मोटरसाइकललाई ठक्कर दिने बा १ झ ९२५० नम्बरको सरकारी गाडी र जिल्ला प्रहरी कार्यालय धनगढी।
धनगढी-कैलालीमा भएका दुई वटा भिआइपी सवारी दुर्घटनामा प्रहरीको भूमिका दोहोरो देखिएको छ। एउटा सवारी दुर्घटनामा सुदूरपश्चिम प्रदेश सभा सदस्य अम्बिकाकुमारी थापा घाइते भइन् भने अर्को दुर्घटनामा सभामुख अर्जुनबहादुर थापाका छोराले चलाएको गाडीका कारण एक स्थानीय गम्भीर घाइते भए।
तर, प्रदेश सभा सदस्य थापा सवार मोटरसाइकललाई ठक्कर दिने चालकलाई प्रहरीले पक्राउ ग¥यो भने सभामुख थापाका छोरा देवेन्द्रलाई संरक्षणमात्र गरेन घटनालाई लुकाउने प्रयाससमेत गर्यो। झण्डै एक सातापछिमात्र देवेन्द्र सवार गाडीले मोटरसाइकललाई ठक्कर दिएको घटना बाहिरियो ।
साउन १७ गते (शनिबार) बा १ झ ९२५० नम्बरको सरकारी गाडीले एउटा मोटरसाइकललाई ठक्कर दियो। पूर्वपश्चिम राजमार्गअन्तर्गत लम्कीचुहा नगरपालिका वडा नम्बर ६ मा बा ३२ प ६४५३ नम्बरको मोटरसाइकललाई ठक्कर दिएपछि चालक बर्दगोरिया गाउँपालिका ४ का अन्दाजी ३३ वर्षीय सिद्ध जयगढी घाइते भए । स्थानीय अस्पतालमा उपचार सम्भव नभएपछि उनलाई नेपालगञ्ज रेफर गरियो । उनको अहिले पनि नेपालगञ्जमै उपचार भइरहेको छ। दुर्घटनालगत्तै गाडी घटनास्थलमै छोडेर सवार व्यक्तिहरु भागेका थिए। मोटरसाइकललाई ठक्कर दिने सो गाडी जिल्ला प्रशासन कार्यालय बझाङको थियो।
‘बझाङका सहायक प्रमुख जिल्ला अधिकारी र अनुसन्धानका डीएसपी पनि जिल्ला प्रशासन कार्यालयको गाडीमा सवार थिए । उनीहरु चिसापानी घुम्न गएका थिए,’ प्रहरी स्रोतले भन्यो ‘सो गाडी सभामुख थापाका छोरा देवेन्द्रले चलाइरहेका थिए।’
प्रहरीले उनलाई अहिलेसम्म पक्राउ गरेको छैन। उल्टै प्रमाण मेटाउने प्रयास गरिएको स्रोतले बतायो। जिल्ला प्रहरी कार्यालय कैलालीले भने दुवै पक्षबीच समझदारी भएको दाबी गरेको छ। जिल्ला प्रहरी कार्यालयका सहप्रवक्ता प्रहरी निरीक्षक हिक्मत थापाले घाइतेको उपचारका लाग्ने सम्पूर्ण खर्च व्यहोर्ने सहमति भएको बताए।
सोही दिन धनगढीमा अर्को सवारी दुर्घटना भएको थियो । दुर्घटनामा सुदूरपश्चिम प्रदेश सभाकी सदस्य अम्बिका थापा गम्भीर घाइते भइन् । उनको सुरुमा माया मेट्रो अस्पताल धनगढीमै उपचार भयो। टाउकोमा चोट लागेको भन्दै सोही राति १० बजे स्काई ट्रकमार्फत् उनलाई काठमाडौँ लगियो । धनगढी उपमहानगरपालिका ७ मोतीचोक बस्ने २८ वर्षीय लोकबहादुर बोहराले चलाएको मोटरसाइकलले थापा सवार मोटरसाइकललाई ठक्कर दिएको आरोप थियो ।
सोही आशंकामा बोहरालाई आईतबार कैलाली प्रहरीले पक्राउ गर्यो। ‘प्रदेश सासंद थापा पक्षले सम्पूर्ण उपचार खर्चसँगै स्काई ट्रकको भाडासमेत दिनुपर्ने अडान राखेका थिए,’ बोहराका बुवा मेयरसिंह बोहराले भने, ‘हामी गरिबले स्काई ट्रकको भाडा कसरी तिर्न सक्थ्यौं, हामीले स्काई ट्रकमा लैजानु पनि भनेका थिएनौँ । अहिले सम्पूर्ण उपचार खर्च बेहोर्ने सहमति भएको छ ।’
उनले प्रदेश सासंद थापाको उपचारका लागि ४७ हजार पठाइसकेको बताए । ‘फेरि उपचार खर्च माग्नका लागि फोन आउन थालिसकेको छ। अझै लाखौँ रकम खर्च हुने भनिएको छ । कसरी जोहो गर्ने होला ?’ बोहराले भने।
मानवअधिकारवादीहरुले कानुन सबैका लागि समान हुनुपर्ने धारणा राखेका छन्। ‘कानुन सबैका लागि समान हुनुपर्छ। जो सुकै भए पनि कानुनको दायरामा ल्याउनुपर्छ,’ राष्ट्रिय मानवअधिकार आयोग सुदूरपश्चिम प्रदेश कार्यालयका प्रमुख झंकरबहादुर रावलले भने, ‘घटनाको अनुसन्धान गर्ने फरक पाटो हो तर, दोहोरो भूमिका हुनुहुँदैन । एकै प्रवृत्तिका घटनामा कसैलाई पनि विभेद गर्नुहुँदैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
