काठमाडौं-सामाजिक सञ्जालको प्रयोग गरेर ठगी गरेको आरोपमा एक जनालाई महानगरीय प्रहरी परिसर काठमाडौंले पक्राउ गरेको छ। पक्राउ पर्नेमा धादिङको थाक्रे गाउँपालिका-१० घर भई ललितपुर बस्ने २५ वर्षीय रोशन घले छन्।
गत वैशाखमा किमक्यास्ट्रो नामको फेसबुक आइडीबाट काठमाडौंका एक व्यक्तिलाई फ्रेण्ड रिक्वेस्ट आएको थियो। किमक्यास्ट्रोले ती व्यक्तिलाई आफू सिरियामा रहेको भन्दै ठूलो चिट्ठा परेकाे विश्वास दिलाएका थिए। उक्त चिट्ठाको पार्सल पठाएको, त्यसलाई लिन १ लाख १९ हजार रुपैयाँ बराबरको ट्याक्स तिर्नुपर्ने र सो रकम रोशनको एनआइसी एसियाको बैंक खातामा पठाउन भनेका थिए।
रोशनसँग भने ती सिरियामा रहेको भनिएका व्यक्तिले पहिल्यै नै उनको खातामा रकम आउने र त्योबापत केही कमिसन लिएर बाँकी रकम आफूलाई पठाउन भनेका थिए। उनीहरुको योजनाअनुसार चिट्ठा परेको प्रलोभनमा परेका काठमाडौंका ती व्यक्तिले रोशनको खातामा १ लाख १९ हजार रुपैयाँ जम्मा गरेको पाइएको परिसरका वरिष्ठ उपरीक्षक श्यामलाल ज्ञवालीले जानकारी दिए। पैसा लिएपछि रोशनले ती व्यक्तिलाई फेसबकुमा ब्लक गरेका थिए। पीडितले दिएको जानकारी अनुसार परिसरको टोलीले रोशनलाई पक्राउ गरेको हो।
यसरी पछिल्लो समय सामाजिक सञ्जाल फेसबुक, ह्वाट्एप, भाइबर, इमोलगायतबाट चिट्ठा परेको भन्दै ठगिने क्रम बढेकाले सचेत रहन परिसरले आग्रह गरेको छ ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।