काठमाडौं- चितवन राष्ट्रिय निकुञ्जले माडी नगरपालिका-९ कुसुमखोलाका चेपाङ समुदायको घरमा आगो लगाएको र सेनाको कुटपिटबाट चेपाङ युवकको मृत्यु भएको घटनाको अनुसन्धान सुरु गरेको छ।
आयोगको बागमती प्रदेश कार्यालयले घटनाको अनुसन्धान प्रक्रिया अघि बढाएको आयोगका सचिव वेद भट्टराईले जानकारी दिए।
२०५३ सालदेखि बसोबास गर्दै आएका सुकुम्बासी चेपाङ समुदायको घरमा चितवन राष्ट्रिय निकुञ्जबाट खटिएको टोलीले निकुञ्जको जग्गा खाली गर्ने भन्दै दुईवटा घरमा आगजनी गर्नुका साथै आठवटा घरहरूमा हात्ती लगाएर भत्काएको थियो।
त्यस्तै राप्ती नगरपालिका–२ का २४ वर्षीय राजकुमार चेपाङको निकुञ्जमा खटिएका नेपाली सेनाले २०७७ साउन १ गते नियन्त्रणमा लिई कुटपिट गरी यातना दिएको र उनको मृत्यु भएको घटनाप्रति ध्यानाकर्षण भएको आयोगले जनाएको छ।
‘यस प्रकृतिका कार्यबाट व्यक्तिको सम्मानपूर्वक बाँच्न पाउने अधिकार कुण्ठित हुन पुगेको तथा सामाजिक न्याय, आवासको हकलगायतका अधिकारहरूको समेत उल्लंघन हुन गएको देखिन्छ’ आयोगले भनेको छ।
आयोगले आगजनी गरिएको र घर भत्काई विस्थापित तुल्याइएका व्यक्तिको उचित बासको लागि तत्कालै वैकल्पिक व्यवस्था गर्न सरकारलाई आग्रह गरेको छ।
त्यस्तै दुवै घटनाको निष्पक्ष छानविनमार्फत घटनामा संलग्नलाई यथाशीघ्र कानूनी दायरामा ल्याउन र मृतक राजकुमार चेपाङको परिवारलाई उचित क्षतिपूर्ति दिन पनि आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772777462.png)
