काेराेनाकाे संक्रमण बढेपछि दक्षिण अफ्रिकाका शिक्षण संस्थाहरु बन्द

कोरोना अपडेट

नेपाल लाइभ सोमबार, साउन १९, २०७७ ०९:०९

जोहानेस्बर्ग- दक्षिण अफ्रिकाका विद्यालय तथा क्याम्पससहित सम्पूर्ण शिक्षण संस्थाहरु बन्द भएका छन्। कोरोना महामारीको संक्रमण बढ्दो रुपमा देखिएका कारण दक्षिण अफ्रिकी सरकारले यहाँका विद्यालय, विश्वविद्यालय तथा सम्पूर्ण शिक्षण संस्थाहरु बन्द गर्ने घोषणा यसअघि नै गरेको थियो।

दक्षिण अफ्रिकामा कोरोना भाइरसको महामारी पछिल्लो समयमा निकै बढ्दै गएको छ। सोही कारण यहाँका विद्यालय तथा विश्वविद्यालयहरु बन्द गरिएको शिक्षा मन्त्रालयले जनाएको छ। यही जुलाई २७ तारिखदेखि यहाँका विद्यालयहरु बन्द भएका हुन्। यो बन्द आगामी अगष्ट महिनाको अन्त्यसम्म नै कायम रहने अधिकारीहरुले जनाएका छन्। सोसम्बन्धी आदेश दक्षिण अफ्रिकाका राष्ट्रपति सिरिल रामाफोसाले दिएका थिए।

दक्षिण अफ्रिकामा जुलाई १२ यता देखिको तथ्यांकमा हेर्दा कोरोना भाइरस ठूलो संख्यामा संक्रमण देखिएको बताइएको छ। यहाँ आजसम्ममा ५ लाख ११ हजारभन्दा बढीमा यो संक्रमण फैलिएको पाइएको छ। त्यसैगरी यहाँ ८ हजारभन्दा बढी व्यक्तिको मृत्यु भएको छ।

पछिल्ला दिनहरुमा निकै ठूलो संख्यामा संक्रमण बढ्दै गएको देखिएकोले शिक्षण संस्थाहरु बन्द गर्नुका साथै अरु विभिन्न नियन्त्रणका उपायहरु अपनाइएको स्वास्थ्य अधिकारीहरुले जनाएका छन्।
(रासस-एएनआई)

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।