कोरोना अपडेट

विश्वमा सवा करोडभन्दा बढी मानिस काेराेना संक्रमण मुक्त

नेपाल लाइभ शनिबार, साउन २४, २०७७ १३:३४

काठमाडाैं- विश्वमा एक करोड २५ लाख ५० हजार ६३१ जना कोरोना भाइरसकाे संक्रमणबाट मुक्त भएका विश्व स्वास्थ्य संगठन (डब्लुएचओ)ले शनिबार जाकारी दिएको छ। कोरोना संक्रमणको कारण विश्वभरी सात लाख २४ हजार १८६ जनाको मृत्यु भएको संगठनले जनाएकाे छ।

संगठनका अनुसार शनिबारसम्म विश्वभरमा एक करोड ९५ लाख ४९ हजार ९०१ जनामा कोरोनाकाे संक्रमण देखिएकाे छ। तीमध्ये एक करोड २५ लाख ५० हजार ६३१ संक्रमण मुक्त भएका हुन्।

विश्वभर हाल ६२ लाख ७५ हजार ८४ व्यक्ति कोरोना संक्रमित रहेका र उनीहरुको उपचार भइरहेको छ। संक्रमितमध्ये ६४ हजार ९९४ जनाको अवस्था गम्भीर रहेको जनाइएको छ।

काेराेनाबाट अमेरिका सबैभन्दा बढी प्रभावित भएको छ। डब्लुएचओका अनुसार अमेरिकामा मात्र ५० लाख ९५ हजार ७४८ जना कोरोना संक्रमित रहेका छन्। याे महामारीका कारण अमेरिकामा एक लाख ६४ हजार १०४ व्यक्तिको मृत्यु भइसकेको बताइएको छ।

युरोपमा ३० लाख १० हजार ५१० जना कोरोना भाइरस संक्रमित रहेका छन् भने दुई लाख ५ हजार ६४५ को मृत्यु भएको छ। एसिया ४८ लाख ६८ हजार ७४६ जनामा कोरोना भाइरस संक्रमण रहेको छ भने एक लाख ६ हजार ७४२ जनाको मृत्यु भएको छ।