काठमाडौ–पूर्व सूचना तथा सञ्चारमन्त्री मोहनबहादुर बस्नेतका ८४ वर्षीय बाबु खड्गबहादुर बस्नेतको यही साउन २२ गते राति पौने १२ बजे त्रिवि शिक्षण अस्पतालमा निधन भयो। निधनपछि शव अन्तिम संस्कारका बाह्रबिसे लगियाे। बस्नेतका बाबु पञ्चायती शासनविरुद्ध गाउँ जागरणमा सहभागी भएको व्यक्तित्व भएकाले पनि अन्तिम संस्कारमा धेरै मानिस सहभागी भए। बस्नेत हिन्दु परम्पराअनुसार किरियामा बसे।
किरिया कर्म चलिरहेकै समयमा साउन २७ गते स्वर्गीय बस्नेतको स्वाब परीक्षण नतिजा पोजेटिभ आएको खबर शिक्षण अस्पतालबाट आयो। स्वास्थ्य मन्त्रालयले नियमित पत्रकार सम्मेलनमार्फत् पनि जानकारी गरायो।
अस्पतालबाट शव लैजाने समयमै बस्नेतले कोरोना परीक्षण भएकाे बारे र शव लैजान मिल्ने या नमिल्नेबारे जिज्ञासा राखेका थिए। तर मृत्यु भएको रात नै शव लैजान अस्पतालले दबाब दिएको बस्नेत परिवारको दाबी छ।
‘दुवै मिर्गौलामा आएको खराबीका कारण बुबाको मृत्यु साउन २२ गते भएको थियो,’बस्नेतले भने, ‘उपचारमा संलग्न स्वास्थ्य टिमले तुरुन्त शव निकाल्नु भन्दाभन्दै हामीले भोलिपल्ट बिहान ७ बजेमात्र शव निकालेका थियौं।’
शिक्षण अस्पतालमा उपचारका लागि लैजाँदा सुरुमा गरिएको पिसीआर नेगेटिभ देखिएको थियो। पहिला उपचारपछि घरमै आराम गरिरहेका बेला अचानक स्वास्थ्यमा समस्या आएपछि मनमोहन कार्डियो भास्कुलर तथा ट्रान्सप्लान्ट सेन्टरको आइसीयुमा भर्ना गरिएको बस्नेतले बताए। त्यहाँ डाक्टरहरुको टिमले दुवै किड्नी ड्यामेज भएकाले मृत्यु भएको जानकारी गराएका थिए।
‘अस्पतालले नै हामीलाई लैजान अनुमति दिएपछि हामीले अन्तिम संस्कारका लागि बाह्रविसे ल्याएका हौं,’ बस्नेतले भने, ‘दुवै किड्नी ड्यामेज भएको कारणले मृत्यु भएको जानकारीपछि दाहासंस्कारमा धेरै शुभचिन्तकहरुको सहभागिता थियो तर मृत्यु भएको ६ घण्टामा आउने रिपोर्ट एक सातापछि कोरोना लागेर मृत्यु भएको स्वास्थ्य मन्त्रालयबाट समाचार सम्प्रेषण हुन्छ भने यसमा मेरो कुनै कमजोरी छैन।’
स्वास्थ्य मन्त्रालयले नियमित पत्रकार सम्मेलनमा बाह्रबिसेका ८४ वर्षीय पुरुषको कोरोना संक्रमणले मृत्यु भएको बताएको थियो।
अस्पताल स्रोतले कोरोना परीक्षणको रिपोर्ट नआउँदै शव लगेको बताएपछि मृतकको परिवारकातर्फबाट बस्नेतले सामाजिक सञ्जालमार्फत् घटना विवरण सार्वजनिक गरेका हुन्।
बाह्रबिसे नगरपालिका शिल गरियो, परिवारको स्वाव संकलन, अन्यको पनि संकलन गरिँदै
कोरोना पुष्टि भएको घटनाले दाहसंस्कारमा गएका नातागोता, आफन्त र शुभचिन्तक पनि अन्योलमा परेका छन्। बाह्रबिसे नगरपालिकाले नगरका केही वडा र क्षेत्रलाई सिल गरेको सूचना सार्वजनिक गरेको छ। वुधबारबाट कन्ट्याक्ट ट्रेसिङ गरी स्वाब संकलन गरिने भएको छ।
मंगलबार स्वास्थ्य कार्यालयअन्तर्गत द्रुत प्रतिकार्य टोलीको आकस्मिक बैठक बसी मृतकको सम्पर्कमा आएका व्यक्तिको खोजपड्तालको कार्य अघि बढाइसकेको स्वास्थ्य कार्यालयका प्रमुख दुर्गादत्त चापागाईंले जानकारी दिए।
चापागाईका अनुसार सुरुमा शवलाई प्रत्यक्ष छोएका मानिसहरुको स्वाब संकलन गरिएको छ। पहिलो चरणमा शव काठमाडौंबाट बाह्रबिसे ल्याउँदा र त्यहाँ दाहसस्कारको समयमा प्रत्यक्ष छोएकाहरुको कन्ट्याक्ट ट्रेसिङ गरी स्वाब संकलन गरिने उनले बताए।
प्रत्यक्ष सम्पर्क भएका व्यक्हिरुमा कोरोना संक्रमण देखिएमात्रै अन्य व्यक्तिहरुको स्वाब संकलन गरिने चापागाइैंले बताए।
उपमेयर सुशीला पाख्रिनले पहिलो चरणमा बुधबार मृतकको प्रत्यक्ष सम्पर्कमा रहेका परिवारका सदस्यहरुको स्वाब संकलन कार्य भएको र पहिलो चरणको रिपोर्टका आधारमा दोस्रो चरणको संकलन हुने भएकाले रिपोर्ट आउने समयसम्म धैर्य गरिदिन आग्रह गरिन्।
‘त्यसदिन दाहसंस्कार र समवेदना प्रकट गर्न जानु हुनेहरुको कन्ट्याक्ट ट्रेसिङका आधारमा स्वाब संकलन हुने भएकाले मृत्यु संस्कारमा र समवेदना प्रकट गर्न जानुहुने सबैलाई संयमित भई सुरक्षित साथ घरैमा होम क्वारेन्टाइनमा बसिदिनु हुन आग्रह गर्छु,’ उनले भनेकी छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।