काठमाडौं-सर्वोच्च अदालतले सर्वस्वसहित जन्मकैदको सजाय घटाएर साढे आठ वर्ष बनाएपछि रिहा भएका पूर्व डिआइजी रञ्जन कोइरालाविरुद्ध पुनरावलोकनका लागि सरकारी वकिलको कार्यालय सर्वोच्च जाने भएको छ।
प्रधानन्यायाधीश चोलेन्द्रशमशेर राणासहितको इजलाशले गरेको फैसला त्रुटीपूर्ण भएको दाबी गर्दै महान्यायाधीवक्ता कार्यालय पुनरावलोकनमा जाने तयारी गरेको हो।
महान्यायाधीवक्ता कार्यालयका प्रवक्ता सन्जिवराज रेग्मीका अनुसार यसका लागि आवश्यक तयारी थालिएको छ। कोइरालाको फैसला हुँदा लिइएका आधारहरु गलत भएको प्रमाणित गर्ने नजिरहरुको अध्ययन थालिएको र पुनरावलोनको मस्यौदा तयार भएपछि सर्वोच्चमा दर्ता गरिने उनले बताए।
कोइरालाले पत्नि गीता ढकालको काठमाडौंमा हत्यापछि चित्लाङ पुर्याएर शव जलाएका थिए। क्रुर रुपमा हत्या गरेको व्यक्तिलाई चित्त नखाएको आधार देखाएर र सर्वोच्चबाट यसअघि प्रतिपादन भएका नजिरविपरीत रहेकाले खारेज हुनुपर्ने जिकीर गर्ने तयारी सरकारी वकिलले गरेको छ। कोइरालाको फैसला गलत भएकाले बिहीबार पुनरावलोकन गर्ने निर्णय महान्यायाधीवक्ता कार्यालयले गरेको हो। सर्वोच्चको आदेशपछि कोइराला आजै जेलमुक्त भएका छन् ।
यस्तो थियो घटना
डिआइजी कोइराला र श्रीमती गीता कोइराला (ढकाल) बीच सम्बन्ध राम्रो थिएन। २ छोराको जन्मपछि पनि उनीहरु अलग्गै बस्दै आएका थिए।
गीता एकाएक बेपत्ता भएपछि माइती पक्षले हनुमानढोकामा उजुरी दिएका थिए। त्यसपछि तत्कालीन बहालवाला डिआइजी कोइरालामाथि अनुसन्धान सुरु भएको थियो। माइती पक्षले २०६८ पुस २९ गते रञ्जनले गीतालाई बेपत्ता पारेको दाबी गर्दै हनुमानढोकामा उजुरी दर्ता गराएका थिए।
त्यसको अघिल्लो दिन २०६८ पुस २८ गते बिहान मकवानपुरको पालुङमा एउटा शव ७० प्रतिशत जलेको अवस्थामा फेला परेको थियो। दोस्रो पटक श्रीमतीको शव जलाएको स्थानमा पुगेर फर्कदै गर्दा प्रहरीले उनलाई नागढुंगाबाट पक्राउ गरेको थियो। त्यसलगत्तै रञ्जनले अपराध गरेको स्वीकार गरे। शवको डिएनए टेस्ट गरियो। त्यसबाट पनि उक्त शव गीताकै भएको प्रमाणित भएको थियो ।
प्रहरी अनुसन्धानमा रञ्जनले घरमै गीताको हत्या कपडाले घाँटी थिचेर गरेको देखिएको थियो। हत्यापछि प्रमाण नष्ट गर्नका लागि शवलाई गाडीमा हालेर पालुङ पुर्याएको, पेट्रोल पनि घरबाटै लिएर गएको र राति जंगल छेउमा गाडी रोकेर शव जलाएको र पूर्णरुपमा जलिनसक्दै फर्किएको पाइएको थियो।
दुई छोरा अभिभावकविहीन भएको भन्दै सजाय घटाइयाे, लिन पुगिन् प्रेमिका
कोइरालालाई सजाय छुट दिने विषयमा सर्वोच्चले टेकेका धेरै आधारमध्ये एक थियो आमाको मृत्यु भएपछि दुई छोराहरु अभिभावकविहीन भएको। तर उनी रिहा हुँदा बिहीबार डिल्लीबजार कारागारमा फरक दृश्य देखियो। कोइरालालाई लिन उनका छोराहरु पुगेका थिएनन्, प्रेमिका तारा रेग्मी पुगेकी थिइन्।
आफ्नी आमाको हत्यारालाई कसरी अभिभावक स्वीकार गर्ने भन्ने प्रश्न उठ्ने गरि सर्वोच्चले यस्तो तर्क गरेको थियो। बा १८ च ५४१७ नम्बरको कार चलाएर कोइरालालाई रिसिभ गर्न रेग्मी डिल्लीबजार कारागार पुगेकी थिइन्। उनले कारागारबाट कोइराला रिहा हुँदै गर्दा आफूहरुका बीचमा विवाद साम्य भइसकेको दाबीसमेत गरेकी थिइन्।
प्रधानन्यायाधीश चोलेन्द्रशम्शेर राणा र तेजबहादुर केसीको इजलाशले कोइरालाको मुद्दामा फैसला सुनाउँदै सजाय घटाएको थियो। असार १५ गते भएको फैसलामा सर्वोच्चले जिल्ला र उच्च अदालतको फैसला सदर गरेको थियो। तर, कोइरालालाई अपराधबाट उन्मुक्ति दिन नमिल्ने ठहर गर्दे सजायमा भने भारी छुट दिएको थियो।
२०७३ जेठ २३ गते कोइराला र तारा रेग्मीसहितलाई विपक्षी बनाउँदै सरकारी वकिलको कार्यालयले पुनरावेदन गरेको थियो। कोइरालाको हकमा उच्च र जिल्लाले दोषी ठहर गरे पनि प्रेमिका रेग्मीको हकमा फैसला चित्त नबुझेको भन्दै सरकारी पक्ष सर्वोच्च पुगेको थियो। सरकारको पुनरावेदनलगत्तै कोइराला पक्षबाट पनि मुद्दा सर्वोच्च लगिएको थियो। उक्त मुद्दामा चार वर्षपछि सर्वोच्चले फैसला सुनाएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
