काठमाडौं- शीर्ष नेताहरुबीचको विवाद उत्कर्षमा पुगेका कारण विभाजनको आशंका गरिएको नेकपामा केही दिनयता संवाद तीव्र भइरहेको छ। विवाद समाधानका लागि भन्दै अध्यक्षद्वय केपी शर्मा ओली र पुष्पकमल दाहाल ‘प्रचण्ड’ निरन्तर ‘वान टू वान’ छलफलमा छन्।
गत आइतबार अध्यक्षद्वयले आ-आफ्ना विश्वास पात्रलाई राखेर संवाद सुरु गरेका थिए। तर अन्य नेताको साथमा छलफल गर्दा विषयवस्तु बाहिरिने र गिजोलिने भन्दै सोमबारदेखि दुई अध्यक्ष मात्रै छलफलमा जुटेका छन्। तर सोमबारयताका तीन छलफलको भने ठोस उपलब्धि नदेखिएको प्रचण्डको सचिवालयले जनाएको छ।
छलफल के हुँदैछ?
आइतबारको संवादमा अध्यक्ष ओली र प्रचण्डबीच सुरुमा बाझाबाझसम्मको स्थिति उत्पन्न भएको प्रचण्ड निकट एक स्थायी कमिटी सदस्यले बताए। राष्ट्रपतिलाई महाभियोग लगाउन प्रचण्डले कानुनविद्सँग परामर्श गरेको भन्दै ओलीले आपत्ति जनाएका थिए।
‘संवादको सुरुमा प्रधानमन्त्री ओलीले तपाईंहरु मलाई पार्टी अध्यक्ष र प्रधानमन्त्रीबाट हटाउन भेला गर्दै हिँड्नु हुन्छ। राष्ट्रपतिलाई महाभियोग लगाउन कानुनविदसँग परामर्श गर्नुहुन्छ। तपाईंहरुले के-के योजना बनाउनुभयो। सबै सूचना राखेको छु भन्दै अध्यक्ष ओलीले आक्रोश पोख्नुभयो’, बैठकमा सहभागी एक नेताले भने, ‘प्रतिवादमा अध्यक्ष प्रचण्डले हुँदै नभएको किन आरोप लगाउनुहुन्छ। सरासर गलत हो, त्यसमा कुनै सत्यता छैन भन्दै प्रतिवाद गर्नुभयो।’
प्रधानमन्त्री ओलीले आफू र राष्ट्रपतिकाविरुद्ध के-के योजना बनाएको भन्ने विषयमा सबै प्रमाण देखाउन सक्ने भन्दै प्रचण्डलाई चुनौती दिए। बैठकमा तनावपूर्व वातावरण भएपछि उपस्थित स्थायी कमिटी सदस्यहरुले सहजीकरण गरेर वातावरणलाई केही सहज बनाएका थिए।
त्यसपछि भएको संवादपछि दुवै अध्यक्षबीच पार्टीमा विवाद सिर्जना गर्नेगरी शंकास्पद भेला छलफल नगर्ने समझदारी भएको थियो। संवादलाई निरन्तरता दिन प्रचण्डले नै महासचिव विष्णु पौडेल, प्रदेश ५ का मुख्यमन्त्री शंकर पोखरेल, स्थायी कमिटी सदस्य जनार्दन शर्मा र वर्षमान पुन सहित चार सदस्यीय अघोषित कार्यदल बनाउने प्रस्ताव अघि सारेपछि बैठक सकिएको थियो।
कार्यदलबाट वातावरण सकारात्मक हुनेभन्दा विषयवस्तु बाहिर छताछुल्ल हुने भन्दै सोमबारदेखि दुवै अध्यक्षको सहमतिमा ‘वान टू वान’ संवाद गर्ने सहमति गरेका थिए।
सोमबार, मंगलबार र बुधबार दुई अध्यक्षले बालुवाटार निन्तर २ देखि ३ घण्टा छलफल गर्दै आएका छन्।
‘अहिलेसम्मका तीन वटा ‘वान टू वान’ संवादमा दुवैका अडान यथावत छन्। प्रचण्ड कमरेडले प्रधानमन्त्री र पार्टी अध्यक्ष दुवैबाट राजीनामा दिने शर्तको अडान छोड्नुभएको छैन। प्रधानमन्त्रीले पनि कुनै हालतमा दुवै पदबाट राजीनामा नदिने अड्डी कस्नु भएको छ’, प्रचण्डको सचिवालय स्रोतले भन्यो, ‘दुवै अध्यक्ष संवाद हुन नसक्ने अवस्थाबाट संवाद हुने अवस्थामा आइपुग्नुभएको छ। त्यसलाई सकारात्मक रुपमा लिनुपर्छ। अहिले सरकार पार्टीका विभिन्न विषयमा छलफल जारी छ। देखिनेगरी कुनै उपलब्धि भएको छैन।’
पार्टीमा एकता कायम गर्न ओलीले प्रधानमन्त्री वा पार्टी अध्यक्षमध्ये एक पद छाडे सहमति हुन सक्ने अवस्थामा प्रचण्ड पुगेका छन्। तर ओलीले दुवै पद छोड्ने अवस्था नभएको बारम्बार दोहोर्याउने गरेका छन्। संवादमा जेठ २ वा मंसिर ४ को सहमतिलाई रिभ्यू गरेर अघि बढ्नुपर्ने प्रचण्डको भनाई छ।
