काठमाडौं–कोरोना संक्रमण बढेपछि सरकारले आजदेखि सार्वजनिक तथा निजी सवारी साधनमा जोरबिजोर प्रणाली लागू गरेको छ।
गृहमन्त्रालयले बुधबार विज्ञप्ति जारी गर्दै काठमाडौं उपत्यका र कोभिड–१९ को २ सयभन्दा बढी सक्रिय संक्रमण केश भएका जिल्लामा अत्यावश्यक सेवाबाहेकका सार्वजनिक तथा निजी सवारीसाधनमा बिहीबारदेखि लागू हुने गरी जोरबिजोर प्रणाली लागू गर्ने निर्णय गरिएको जनाएको हो।
हाल काठमाडौं उपत्यकासहित कैलाली, पर्सा, रौतहट र महोत्तरीमा दुई सयभन्दा बढी सक्रिय संक्रमित छन्।
कोरोना संक्रमण न्यूनीकरण गर्न यसअघि पनि जोरबिजोर प्रणाली लागू गरिएकोमा साउनबाट हटाइएको थियो।
यस्तै, २ सयभन्दा बढी कोरोना संक्रमित देखिएका जिल्लाका सहरी इलाकामा जिल्लाभित्रसमेत बेलुका ९ बजेदेखि बिहान ५ बजेसम्म आवतजावत बन्द गर्ने गृहमन्त्रालयले जनाएको छ।
यसैगरी, काठमाडौं उपत्यका प्रवेश गर्ने अत्यावश्यक ढुवानी बाहेकका अन्य सबै यात्रुवाहक सवारी साधनलाई बेलुका ७ बजदेखि बिहान ७ बजेसम्म आवागमन निषेध गरिएको व्यवस्थालाई कडाइका साथ लागू गरिने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
