काभ्रेपलाञ्चोक- काभ्रेपलाञ्चोकको मण्डनदेउपुरकी सरिता दुलाल हत्याप्रकरणमा जिल्ला अदालतले श्रीमान्लाई मात्र दोषी ठहर गर्दै अन्य चार जनालाई सफाई दिएको छ। जिल्ला अदालतले शुक्रबार सरिताका श्रीमान् सुदीप दुलाललाई जन्मकैद हुने फैसला सुनाएको हो।
परिवार नै मिलेर बुहारीको हत्या गरेको अभियोगमा २०७६ जेठ ७ गते जिल्ला अदालत काभ्रेपलाञ्चोकमा सिपाघाटका परिवारका पाँच जना विरुद्ध कर्तव्य ज्यान मुद्दा दायर गरेको थियो। सरिताका श्रीमान् सुदीप दुलाललाई जिल्ला अदालत काभ्रेपलाञ्चोकले २०७६ असार २१ गते दोषी ठहर गरेको थियाे। जिल्ला न्यायाधीश दुर्गा खड्काको इजलाशले जन्मकैदको सजाय सुनाउँदै अन्य चार जनालाई सफाई दिने फैसला भएको थियो।
मण्डनदेउपुर नगरपालिका वडा नम्बर ४ घर भएकी २५ वर्षीया सरितालाई मण्डनदेउपुर नगरपालिका वडा नम्बर ६ बस्ने ६३ वर्षीय पिताम्वर दुलाल, उनका छाेरा २५ वर्षीय सुदीप दुलाल, श्रीमती ६५ वर्षीया रोमकुमारी दुलाल, अर्का छाेरा ३६ वर्षीय केशव प्रसाद दुलाल, केशवकी श्रीमती ३५ वर्षीया संगिता दंगाल (दुलाल) सहितलाई ज्यान सम्बन्धी कसुर (कर्तव्य ज्यान) अभियोगमा मुद्दा दायर भएको थियो।
जिल्ला अदालतले उनीहरु सबैलाई पुर्पक्षका लागि थुनामा राख्न आदेश दिएको थियो। मुद्दा दायर भएको १४ महिनापछि अन्तिम फैसला सुनाउँदै जिल्ला अदालतले ज्यान मारेको अभियोगमा श्रीमान्सहित सासू,ससुरा, जेठाजु र जेठानीको संलग्नता रहेको भन्दै मुद्दा दायर भएको थियो। तर, अन्तिम फैसला गर्दा जिल्लाले सरिताको हत्यामा श्रीमान्लाई जन्मकैद सुनाउँदै अन्य चार जनाको संलग्नता पुष्टि हुन नसकेको भन्दै सफाई दिएको हो।
मण्डनदेउपुर नगरपालिका–६ सिपाघाटकी २५ वर्षीया सरिताको आफ्नै घरमा घाँटी थिचेर हत्या गरिएको थियो। एकै घरमा रहेका उनीहरु सरिताको हत्या हुदाँ प्रतिवाद नगरेकाले मिलेमतो भएको दावी अभियोगपत्रमा गरिएको थियो। प्रहरीको अनुसन्धान, आरोपितको बयान र सबुत–प्रमाण तथा सरकारी वकिलको कार्यालयको बयानका आधारमा सरिताको हत्यामा पारिवारिक संलग्नता देखिएको दावी अभियोगपत्रमा गरिएको हाे। अभियोगपत्रमा सबैलाई मुलुकी संहिताको कर्तव्य ज्यान मुद्दाअन्तर्गत जन्मकैदको सजाय माग गरिएको थियो।
२०७६ बैशाख १३ गते बिहान १० बजे सरितालाई घरमै घाँटीमा नीलडाम भएको मृत अवस्थामा प्रहरीले शव फेला पारेको थियो। भुइँतलामा बस्दै आएकी सरिताको घाँटीमा डोरीले कसेको नीलडामसहितको शव माथिल्लो तलामा भेटिएको थियो। बिहान १० बजे मात्रै घरका अन्य व्यक्तिले सरिता मृत अवस्थामा भेटिएको भनी प्रहरीलाई खबर गरेकाले परिवारकै मिलेमतोमा कर्तव्य गरी मारेको हुनसक्ने जनाउँदै मृतकका दाजु मण्डनदेउपुर नपा–४ चैनपुरका कृष्णप्रसाद दाहालले घटनाको दिन दिउँसो जिल्ला प्रहरी कर्यालयमा किटानी जाहेरी दर्ता गरेका थिए।
प्रहरीले सोही आधारमा परिवारका सबैलाई पक्राउ गरी घटनाको अनुसन्धान सुरु गर्नुका साथै आरोपितको बयान लिएको थियो। सरिताको हत्यापछि श्रीमान् सुदीप फरार थिए। परिवारका अन्य सदस्यलाई घरबाटै प्रहरीले पक्राउ गरेको थियो।
प्रहरीको बयानमा सुदीपले घटना भएको दिन बिहान सरिता केही समय बाहिर निस्किएको र घर आएपछि केही विषयमा झगडा परेपछि आफूले कुटपिट गरेको बताएका थिए। प्रहरीको बयानमा उनले गुलेलीको रबरले सरिताको घाँटी अठ्याउँदा बाबु पिताम्वर र दाजु केशवले दुवै गोडा समाएको बताएका थिए। घटना भइरहँदा सरिताकी सासू गङ्गा र जेठानी संगीताले भने कुनै प्रतिक्रिया नजनाएको सुदीपले प्रहरीको बयानमा भनेको थिए। तर, उनले जिल्ला अदालतको बयानमा भने आफू एक्लैले मारेको बताए। सुदीपले आफूले मात्रै सरिताको हत्या गरेको स्वीकारे पनि घटनाको प्रकृतिका आधारमा परिवारका अन्य सदस्यलाई समेत हिरासतमा राखी अनुसन्धान गरिएको थियो।
प्रहरीका अनुसार काठमाडौँस्थित शिक्षण अस्पतालमा भएको शव परीक्षण रिपोर्टले पनि सरिताको हत्या एक जना व्यक्तिबाट मात्रै नभएको र जोडबलले घाँटीमा कसेर मृत्यु भएको देखाएको थियो।
प्रहरीको अनुसन्धानमा दुलाल परिवारमा घरको सम्पत्ति र सरिताको नागरिकता तथा सरिता दम्पतीबाट बच्चा नभएको विषयमा समय समयमा विवाद भइरहने गरेकाे पाइएको थियो। चार वर्षअघि सरितासँग विवाह गरेका सुदीप दुई वर्षदेखि मानसिक रोगी थिए। सुदीप र सरिता बाबुआमासँगै एउटै घरको भुइँतलमा बसेको भए पनि खाना भने अलग्गै खाँदै आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
