काठमाडाैं-प्रधानमन्त्री केपी ओलीले रामायणमा वर्णित अयोध्या नेपालमा रहेको र राम भारतका नभई नेपालका राजकुमार भएको अभिव्यक्ति दिएपछि देशभित्र र बाहिर उनको चर्को आलोचना भएको छ।
जनता समाजवादी पार्टीका नेता एवं पूर्वप्रधानमन्त्री डा. बाबुराम भट्टराईले प्रधानमन्त्री केपी ओलीका वचन र कर्मले सीमा नाघेको टिप्पणी गरेका छन्। ओलीको अध्योध्यासम्बन्धित विवादास्पद अभिव्यक्तिप्रति टिप्पणी गर्दै भट्टराईले अब प्रधानमन्त्री ओलीलाई छाडा छाड्नु खतरनाक हुने उल्लेख गरेका छन्।
मंगलबार ट्वीट गर्दै उनले भनेका छन्, ‘केपी शर्मा ओलीका वचनरकर्मले सीमा नाघ्दैछन्! संसदमा ‘सिंहमेव जयते’ र बेसार-पुराणदेखि अयोध्या-पुराणसम्म आउँदा वहाँको चिन्तनप्रणाली स्वस्थ देखिन्न। संसद स्थगन गरेर अध्यादेश र संकटकालको ‘खड्ग’समेत वहाँको हातमा छ! अब वहाँलाई छाडा छोड्नु खतरनाक हुनेछ ! उपचार खोजौं!’
पूर्व परराष्ट्रमन्त्री रमेशनाथ पाण्डेले धर्म राजनीति र कूटनीतिभन्दा माथि रहेको भन्दै प्रधानमन्त्रीको अभिव्यक्ति हाँस्यास्पद रहेको टिप्पणी गरेका छन्। उनले ट्वीट गर्दै प्रश्न गरेका छन्, ‘अयोध्या वीरगञ्जनजिक पर्छ भने सरयु नदी कहाँ छ ?’
यस्तै, राप्रपा अध्यक्ष कमल थापाले नेपालका प्रधानमन्त्रीस्तरबाट उट्पट्याङ, अपुष्ट र अप्रमाणित कुरा आउनु अनुपयुक्त भएको टिप्पणी गरेका छन्। उनले प्रधानमन्त्रीको ध्यान भारतसँगको सम्बन्ध सुधार्नेभन्दा बिगार्नेतर्फ गएजस्तो देखिएको बताएका छन्। बरु अतिक्रमित भूमि फिर्ता ल्याउने प्रयास गर्न पनि उनले आग्रह गरेका छन्।
नेकपा नेता विष्णु रिजालले प्रधानमन्त्रीको आलोचना गर्दै पदमा बसेर बेतुकका र असान्दर्भिक कुरा बोल्दा राष्ट्रकै शीर झुक्ने उल्लेख गरेका छन्। ट्वीटरमा उनले भनेका छन्,‘पदमा बसेर बेतुकका र असान्दर्भिक कुरा बोल्दा राष्ट्रकै शीर झुक्छ। अप्रमाणित, पौराणिक र विवादास्पद कुरा बोलेर विद्वान भइन्छ भन्नु ठूलो भ्रम हो । फुकीफुकी पाइला चालेर भूमि फिर्ता ल्याउनुपर्ने बेलामा विरोध र उत्तेजनाका लागि एकपछि अर्को मसला दिइनु दुर्भाग्यपूर्ण मात्र होइन, रहस्यमय छ।’
यस्तै, प्रधानमन्त्रीका पूर्व प्रेस सल्लाहकारले ओलीको अभिव्यक्तिप्रति आश्चर्य व्यक्त गरेका छन्। उनले ट्वीटरमा लेखेका छन्, ‘यो के बोलेको? कि भारतका टेलिभिजन च्यानलहरुसँग प्रतिस्पर्धा गरेको?’
राष्ट्रिय योजना आयोगका पूर्व उपाध्यक्ष डा स्वर्णीम वाग्लेले भारतीय मिडियालाई मसला दिएको टिप्पणी गरेका छन्।
भारतमा पनि ओलीको अभिव्यक्तिको चर्को विरोध भएको छ भारतीय समाचार संस्था पिटीआइको समाचारमा उक्त अभिव्यक्तिले ‘राजनीतिक विवाद उक्साउने’ भन्दै भारतलाई चोट पुर्याउने आश्चर्यजनक कदम भनिएको छ।
समाचारमा जनाइएअनुसार सत्तारूढ भारतीय जनता पार्टीका राष्ट्रिय प्रवक्ता विजय शोनकर शास्त्रीले ओलीको भनाइको निन्दा गरेका छन्।
उनले भगवान राम आस्थाको विषय भएको उल्लेख गर्दै नेपालका प्रधानमन्त्री या अन्य जोसुकैलाई त्यो आस्थासँग खेलबाड गर्ने छुट नभएको बताएका छन्।
अर्को भारतीय समाचार संस्था आइएएनएसले पनि ओलीको भनाइलाई ‘स्तब्ध पार्ने अभिव्यक्ति’ भनेर उल्लेख गरेको छ। नेपाल–भारत सम्बन्धमा उतारचढाव देखिएका बेला आएको उनको अभिव्यक्तिलाई देशभित्रै मानिसहरूले विश्वास नगरिरहेको भनेर पनि आइएनएसले लेखेको छ।
एनडिटीभी डट कममा प्रकाशित समाचारमा ओलीको अभिव्यक्तिले ‘रामका अनुयायीहरूलाई उत्तेजित पार्ने देखिएको’ उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
