नारायणगढ–मुग्लिन सडकखण्ड अन्तर्गत इच्छाकामना गाउँपालिका–६, चार किलोमा खसेको पहिरो। तस्बिर: रासस
काठमाडौं– लगातरको वर्षाका कारण देशभरका अधिकांश सडक अवरुद्ध भएका छन्। काठमाडौं प्रवेश गर्ने मुख्य सडक पृथ्वी राजमार्गको माैवाखोलाको पुल बाढीका कारण भत्किएपछि यातायात पूर्णरुपमा बन्द भएको छ।
हेटौँडा कुलेखानी सडक पनि पूर्णरुपमा बन्द भएको छ भने हेटौँडा-नौबिसे-काठमाडौं सडक संचालनमा रहेको सडक विभागले जानकारी दिएको छ। अरनिको रार्जमार्ग बन्द छ भने बिपी राजमार्ग सञ्चालनमै रहेकाे सडक विभागमका महानिर्देशक केशवकुमार शर्माले जानकारी दिए।
‘सोमबार बिहानदेखि बन्द भएको पृथ्वी राजमार्ग मंगलबार पनि खुल्ने अवस्था छैन। पानी रोकिएको अवस्थामा बुधबारसम्ममा पृथ्वी राजमार्ग सञ्चालनमा ल्याउन सकिने छ,’ उनले भने, ’मुग्लिन-नारायणगढ सडकखण्डमा पनि पहिरोले सडक अवरोध गरेको छ।’ सो खण्डको सडक मंगलबारसम्म संचालनमा आउन सक्ने भएपनि मौवाखोलाको पुलमा भएको क्षतिका कारण राजधानीसम्म आवतजावत हुन सक्ने अवस्था छैन।
यसैगरी त्रिभुवन राजपथमा पनि स–साना समस्या भएपनि खुल्ला नै छ। बिपी राजमार्गमा पनि स–साना पहिरो खस्ने क्रम जारी भएपनि खुलाउने काम भइरहेको छ। तर, पाल्पा–तानसेन–बुटबल सडक भने आइतबारदेखि नै बन्द छ। पोखरा-मुग्लिन सडक भने सञ्चालनमै छ। सञ्चालनमा रहका सडकमा पनि स–साना पहिरो भने खस्ने क्रम रोकिएको छैन।
अछामको साँफेबगरबाट बाजुराको मार्तडी जाने सडकमा पनि पहिरोले क्षति पुर्याएको छ भने सुर्खेत-जुम्ला सडक अवरुद्ध भएको छ। पहिरो हटाउनमात्रै अहिले १ सय ९८ वटा मेसिन प्रयोग भएको शर्मा बताउँछन्। विभागले अहिले देशभरको सडक अवरोध खुलाउन र तत्कालको मर्मतका लागि आवश्यक रकम अभाव हुन नदिने गरी काम गरिरहेका उनले जानकारी दिए।
कतिपय स्थानमा पुल बगाएपछि बेली ब्रिज हाल्ने काम पनि विभागले गरिरहेको छ। उनका अनुसार अहिलेसम्म बाढी र पहिरोका कारण सडकमा मात्र डेढ अर्बभन्दा बढीको क्षति भइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
