काठमाडौं–एक महिलामाथि नगर प्रहरी र प्रहरीले गरेको कुटपिट गरेको भिडियो भाइरल भएपछि भिडिओमा देखिएको घटना गत जेठ १ मा भएको प्रहरीले जनाएको छ। बुधबार भिडिओ सामाजिक सञ्जालमा भाइरल भएको थियो।
रुकुम पश्चिम आठबिसकोट नगरपालिका– ९ बगर पुलमा रहेको हेल्थ डेस्कमा खटिएकी स्वास्थ्यकर्मी डोल्मा मल्ललाई नेहा विष्टले अश्लिल गाली र हातपात गरेको प्रहरीले जनाएको छ। जाजरकोटबाट आएकी विष्टले अत्यधिक मादक पदार्थ सेवन गरेको समेत छानविनका क्रममा भेटिएको प्रहरीले जनाएको छ।
हेल्थ डेस्कको सुरक्षार्थ खटिएका प्रहरीले सम्झाई बुझाई गर्दा समेत नटेरी प्रहरी र स्थानीयलाई समेत विष्टले अपशब्द प्रयोग गरेको जनाइएको छ।
स्वास्थ्यकर्मी मल्लले सोही दिन प्रहरीलाई दिएको उजुरीको आधारमा नियन्त्रणमा लिएर एकदिनपछि छोडिएको जिल्ला प्रहरी कार्यालय,रुकुम पश्चिमका प्रहरी निरीक्षक कविराज रोकायले जानकारी गराएका छन्।
कुटपिटको विषयमा छानविन गर्न प्रहरीले तीन सदस्यीय समिति गठन गरेको जनाएको छ। प्रहरीले छानविनका लागि प्रहरी निरीक्षक कबिराज रोकायको संयोजकत्वमा तीन सदस्यीय छानविन समिति गठन गरी अनुसन्धान भइरहेको जनाएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।