जब संसदीय टोली बाढी प्रभावित क्षेत्रमा नगई होटलतिर सोेझियो...

समाचार

शेरबहादुर ऐर बिहीबार, साउन २२, २०७७ ०९:५७

धनगढी-सुदूरपश्चिम प्रदेश सभाको अर्थ विकास तथा प्राकृतिक स्रोत समितिको टोलीले बुधबार कैलालीको बाढी प्रभावित क्षेत्रको स्थलगत अनुगमन गर्ने कार्यक्रम रहेको थियो। बाढीबाट अति प्रभावित दक्षिणपूर्वी क्षेत्रका स्थानीय आफ्ना समस्या बताउन टोलीका सदस्यलाई कुरिरहेका थिए।

टोली आउने जानकारी पाएपछि भजनी नगरपालिका ८ छछरवाका स्थानीय वीरबहादुर चौधरी टोलीलाई मार्ग देखाउन सडकमै कुरिरहेका थिए। समितिको टोलीमा प्रमुख प्रतिपक्षी दल नेपाली काँग्रेस संसदीय दलका नेता रणबहादुर रावल पनि थिए।

वीरबहादुरले टोलीलाई सडकमै रोक्ने प्रयास गरे। तर, गाडी नरोकिई अघि बढ्यो। सभापति हर्कबहादुर कुँवर नेतृत्वमा रहेको गाडी अलि अगाडि त रोकियो, तर फर्किएन। केही पछि थियो नेता रावलको गाडी। उनले स्थानीयको इसारा हेरेपछि रोकेर वीरबहादुरको मोटरसाइकल पछाडि आफनो गाडी लगे। तर, प्राकृतिक स्रोत समितिको टोली भने अति प्रभावित क्षेत्रमा नपुगि भजनी नगरपालिका १ स्थित होटल मोनिस्कामा आयोजित कार्यक्रममा सहभागी भयो, पीडित जनताका कुरै सुनेन।

टोलीमा सहभागी एक प्रदेश सभा सदस्यले भने, ‘हामी यहाँ जनताका समस्या बुझ्न आएका हौं तर, टोली भने यस्ता विषयमा गम्भीर नभइ राजनीति गर्न लाग्यो ।’

उनले टोलीको कार्यशैलीप्रति असन्तुष्टि व्यक्त गर्दै अति प्रभावित क्षेत्रका समस्या तथा समाधानको उपायका लागि स्थलगत अनुगमन गर्नुपर्नेमा राजनीतिक भाषण र कार्यकर्तामा व्यस्त भएको आरोप लगाए।

उनका अनुसार बाढीबाट भजनी नगरपालिका ८ अति प्रभावित क्षेत्र थियो । वडा नम्बर ८ को छछरवा, जनकपुर, दैलेखी टोल, सोनाफाटालगायतका क्षेत्रमा आठ दिन अघि आएको बाढीले प्रभाव पारेको थियो। सोही बाढीमा परि वडा नम्बर ८ जनकपुरका १० वर्षीय इज्केल चौधरी, ३३ वर्षीय चक्रबहादुर विक र काँडाढिकका ४० वर्षीय इश्वर शाहको मृत्यु भएको थियो।

सो टोलीले भजनीको कार्यक्रम सकेपछि भजनी नगरपालिका ३ को कुसुमघाट क्षेत्रमा कान्द्रा नदीले प्रभाव पारेको बारे स्थलगत निरीक्षण गरेको थियो। टोलीका ती सदस्यले भने, ‘सभापतिलाई पूर्व सामाजिक विकासमन्त्री तथा प्रदेश सभा सदस्य दीर्घबहादुर सोडारीले अल्झाए।’ उनले सभापतिलाई भजनी ८ मा जाउँभन्दा सोडारीले दबाब दिएर कार्यक्रममा लगेको बताए।

यसअघि धनगढीबाट टोली निस्कँदा सोडारीले आफनो निर्वाचन क्षेत्रका केही वडाहरुमा टोलीलाई व्यस्त बनाएका थिए। ती सदस्यका अनुसार टोलीको मुख्यतः टीकापुर, भजनी नगरपालिका, जोशीपुर र जानकी गाउँपालिकाको बाढी प्रभावित क्षेत्रको स्थलगत निरीक्षण गर्ने कार्यक्रम थियो । टोलीमा भौतिक पूर्वाधार मन्त्रालयमातहतको ऊर्जा तथा जलस्रोत महाशाखाका विज्ञ टोलीको पनि सहभागिता रहेको थियो।

समितिका सभापति हर्क कुँवरले वडा नम्बर ८ को स्थलगत निरीक्षण नगरे पनि उनी टीकापुर क्षेत्रको निरीक्षण गर्न नेता रावललाई हुलाकी सडकमा कुरिरहेका थिए । सभापतिसँगै रहेका अन्य प्रदेश सभा सदस्यहरु भने त्यहाँबाट फर्केर घोडाघोडीमा भोजभतेरमा व्यस्त भएको एक सदस्यले जानकारी दिए ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।