रूपन्देही- रुपन्देही उद्योग संघले विद्युत् महसुलमा छुट दिन माग गर्दै नेपाल विद्युत् प्राधिकरण प्रदेश कार्यालयमा शुक्रबार ज्ञापनपत्र बुझाएको छ। ज्ञापनपत्रमा लकडाउन अवधिको डिमाण्ड चार्ज शतप्रतिशत र महसुलमा केही छुट सुविधा दिने घोषणा गरिए तापनि विद्युत प्राधिकरणले सुविधा उपलब्ध नगराउँदा उद्योगी समस्यामा परेको जनाइएको छ।
संघका अध्यक्ष बाबुराम बोहोराको नेतृत्वमा गएको टोलीले कार्यालयका प्रबन्धक नवराज सुवेदीलाई भेटी आर्थिक मसान्तको समाप्तिको संघारमा आइपुगेका उद्योगी बैंक कर्जा, ब्याज, पारिश्रमिक, विद्युत् महसुललगायत थुप्रै खर्च तत्काल तिर्न नसक्ने अवस्थामा रहेका कारण सरकारका विभिन्न निकाय तथा बैंक र वित्तीय संस्थाले सहुलियत प्रदान गर्नुपर्ने जनाएको छ। प्राधिकरणले डिमाण्ड र महशुलको छुट तत्काल उपलब्ध गराउनुपर्ने र लकडाउन अवधिमा बन्द अवस्थामा रहेका उद्योगको समेत चालु अवस्था सरह शुल्क जोडिएकाले सुधार गर्नुपर्ने संघका अध्यक्ष बोहोराले जोड दिए।
ज्ञापन पत्र बुझ्दै प्राधिकरणका प्रबन्धक सुवेदीले प्राधिकरण बोर्ड बैठकले पारित नगरेकाले सरकारले घोषणा गरेको सुविधा तत्काल लागू नगरिएको बताउँदै निर्णयपछि छुट सुविधालाई समायोजन गरिने जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