दुई अध्यक्षवीचको संवाद सकारात्मक रुपमा अघि बढेकाले बिहीबार पनि संवाद हुने प्रधानमन्त्रीका प्रेस सल्लाहकार सूर्य थापाले बताए।
एक अर्कालाई गलाउने रणनीति
पार्टीमा विवाद बढ्दै गएपछि प्रधानमन्त्री ओलीले असार १८ मा मन्त्रिपरिषद् बैठक बोलाई संसदको चालु अधिवेशन अन्त्य गरिदिए। जसले गर्दा उनी इतरका नेताहरुमा पार्टी फुटाउने अध्यादेश आउँछ कि भन्ने भय छ।
यसबीचमा ओलीले प्रमुख प्रतिपक्ष दलका नेता शेरबहादुर देउवालाई बालुवाटारमा बोलाएरै छलफल समेत गरेका थिए। त्यति मात्रै होइन, ओलीले आफ्ना दूतको रुपमा सुवासचन्द्र नेम्वाङलाई सत्तासाझेदारीको प्रस्ताव लिएर देउवा निवास बुढानिलकण्ठ समेत पठाए। यसरी प्रमुख प्रतिपक्ष दलसँगको भेटघाटले ओली इतरका नेतालाई पार्टी फुट्ने भयले निक्कै सतायो।
यस्तै ओलीले राष्ट्रपतिसँगको भेटलाई पनि तीव्रता दिए। आफू निकट मन्त्री र स्थायी कमिटी सदस्यहरुसँग निरन्तर परामर्श गरे।
उता प्रचण्ड, झलनाथ खनाल र माधव नेपाल लगायत नेताहरुले पनि भेटघाटलाई बाक्लो बनाए।साथै, संवैधानिक जटिलताका विषयमा कानुनविद्सँग समेत परामर्श गरे।
यसरी असार १८ देखि एकले अर्कालाई गलाउने र थकाउने रणनीतिमा काम भइरहेको थियो। आइतबारदेखि मात्रै दुई अध्यक्ष संवादमा आएका थिए। दुवै अध्यक्ष ‘वान टू वान’ संवादमा बसे पनि दुवै पक्षले आ–आफ्नो अडान नछोडे पार्टी विभाजन कसैले रोक्न नसक्ने ओली निकट एक स्थायी कमिटी सदस्यले बताए। सहमति उल्लंघन गरेर प्रधानमन्त्रीलाई नै घेराबन्दीमा पारिएकाले समस्या बल्झिएको ती नेताको भनाई छ।
सडकमा ओली पक्षको प्रदर्शन
गत असार २० गते प्रधानमन्त्री ओलीले सबै मन्त्रीलाई बालुवाटार बोलाएर आफ्नो कित्ता क्लियर गर्न आग्रह गरे। आफूलाई प्रधानमन्त्री र पार्टी अध्यक्ष दुवैबाट हटाउने र राष्ट्रपतिलाई महाअभियोग लगाउने षडयन्त्र भइरहेको भन्दै ओलीले आपत्ति जनाए। पार्टीका नेताहरुले माग्दैमा पार्टी अध्यक्ष र प्रधानमन्त्री दुवै पद नछोड्ने अडान दोहोर्याए। प्रधानमन्त्रीको यस अभिव्यक्तिले पार्टी विभाजनको अवस्थामा पुग्ने विश्लेषण गर्न थालिको थियो। आइतबारको भेटघाटपछि मात्रै माहोल केही मत्थर भएको हो।
प्रधानमन्त्री बेलुका मन्त्रीलाई कित्ता क्लियर गर्न भने लगत्तै राति युवा संघ र विद्यार्थीका नेताहरुलाई बालुवाटारमै बोलाएर आफ्नो पक्षमा देशैभर प्रदर्शन गर्न आग्रह गरे। राष्ट्रिय एकता कायम गर्न अघि बढेको राष्ट्रवादी सरकारलाई हटाउन विभिन्न खेल भएको भन्दै आफ्नो बचाउमा सडकमा प्रदर्शन गर्न आग्रह गरे।
असार २१ गतेदेखि कोरोनाको जोमित बेवास्ता गर्दै प्रधानमन्त्रीको बचाउमा देशैभर प्रदर्शन भइरहेका छन्। प्रधानमन्त्री ओलीको पक्षमा कार्यकर्ता सडक प्रदर्शनमा उत्रिएपछि प्रचण्ड-नेपाल समूहका कार्यकर्ताहरु प्रतिवाद गर्दा कतिपय ठाउँमा झडप भइसकेका छन्।
कोरोना महामारीमा दैनिक जसो मृत्यु हुनेको समाचार सार्वजनिक भइरहेको अवस्थामा प्रधानमन्त्री स्वयंले भने आफ्नो पक्षमा दबाब बढाउन कार्यकर्तालाई सडकमा उतारेका छन्।
यसैबीच, आजको छलफलमा प्रचण्डले देशैभर भइरहेको प्रदर्शनलाई रोक्न आग्रह गरेका छन्। यस्ता प्रदर्शनले सहज संवादलाई अवरोध गराउने र कार्यकर्ताबीच दूरी बढाउने भन्दै उनले प्रदर्शन रोक्न भनेको उनी निकट एक नेताले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752222253.png)
-1752221006.png)
-1752221477.png)
-1752043710.jpg)
-1749826086.png)
