भदौ १ गतेबाट हवाई सेवा सञ्चालन गर्ने भनिए पनि कोरोना संक्रमण वृद्धिका कारण भदौ १५ सम्म बन्द गर्ने सरकारको निर्णयलाई मौन समर्थन गर्दै उनीहरुले त्यसपछि पनि सञ्चालन नभए आन्दोलनमा जाने जनाएका हुन्।
‘आन्तरिक हवाई सेवा उद्योगलाई तत्कालै सञ्चालनमा नल्याउने हो भने सेवा नै बन्द हुन जाने भएकाले भदौ १६ बाट पुनः सञ्चालन नभए बाध्यतावश हामी आन्दोलिन हुने अवस्था सृजना हुन्छ,’ विज्ञप्तिमा भनिएको छ।
नियमित उडान नहुँदा बाढीपहिरो प्रभावित, असक्त बिरामी, सुत्केरीलगायतको उद्धारका समस्या परेको उल्लेख गर्दै उनीहरुले यस उद्योगमा प्रत्यक्षरपरोक्ष आश्रित दशौं हजार श्रमिकको आयस्रोत तथा तिनमा आश्रित परिवारको रोजीरोटी नै बन्द भएको जनाएका छन्। यसबाट हवाई उद्योग नै धरासायी बन्दै गईरहेका उनीहरुको भनाइ छ।
कोभिड-१९ महामारीले विश्वभर नै असर पारिरहेको भए पनि विश्वका सबै राष्ट्रले आन्तरिक वायुसेवा सुचारु गरेको महिनौं भईसकेको सञ्चालकहरुको तर्क छ। हवाईसेवा अत्यावश्यक सेवा भएकाले नागरिकहरुलाई यात्रा सहज गराउनु प्रमुख दायित्व भएको उनीहरुको भनाइ छ।
कोभिड-१९ महामारीका दौरान उडानलाई व्यवस्थित तुल्याउन डब्लुएचओ तथा आइकाओले निर्धारण गरेको मापदण्डलाई मध्यनजर गर्दै उडान संचालनका लागि सम्पूर्ण तयारी पुरा गरेको पनि हवाई सेवा सञ्चालकले जनाएका छ्न।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
