प्रतीकात्मक तस्बिर
काठमाडौं- वर्षाका कारण अवरुद्ध बनेका १ सय १४ सडकमध्ये अझै केही सडक सञ्चालनमा आउन सकेका छैनन्। विगत केही दिनअघि देखिको लगातारको वर्षाका कारण देशभरका १ सय १४ सडक अवरुद्ध थिए। सडक विभागले अध्यावधिक गराएको पछिल्लो विवरण अनुसार देशका विभिन्न स्थानमा २९ वटा सडक अझै अवरुद्ध नै छन्।
सडक विभागले असार २५ गतेदेखि अवरुद्ध राजमार्ग तथा विभिन्न सडकखण्डको विवरण अध्यावधिक गराउँदै आएको छ। त्यसयता ५१ वटा सडक सञ्चालनमा आएका छन्, भने ३४ वटा सडक आंशिक वा एकतर्फी रुपमा सञ्चालनमा आएका छन्।
अरनिको राजमार्ग अन्तर्गतको सिरिशेमा सडक खुल्न १० दिन लाग्ने अनुमान सडक विभागकाे छ। त्यस्तै अरनिको राजमार्ग अन्तर्गतकै जम्बु र झ्यालेका ३ स्थानमा सडक र पुल अवरुद्ध भएका छन्। अवरुद्ध यी सडक र पुल बन्न १० देखि १५ दिनसम्म लाग्ने विभागले जनाएको छ। अरनिको राजमार्गकाे धेरै स्थानमा सडक अवरुद्ध भएकाे छ। अरनिकाे राजमार्गकाे डाकलाङका तीन स्थानमा सडक अवरुद्ध छ। जुन बन्न १५ दिन लाग्ने अनुमान छ।
त्यसैगरी बेनीजोमसोम कोरोला सडकअन्तर्गत म्याग्दीको दानामा अवरुद्ध सडक खुल्न २० दिन लाग्ने सडक विभागले जनाएको छ। कान्ति लोकपथ, बेँसीसहर चामे सडक, बेनीजोमसोम कोरोला सडक, डुम्रे बन्दीपुर सडक, साँफेबगर मार्तडी सडक, महाकाली राजमार्गलगायत विभिन्न सडक पनि अवरुद्ध रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
