काठमाडौं- राष्ट्रिय ध्वजाबाहक नेपाल वायुसेवा निगम (नेपाल एयरलाइन्स)ले आर्थिक वर्ष २०७७/०७८ को बजेट १३ प्रतिशतले घटाएको छ। निगमले आर्थिक वर्ष २०७६/०७७ काे तुलनामा नयाँ आवमा १३ प्रतिशत बजेट घटाएको हो।
निगमले आव २०७७/०७८ का लागि १७ अर्ब ८९ करोड ६४ लाख ६१ हजार रुपैयाँ विनियोजन गरेको छ। निगम सञ्चालक बोर्डले आगामी आवका लागि तयार गरेको बजेट अनुमोदनसमेत गरिसकेको छ।
निगमको २०७६/०७७ काे बजेट २० अर्ब ४६ करोड २९ लाख रुपैयाँ थियो। तर, कोरोना महामारीका कारण उडान ४० प्रतिशतभन्दा बढी घट्ने अनुमानसहित निगमले बजेटको आकार घटाएको जनाएको छ।
निगमले नयाँ आर्थिक वर्षमा १ अर्ब ३३ करोड रुपैयाँभन्दा बढी नाफा गर्ने महत्वाकांक्षी लक्ष्य भने अगाडि सारेको छ। निगमले गत आर्थिक वर्ष २०७५/०७६ मा झन्डै २ अर्ब नोक्सानी बेहोरेको थियो भने आव २०७६/०७७ मा ४ अर्बभन्दा बढी नोक्सानी व्यहोर्ने आँकलन गरेको थियो। तर, आगामी आवमा भने नाफा गर्ने लक्ष्य लिएको हो।
चालू आवका तुलनामा निगमको बजेट घटबढ
निगमले कार्यकारी अध्यक्षको अफिसको बजेटमा आव २०७६/०७७ को तुलनामा नयाँ आवमा ४० प्रतिशत कम गरेको छ। यसैगरी निगमले अर्थ विभाग (ए) अन्तर्गतको अपरेसन खर्चमा १६ प्रतिशत, अर्थ विभाग (बी) अन्तर्गतको फाइनान्सियल चार्जमा ७ प्रतिशत र कर्पोरेट विभागको बजेटमा १२ प्रतिशत बढाएको छ।
यसैगरी निगमको अपरेशन विभागको बजेट २१ प्रतिशत र इन्जिनियरिङ (इएम) विभागको बजेट २६ प्रतिशतले घटाएको छ। साथै इन्जिनियरिङ विभाग (सिएएम)काे बजेट ३७ प्रतिशत बढाएको निगमले ग्राउन्ड सर्पोट विभागको बजेट २३ प्रतिशत र कमर्सियल विभागको बजेट २७ प्रतिशत घटाएको छ।
यसैगरी निगमले जनरल सर्भिस तथा प्रोप्रर्टी विभागको बजेट २४ प्रतिशत, मानव संसाधन विभागको बजेट १३ प्रतिशत, क्वालिटी विभागको बजेट १७ प्रतिशत, कस्टुमर सर्भिस विभागको ० दशमलव ५ प्रतिशत, इन्टरनेसनल अडिट विभागको ० दशमलव १, कप्रोरेट विभागको ८ दशमलव ४ प्रतिशत बजेट घटाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
