काठमाडौं- नेपाल नागरिक उड्डयन प्राधिकरकणको चालू आर्थिक वर्ष २०७७/०७८ को बजेट घट्ने भएको छ। प्राधिकरणले चालू आर्थिक वर्षका बजेट गत आवको भन्दा झन्डै ६ अर्ब रुपैयाँ कम हुनेगरी ल्याउन लागेको छ। गत आर्थिक वर्ष प्राधिकरणले ४६ अर्ब ९६ करोड रुपैयाँ बराबरको बजेट ल्याएको थियो।
तर, यो वर्ष कोरोनाका कारण प्राधिकरणको आम्दानी घटेको भन्दै बजेट पनि कम ल्याउन लागेको हो। प्राधिकरणले तयार पारेको बजेट तथा कार्याक्रम अब बस्ने प्राधिकरणको बोर्ड बैठकबाट पारित गर्ने तयारी भएको छ।
प्राधिकरणले चालू आवको बजेट तथा कार्यक्रमहरु तयार पारेको छ। प्राधिकरणले निर्माणमा रहेको राष्ट्रिय गौरवको आयोजनाअन्तर्गत रहेको विमानस्थललाई प्रमुख प्राथमिकतामा राखेर बजेट ल्याउने तयारी गरेको छ।
नागरिक उड्डयन क्षेत्रको नियमक र सेवा प्रदायक कम्पनी प्राधिकरणले चालू आवको लागि झन्डै ४१ अर्ब रुपैयाँ बराबरको बजेट रहनेगरी कार्यक्रम तय गरेको प्राधिकरण स्रोतले जानकारी दिएको छ।
‘चालू आवका लागि प्राधिकरणले तय गरेको बजेट गत आवको भन्दा झन्डै ६अर्बले कम छ,’ प्राधिकरण स्रोतले भन्यो, ‘नयाँ कार्यक्रमभन्दा पनि पुरानै कार्यक्रमलाई पहिलो प्राथमिकतामा राखेर बजेट तयार भएको छ।’
प्राधिकरणले गौतम बुद्ध अन्तर्राष्ट्रिय विमानस्थल र पोखरा विमानस्थललाई प्रमुख प्राथमिकतामा राखेर बजेट तयार पारेको स्रोतको भनाइ छ।
यसबाहेक प्राधिकरणले देशभरका विमानस्थल विस्तार, विकास तथा स्तरोन्नतिका लागि पनि बजेट छुट्याएको छ। साथै राजनीति दबाबमा निर्माण गर्न लागिएको काभ्र विमानस्थललाई पनि केही बजेट छुटाएको स्रोतको दाबी छ।
प्राधिकरणले नेकपा अध्यक्ष तथा पूर्व प्रधानमन्त्री पुष्पकमल दाहाल प्रचण्डको दबाबमा विस्तार हुने लागको चितवनको भरतपुर विमानस्थललाई पनि प्राथमिकतामा राखेर बजेट छुट्याएको प्राधिकरण स्रोतको भनाइ छ।
अर्थमन्त्री युवराज खतिवडाले चालू आर्थिक वर्षको बजेट ल्याउँदै गर्दा समग्र नागरिक उड्डयन क्षेत्रको विकासलाई १९ अर्ब ६० करोड रुपैयाँ विनियोजन गरेको थियो।
उक्त बजेटलाई समेत समावेश गर्दै प्राधिकरणले आन्तरिक स्रोतबाट थप गर्दै ४१ अर्ब रुपैयाँ बराबरको बजेट ल्याउन लागको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
