काठमाडौं- एक महिनादेखि कञ्चनपुरमा युरिया मलको चरम अभाव हुँदा किसान चिन्तित बनेका छन्। धान रोपेको २१ दिनभित्रमा युरिया मल हाल्नुपर्ने भए पनि यहाँका किसानले मल नपाउँदा समस्या भइरहेको गुनासो गरेका छन्।
‘यहाँको दक्षिण क्षेत्रको सीमानाकाबाट लुकिछिपी मल आइरहेको सुनिन्छ,’ शुक्लाफाँटा नगरपालिकाका दीना रानाले भनिन्, ‘एक हजारमा पाउने मल एक हजार ७०० मा पनि पाउन मुश्किल छ।’
त्यसैगरी महाकाली नगरपालिकाको सीमानाका हुँदै महाकाली नदीको झोलुङ्गे पुलबाट मल आइरहेको भए पनि बिक्री वितरणका विषयलाई लिएर विवादसमेत उत्पन्न भएको थियो। स्थानीयबीच विवाद भएयता सो नाकाबाट पनि मल आउन छाडेको स्थानीयको भनाइ छ।
कृषि ज्ञान केन्द्रले पनि कैलाली र कञ्चनपुरमा युरिया मल अभाव हुँदा उत्पादनमै कमी आउसक्ने बताएको छ। केन्द्रका निमित्त कार्यालय प्रमुख रामचन्द्र भट्टले मल नपाउँदा किसानले दुखेको पोख्ने गरेको बताए।
उनका अनुसार कैलालीमा ७० हजार र कञ्चनपुरमा ४८ हजार हेक्टरमा धानखेती हुँदै आएको छ। ‘मल अभाव नौलो विषय होइन,’ उनले भने, ‘अनौपचारिक नाकाबाट पनि यहाँ ३० प्रतिशत मल आयात हुन्थ्यो तर पनि लकडाउनले आउन छाडे पनि चरम अभाव देखिएको हो।’ उनले युरिया मल धान लगाएको २१ दिन र त्यसपछि पुनः २१ गरी दुईपटक हाल्नुपर्ने बताए। ‘यहाँ मल नपाउँदा नै उत्पादनलाई असर गर्ने देखिन्छ,’ उनले भने, ‘मल अभाव मुलुकभरकै समस्या हो।’
त्यसैगरी कृषि सामग्री कम्पनी लिमिटेड कञ्चनपुरले युरिया मल सकिएको महिना दिन भइसकेको जनाएको छ। ‘करिव ४३ टन डिएपी र ४६ टन पोटास मलमात्रै हामीसँग मौज्दात छ,’ लिमिटेड प्रमुख बलबहादुर शाहले भने, ‘मलका लागि बिहानदेखि साझँसम्म किसान यहाँ धाइरहन्छन्।’
बन्दाबन्दीका बेला आपूर्तिमा सहज नहुँदा यहाँका केही सहकारीलाई भैरहवाबाट मल ल्याउन दिइएको छ। ‘हामीले गत आर्थिक वर्षमा सहकारीबाट समेत गरेर २ हजार ७ सय ३६ मेट्रिकटन मल बिक्री वितरण गर्यौं,’ उनले भने, ‘मलको समस्या अहिले राष्ट्रिय समस्याकै रुपमा देखिएको छ।’ गत आवमा लिमिटेडले १ हजार ९ सय १.७ मेट्रिक टन युरिया, एक हजार सात सय मेट्रिक टन डिएपी र ९५.२ मेट्रिक टन पोटास बिक्री गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
