काठमाडौं- अर्थमन्त्री डा युवराज खतिवडा र नेपालका लागि युरोपेली युनियनका राजदूत भेरोनिका कोडीबीच सोमबार शिष्टाचार भेटघाट भएको छ। आफ्नो ३ वर्षे कार्यकाल पुरा गरी ब्रसेल्स फर्कन लागेकी राजदूत कोडीले अर्थमन्त्रीसँग बिदाइ भेट गरेकी हुन्।
उक्त भेटमा अर्थमन्त्री खतिवडाले अन्तर्राष्ट्रिय विमानस्थलको स्तरोन्नतिलगायत हवाई सुरक्षासम्बन्धी कार्यमा नेपाल सरकारले उच्च प्राथमिकता दिएको र युरोपियन पर्यटकहरुको गन्तव्य नेपाललाई बनाउने प्रयास रहेको सन्दर्भमा युरोपेली युनियनले नेपालको युरोपका देशहरुमा हुने उडानलाई अनुमति दिन अनुरोध गरेका छन्। त्यस्तै इयुको कालोसूची फुकुवाको पहलका लागि पनि अर्थमन्त्री खतिवडाले आग्रह गरेका छन्।
युरोपेली युनियनले नेपालको आर्थिक विकासमा पुर्याएको महत्वपूर्ण सहयोगका लागि धन्यवाद दिँदै निरन्तर सहयोगका लागि अनुरोध गरे। अर्थमन्त्रीले बहुध्रुवीय विश्व निर्माणमा युरोपियन युनियनले महत्वपूर्ण वैकल्पिक राजनीतिक शक्तिको भूमिका निर्वाह गरेको, नेपाल युरोपेली युनियनसँगको सहकार्यलाई थप उचाईमा लैजान इच्छुक रहेको र सबल युरोपको पक्षमा रहेको धारणा व्यक्त व्यक्त गरेका छन्। त्यस्तै युरोपेली युनियनले नेपालको व्यापार, रोजगारी, लगानी, पर्यटन र आर्थिक पुनरोत्थानमा योगदान बढाउन सक्ने विश्वास व्यक्त गर्दै नेपालले पाउने बजेट सहायताले नेपालप्रतिको विकास साझेदारको विश्वासलाई प्रतिविम्बित गरेको पनि उनले उल्लेख गरे।
जवाफमा राजदूत कोडीले नेपालले युरोपेली युनियनसँगको सहकार्यमा राम्रो कार्य गरिरहेको धारणा व्यक्त गर्दै इयुले नेपालको विकासका लागि विभिन्न क्षेत्रमा सहयोग गर्दै आएको र बजेट सहयोगलगायत कोभिड-१९ सम्बन्धी सहयोग समेत आगामी दिनमा निरन्तर रहने बताइन्। युरोपेली युनियनको ७ वर्षे सहायता चक्र यसै वर्ष समापन भई अर्को चरणको ७ वर्षे चक्र थालनी हुने हुँदा त्यसमा समेत नेपाललाई प्राथमिकतामा राखी सहयोग गर्ने प्रतिबद्धता पनि उनले व्यक्त गरिन्।
पहिलो चरणमा ३६० मिलियन युरो बराबरको सहायताबाट शिक्षा, स्वास्थ्य, पोषण, पूर्वाधार, कृषि, मानव स्रोत विकास, लगानी, जलवायु परिवर्तनलगायतका क्षेत्रमा सहयोग गरिएको र आगामी सहायतामा यी क्षेत्रको अतिरिक्त स्थानीय विकास, श्रम बजार, डिजिटलाइजेशन लगानी समिश्रण, बजेट सहायता र हरित विकासजस्ता क्षेत्रमा सहायता केन्द्रित गरी नेपालसँग सहकार्य गर्ने धारणा पनि उनले व्यक्त गरिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
