काठमाडौं- सत्तारुढ दल नेपाल कम्युनिस्ट पार्टी (नेकपा) भित्रको विवादमा केपी ओलीप्रति पुष्पकमल दाहाल र माधव कुमार नेपालको आक्रोश नघटेको देखिएको छ। पुष्पलाल स्मृति दिवसको अवसरमा शुक्रबार आयोजित एउटा कार्यक्रममा दुवै नेताले ओलीलाई एकताविरोधी गतिविधिमा लागेको आरोप लगाए। उनीहरुले विधि पद्धति मान्न ओलीलाई आग्रह समेत गरे।
कार्यक्रममा सम्बोधन गर्दै प्रचण्डले पार्टी संकटमा रहेको बताए। 'अहिले पार्टी संकटमा छ। पार्टी ठीकठाक छ भनेर मैले भनें भने त्यो सत्य होइन', उनले भने।
प्रचण्डले पार्टीको बैठक चल्दाचल्दै केपी ओलीको सक्रियतामा निर्वाचन आयोगमा एमालेको नाममा पार्टी दर्ताको प्रक्रिया अघि बढेको बताए। 'त्यसले संकटलाई व्यक्त गर्दैछ', उनले भने।
देशभर भइरहेको नाराजुलुसप्रति पनि प्रचण्डले असन्तुष्टि जनाए। साथै नक्सामा ओलीले एकल जस लिएको प्रति पनि उनले आपत्ति जनाए। गत मंसिर-पुसमा बसेको स्थायी कमिटी बैठकेदेखि माघमा बसेको केन्द्रीय कमिटी बैठकले पनि नक्सा प्रकाशित गर्न गरेको निर्णयलाई सरकारले अटेर गरेको र जेठ २ गते नीति तथा कार्यक्रमअघि बसेको सचिवालय बैठकबाट मुख्य सचिवलाई फोन गरेर सो विषय थप्न लगाइएको उनले बताए। 'पार्टीको सामूहिक निर्णयबाट पारित विषयलाई आफ्नो खल्तीमा हाल्ने प्रयास भयो भने त्यो इमान्दार प्रयास हुनसक्दैन। त्यहाँ दिग्भ्रम हुन्छ', उनले अगाडि भने, 'समयमै नक्सा प्रकाशित गर्नुपर्छ भनेर निर्णय गराउनेहरु राष्ट्रघाती दलाल, जसले प्रकाशित गर्न यति महिना ढिलो गर्यो, उसैको देवत्वकरण? त्यो हुनसक्दैन।'
केही दिनअघि ओलीबाट उनलाई जबजको प्रवक्ता बन्ने भए 'अर्ली' महाधिवेशन गरेर पार्टी अध्यक्ष बनाउने प्रस्ताव गरिएको सार्वजनिक भएको थियो। साथै, ओली पक्षका कतिपय नेताहरुले बेलाबखत जबजको चर्चा गर्ने गरेका छन्। आजको सम्बोधनमा उनले ती एकता विरोधी गतिविधि भएको बताए। पार्टी एकता गर्दा जनताको जनवाद भनिएको भन्दै उनले त्यस बाटोलाई छोडेर पुरानै विचार अघि सार्न थालियो भने एकतालाई प्रवर्द्धन गरेको नठहरिने उनले बताए। 'हामी कहीँ न कहीँ विभाजनतिर जान खोज्दैछौं, एकअर्काको विचार, भावना र संवेदनशीलतालाई हामी सम्बोधन गर्नेतिर होइन, भन्ने नै त्यसले अर्थ दिन्छ। त्यसो नगरौं', आग्रह गरे।
प्रचण्डले नाम नलिई ओलीलाई पार्टी एकताको माया नभएको बताए। 'एकताप्रति तपाईंलाई माया छैन भने तपाईंले कुनै न कुनै रुपमा एकतालाई क्षति पुग्ने गतिविधि गर्नुहुन्छ। तपाईंलाई सामूहिक निर्णयप्रति विश्वास छैन भने तपाईं व्यक्तिगत फैसलालाई नै सर्वोपरी ठान्नुहुन्छ। र त्यसो ठानियो भने हामीले यो एकतालाई निरन्तर गति दिन र विकसित गर्न सम्भव हुँदैन', उनले भने।
