काठमाडौं- कसैले प्रहरीको बर्दीमा दाग लगाउने काम गरेमा निर्मम कारबाहीको प्रक्रिया अघि बढाइने नवनियुक्त प्रहरी महानिरीक्षक शैलेश थापा क्षेत्रीले बताएका छन्। गृहमन्त्रालयमा आयोजित दर्ज्यानी चिन्ह प्रदान समारोहबीच आफ्नो मन्तव्य राख्दै आइजिपी थापाले सो कुरा बताएका हुन्।
थापाले संविधान, ऐन र नियमले निर्दिष्ट गरेको सीमाभित्र रहेर नेपाल सरकार गृह मन्त्रालयको निर्देशनमा सिंगो प्रहरी संगठनलाई साथ लिएर आफ्नो क्षमता र विवेकले भ्याएसम्म निस्वार्थरुपमा नेपाल प्रहरी समक्ष रहेको अपेक्षामा खरो उत्रने इमान्दार प्रयास गर्ने बताए।
थापाले भने, ‘प्रहरी महानिरीक्षक एक्लैले सबै अपेक्षा पूरा गर्न सक्दैन, प्रहरी महानिरीक्षकको सफलता वा असफलता देश, सरकार संगठनको सफलता असफलतासँग गाँसिएको हुन्छ, यसका निम्ति उचित निर्देशन भरपर्दो सहयोगी र स्वस्थ्य आलोचनाको आवश्यकता हुन्छ। मेरो सफलता वा असफलता भनेको यिनै कुराहरुको समायोजन कसरी गर्ने भन्नेमा निर्भर गर्छ भन्ने लाग्छ र म मेरो पुरा तागत यसमा लगाउने वाचा गर्दछु।’
प्रहरी कानून कार्यान्वयन गराउने निकाय भएकाले कानुन उल्लंघन गर्ने निकायको रुपमा रुपान्तरण हुन कुनै पनि हालतमा नहुने बताउँदै थापाले भने, ‘कसैले पनि बर्दीमा दाग लगाउने कोशिश गर्छ भने उसमाथि निर्मम रुपमा कारबाही प्रक्रिया अगाडि बढाइनेछ।’
कार्यक्रममा गृहसचिव महेश्वर न्यौपानेले राष्ट्र तथा नागरिकको अपेक्षाअनुरुप शान्ति सुरक्षा अमन चयन कायम राख्ने, अपराध नियन्त्रणमा अझ कुशलता प्रदर्शन गर्ने, प्रविधिमैत्री अनुसन्धान पद्धतिलाई अगाडि बढाउने, नागरिककै साथीको रुपमा प्रहरीलाई अझ क्रियाशील तुल्याउने, प्रहरीको नागरिकप्रतिको सम्मानलाई अझ उच्च बनाउने र नागरिकबाट प्रहरी संगठनलाई प्राप्त हुने इज्जत, मर्यादा, अपनत्व तथा विश्चास बढाउने कुरामा नवनियुक्त प्रहरी महानिरीक्षकलाई सफलता प्राप्त हुने र प्रहरी संगठन अझ सम्झन लायक हुने विश्वास व्यक्त गरे।
विसं २०२५ मंसिर २३ गते भक्तपुर सूर्यविनायक नगरपालिका- ५ मा जन्मिएका प्रहरी महानिरीक्षक क्षेत्री २०४९ वैशाख १९ गते प्रहरी निरीक्षक पदबाट नेपाल प्रहरी सेवा प्रवेश गरेका थ थिए। उनी २०५८ फागुन १० गते प्रहरी नायव उपरीक्षक, २०६७ पुस २० गते प्रहरी उपरीक्षक, २०७४ साउन १९ गते प्रहरी वरिष्ठ उपरीक्षक, २०७५ असोज २८ गते प्रहरी नायव महानिरीक्षक,२०७६ चैत ९ गते प्रहरी अतिरिक्त महानिरीक्षक पदमा पदोन्नति भएका थिए।
उनले राजनीतिशास्त्रमा स्नातकोत्तर गर्नुका साथै कमाण्ड र स्टाफ कोर्ष, लिडरसिप एण्ड म्यानेजमेन्ट ट्रेनिङ प्रोग्रामलगायत विभिन्न १७ वटा राष्ट्रिय तथा अन्तर्राष्ट्रिय तालिम हाँसिल गरेका छन्। प्रहरी महानिरीक्षक थापा क्षेत्री दुर्गम सेवा पदक, दैवीप्रकोप पिडीत उद्धार पदक, गद्दी आरोहण रजत पदक, प्रसिद्ध सेवा पदक, वीरेन्द्र ऐश्वर्य सेवा पदक, प्रहरी सेवा पदक, गोरखा दक्षिणबाहु चौथोलगायतका विभूषणबाट विभूषित भइसकेका छन्। यसैगरी उनले उत्कृष्ट व्यावसायिक कार्य सम्पादन गरेबापत ग्रेड थप तथा दर्जनौं नगद पुरस्कार प्राप्त गर्नुका साथै विभिन्न प्रशंसापत्र एवम् कदरपत्रद्वारा सम्मानित भइसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
