काठमाडौं– निजी हवाई सेवा प्रदायक कम्पनी बुद्ध एयरले कोभिड–१९ को संक्रमण फैलान नदिन भन्दै यात्रुको पहिचानका लागि एकद्वार प्रणाली लागू गर्ने भएको छ। साथै बुद्ध एयरले आन्तरिक उडानको भाडादरसमेत घटाएको छ।
कोभिड–१९ पछि यात्रुलाई थप भार पर्न नदिने गरी एयरलाइन्सले सुरुवाती भाडा तय गरको हाे।
यस्तो छ सुरुवाती भाडादर
विराटनगर– रु ३,०००/-
भैरहवा– रु २७००/-
नेपालगञ्ज– रु ४२००/-
पोखरा– रु १९००/-
भद्रपुर– रु ३४००/-
जनकपुर– रु २७००/-
धनगढी– रु ५४००/-
आन्तरिक वायुसेवा अति आवश्यक सेवाअन्तर्गत पर्दछ। कोभिड–१९ को महामारीको अवस्थामा पनि अति आवश्यक कारणले सर्वसाधारणहरु काठमाडौं तथा अन्यत्र आउजाउ गर्न नपाइरहेको अवस्थामा बुद्धले आफ्नो धारणासमेत सार्वजनिक गरेको छ।
बुद्ध एयरको धारणाः
हाल आन्तरिक वायु सेवा बन्द गरिएको अवस्थामा सर्वसाधारणहरु यात्राका लागि तरकारी भ्यान, एम्बुलेन्स, ट्रक, बसमा कोचिएर मात्रै हैन, दशौं हजार रुपैयाँ खर्च गर्न बाध्य छन्। घण्टाभरमै यात्रा गर्न सक्नेमा केही दिन लगाएर यात्रा गरिरहेका छन्।
यस्ता यात्रुहरुलाई राज्यले यात्रा गर्नबाट रोक्नु भनेको मौलिक अधिकारको हनन् गर्नु हो। तसर्थ यात्रालाई सहज बनाउँदै कोभिड–१९ को चेकजाँचको दायरा फराकिलो बनाउनु राज्यको दायित्व हो।
संक्रमित व्यक्तिसँग असुरक्षित तवरले घण्टौ यात्रा गर्दा संक्रमण फैलिनु स्वभाविक हो। पछिल्लो समयमा काठमाडौं उपत्यका तथा देशभित्र दिनहुँ संक्रमित बढ्नुमा यो नै मुख्य कारण हो।
बुद्ध एयरले कोभिड–१९ विरुद्ध सुरक्षा निर्देशिका बनाई पूर्व अभ्यास गरिरहेको छ। हरेक उडान अगाडि जहाज, ब्यागेज ट्रली, कार्यस्थलको संक्रमणरहित सरसफाई, कर्मचारीहरुलाई सुरक्षा तालिम, तथा पिपिई प्रदान गरिसकेको छ।
संक्रमणरहित हवाई यात्राका लागि हामी प्रतिबद्ध छौं। यसका लागि हरेक यात्रुको कोभिडसँग मिल्दोजुल्दो लक्षण पहिचान, दोहरो तापक्रम चेकजाँच, ह्याण्ड सेनिटाइज तथा फेशशिल्डको प्रयोग अनिवार्य बनाएको छौं। विदेशमा पनि यसैगरी आन्तरिक तथा अन्तर्राष्ट्रिय उडान सुचारु भइसकेको छ।
यस विषम् परिस्थितिमा हरेक नेपालीले सजिलै र सस्तो हवाई यात्रा गरुन् भन्ने उद्देश्यले हामी भदौ १ देखि हुने हवाई उडानका लागि भाडादर पनि न्यून तोकेका छौं।
हवाई यात्रामा हरेक यात्रुलाई पहिचान गर्न हामीले एकद्वार प्रणाली अपनाएका र्छौं, जसअनुसार कम्प्युटर सिस्टम पनि अपडेट गरिएको छ। यसले महामारी रोकथामको लागि गर्नुपर्ने परीक्षण, पहिचान र कन्ट्याक्ट ट्रेसिङ कम्प्यूटर सिस्टमबाट केही क्षणमै राज्यलाई उपलब्ध गराउने छौं। यसबाट महामारी समुदायमा फैलिनबाट रोक्न मद्दत पुग्नेछ भने देशको अर्थतन्त्र पनि चलायमान हुनेछ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।