कार्यक्रममा सम्बोधन गरेका प्रचण्ड र नेपाल दुवैले ओली विधि र प्रक्रियामा नहिँडेको संकेत गर्दै सो अनुसार हिँड्न सचेत गराए।
'पार्टीभित्रको समस्यालाई छलफल गरेर समाधान गर्न अधिकतम कोसिस गरिरहेका छौं। किनभने हाम्रो निम्ति व्यक्ति होइन, विधि, नीति र पद्धति प्रमुख कुरा हो। सामूहिकताको आधारमा निर्णय गर्ने र त्यसको सबैले पालना गर्ने लेलिनवादी संगठनात्मक सिद्धान्त, जुन हाम्रो पार्टीको विधानले अगाडि सारेको छ, बहुमतको निर्णय नै पार्टीको निर्णय हुने छ भनेर लेखेको छ, त्यसलाई सबैले शिरोपर गर्नुपर्ने हुन्छ', नेता नेपालले भने, 'म मान्दिनँ, म मान्न बाध्य छैन आदि/इत्यादि भन्न कसैले छुट पाउँदैन। मलाई लाग्दछ, बुद्धि सबैमा पलाउने छ। सबैमा चेत पलाउने छ।'
आफ्नो सम्बोधनमा नेता नेपालले ओलीको नाम नलिई उनको नेतृत्वमा धेरै समस्या रहेको स्पष्ट पारे। उनले विधिको पालना नगरी 'आइ एम द स्टेट' भन्ने ठान्ने, सर्वोपरी ठान्ने, आफूलाई मात्रै केन्द्रबिन्दुमा राख्ने र आफू बाहेक दुनियाँमा कसैको केही अर्थ छैन भन्ने र त्यस्तो अहंकारको भावनाबाट चल्न थालियो भने त्यो व्यक्ति र प्रवृत्तिको पतन हुने बाहेक अर्को केही नहुने उनको भनाई छ। 'त्यस्तो विचार र प्रवृत्तिमा हामी कोही चुर्लुम्म डुबेका छौं भने उम्कियौं। जोगियौं। समय छ। तर समय धेरै ढिला हुन थालिसकेको छ', उनले भने, 'यो आन्दोलनको हितको लागि पनि अब हामीले आफूलाई सुधारौं। नयाँ शिराबाट अगाडि बढ्ने संकल्प गरौं।'
दुवैले आफ्नो सम्बोधनमा पार्टी फुट्न नदिने बताए।
प्रचण्डले अहिले कुनै पनि स्थितिमा पार्टी विभाजन हुनबाट रोक्न अन्तिम दमसम्म आफूले प्रयास गरिरहेको बताए। 'पार्टी विभाजन हुन दिइने छैन। यो विश्वास म तपाईंहरुलाई दिन चाहन्छु। पार्टीलाई एकतावद्ध राखिने छ', उनले भने, 'यो बहसबाट अझ खारिएको पार्टी, अझ एकतावद्ध पार्टी, अझ स्पष्ट विधि पद्धति पालना गर्ने पार्टीको विकास हुने छ।'
नेता नेपालले पनि आफू सँगसँगै आन्दोलनलाई समाप्त पार्ने मुर्खता कसैबाट नहोस् भनेर सचेत गराए। उनले सबैले बुद्धि पुर्याउने अपेक्षा पनि गरे। 'तपाईंहरुलाई चिन्ता छ, कम्युनिस्ट पार्टी फुट्छ कि भनेर, फुट्दैन। कम्युनिस्ट पार्टी फुट्नेवाला छैन। कसैले चोइट्याउन खोज्यो भने एक्लिएर जाला तर यो कम्युनिस्ट पार्टी फुट्नेवाला छैन। तर हामीमध्ये केही व्यक्ति कस्ता छौं भने कसैले भन्दिहाल्यो, पत्रिकामा आइहाल्यो भने पार्टी फुट्छ कि भनेर डर थरथरथरथर काम्न थाल्छौं। थर्किनुपर्ने केही आवश्यकता छैन', उनले भने।
उनले कम्युनिस्ट आन्दोलनलाई कसैले चाहेर विसर्जनको अवस्थामा पुर्याउन नसक्ने स्पष्ट पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
