काठमाडौं-कोरोना संक्रमण सुरु हुँदै गर्दा सरकारले २०७६ चैत ११ गतेदेखि लकडाउन घोषणा गर्यो। सबैले ठानेका थिए–लकडाउन एक महिनासम्म होला। तर लकडाउन तीन महिनासम्म भएपछि खोल्नुपर्ने जनदबाब सुरु भयो। सर्वोच्च अदालतको आदेशका कारण पनि सरकारी खातामा पनि राजश्व बन्द हुने अवस्था सिर्जना भयो।
चौतर्फी दबाब र राजश्व असुलीमा समस्या भएपछि केन्द्र सरकारले साउन १० गते लकडाउन समाप्त भएको घोषणा गर्यो। जिल्लाभित्र मात्र सार्वजनिक यातायात चल्न सक्ने र अन्तर जिल्ला भदौ १ गतेपछि मात्र खोल्ने निर्णय सरकारले गर्यो। तर, सरकारको उक्त निर्णयलाई चुनौती दिँदै अहिले स्थानीय तहहरुले धमाधम लकडाउन सुरु गरेका छन्।
स्थानीयस्तरमा कोरोना संक्रमणको दर बढेपछि स्थानीय सरकारहरुले अत्यावश्यकीय सेवावाहेक अन्य सेवा बन्द गर्ने निर्णय गर्न थालेका छन्। हालसम्म वीरगञ्ज, विराटनगर, राजविराज नगरपालिका र सप्तरीका दुई स्थानीय तहले मंगलबारदेखि लागू हुने गरि सूचना जारी गरेका छन्।
वीरगञ्जले एक वडा र टोलका व्यक्तिहरु कुनै पनि बहानामा अर्को वडामा जानसमेत रोक लगाएको छ। किराना पसलहरु बिहान ११ बजे देखि दिउँसो ३ बजे सम्म खुल्ने, दुध पसल बिहान ५ बजे देखि दिउँसो ३ बजेसम्म खुल्ने, तरकारी पसल बिहान ५ बजेदेखि बिहान ९ बजेसम्म खुल्ने र तरकारी पसलहरु खुल्ला ठाउँमा र ठेलामा संचालन गर्न नपाइने निर्णय गरिएको छ।
तरकारीको बिक्रीवितरण पसल र सटरहरुबाट मात्र वा वडाध्यक्षले निर्धारण गरेको ठाउँबाट मात्र संचालन गर्न पाइने सूचनामा उल्लेख गरिएको छ।
त्यस्तै विराटनगर महानगरले पनि कोरोना संक्रमितको संख्या बढेको भन्दै साउन ११ गतेदेखि अत्यावश्यकीय कामबाहेक अन्यका लागि बाहिर ननिस्कन भनेको छ। स्वास्थ्य, वारुणयन्त्र, सरसफाइ र एम्वुलेन्सबाहेक अन्यलाई नगरपालिकाले रोक लगाएको छ।
त्यसैगरी सप्तरीका स्थानीय तहले कामकाज बन्द गर्दै लकडाउन गर्ने निर्णय गरेका छन्। कोरोना संक्रमण (कोभिड १९) को जोखिम बढेको भन्दै मंगलबारदेखि राजगढ र अग्नीसाइर कृष्णसवरन गाउँपालिकाले अनिश्चितकालका लागि सार्वजनिक सेवाहरु बन्द गरेका छन्।
अग्नीसाइर कृष्णसवरण गाउँपालिकाका प्रमुख प्रशासकीय अधिकृत धिरेन्द्रकुमार यादवले एक विज्ञप्ति जारी गरी समुदाय स्तरमा कोरोना संक्रमण फैलिन सक्ने उच्च जोखिम रहेकाले गाउँपालिका र वडा कार्यालयबाट प्रवाह हुने सेवा बन्द गरेको जनाए।
अति आवश्यक स्वास्थ्य सेवा बाहेकका अन्य सेवा बन्द गरिएको जानकारी दिँदै यादवले हाटबजार नलगाउन, गोष्ठी-सेमिनार नगर्न, भीडभाड नगर्न, पसल, व्यापार, व्यवसाय, सरकारी, गैरसरकारी र वित्तीय संस्था सञ्चालन नगर्न, नगराउन तथा अनावश्यक रुपमा घर बाहिर ननिस्किन विज्ञप्तिमार्फत अनुरोध गरेका छन्।
अत्यावश्यक कामका लागि निस्किनु परेमा मास्क अनिवार्य प्रयोग गर्न, सामाजिक दूरी कायम गर्न पनि सो विज्ञप्तिमा अनुरोध गरिएको छ। राजगढ गाउँपालिकाले पनि मंगलबारदेखि गाउँपालिकाको अत्यावश्यक सेवाबाहेक सबै सेवा बन्द गरेको छ। विश्वव्यापी रुपमा फैलिरहेको कोरोना संक्रमण समुदायमा फैलिने सम्भावनालाई मध्यनजर गर्दै उच्च जोखिम न्यूनीकरणका लागि गाउँपालिका र वडा कार्यालय समेतबाट प्रवाह हुने सार्वजनिक सेवा बन्द गरिएको सूचना जारी गरिएको छ।
रुपनी गाउँपालिकाले पनि कामकाज ठप्प गरेको छ। राजविराजमा कोरोना संक्रमण समुदायस्तरमा फैलिएको भन्दै राजविराज नगरपालिकाले एक साताअघि मंगलबार लकडाउन कडा गर्ने निर्णय गरेको थियो।
राजविराज नगरपालिका–६ का ७३ वर्षीय कोरोना संक्रमित व्यापारीको मृत्युपछि ‘कन्याक्ट र ट्रेसिङ’ गर्दै जाँदा परिवारका पाँचजना सदस्य, उनको घर, पसल र कलेजका कामदार, छिमेकी तथा उनीहरुको परिवारमा समेत कोरोना पुष्टि भएको थियो। योसँगै राजविराज नगरपालिकाले बुधबारदेखि लकडाउन पूर्ण पालना गर्न र गराउने निर्णय गरेको हो।
बिहीबारदेखि लागू हुनेगरी जिल्ला सुरक्षा समितिको बैठकले राजविराज नगर क्षेत्रभित्र जारी गरेको निषेधाज्ञा कायम राखेको छ। समुदायमा कोरोना फैलिएको भन्दै ट्रयाकिङ र ट्रेसिङका आधारमा पिसीआर परीक्षण गर्दा संक्रमितको सख्या बढेर ४ सय ६२ पुगेको छ।
भारतबाट आइ मृत्यु भएका कोरोना संक्रमित राजविराज–६ का ७३ वर्षीय व्यापारीको सम्पर्कमा आएका थप दुईजनामा पनि संक्रमण देखिएको छ। राजविराज नगरपालिका ३ का २४ वर्षीय र वडा नम्बर ८ का २७ वर्षीय पुरुषमा कोरोना संक्रमण देखिएको हो।
बलान बिहुल गाउँपालिका– १ का २६ वर्षीय, वडा नम्बर–२ का २० वर्षीय, वडा नम्बर–३ का ४, १० र २० वर्षीय, वडा नम्बर–४ का २३ र ३५ वर्षीय पुरुषमा कोरोना संक्रमण पुष्टि भएको स्वास्थ्य कार्यालयले जनाएको छ।
सप्तरीमा आइतबार दिउँसो सातजना र राति पुनः १३ जनामा कोरोना संक्रमण पुष्टि भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
