८६००० देखि शून्यसम्म

क्रिकेट

ऋग्वेद शर्मा मंगलबार, असार २३, २०७७ १७:४५

काठमाडौं- कोरोना भाइरस (कोभिड १९) को प्रभावले क्रिकेटमा मार्च महिनाको सुरुदेखि नै असर गर्न थालिसकेको थियो। तैपनि विश्व हल्लाइदिने भूकम्पको जस्तो ठूलो प्रभावको आँकलन क्रिकेट जगतमा भइसकेको थिएन। तर त्यसको एक हप्तामै अवस्था सोचेभन्दा निकै नाजुक भयो।

गएको मार्च ५ मा एभरेस्ट प्रिमियर लिग (इपिएल) टी ट्वान्टी क्रिकेट स्थगित भएको नेपालमा पनि राष्ट्रिय टिमका अरु महत्वपूर्ण सिरिजहरु स्थगित भए। अन्तर्राष्ट्रिय क्रिकेट परिषद (आइसिसी) ले जुन ३० अघिका सबै प्रतियोगिता स्थगित भएको जनाएसँगै नेपालको महत्वपूर्ण दुई सिरिज अनिश्चितकालका लागि स्थगित भयो।

आइसिसी विश्वकप क्रिकेट लिग टू अन्तर्गत नेपालले नामिबियामा र पपुपा न्युगिनीमा खेल्ने सिरिज स्थगित भएको थियो। अप्रिल २० देखि २७ सम्म नामिबियामा र जुन ९ देखि १६ सम्म पपुवा न्युगिनीमा सिरिज हुने तय थियो।

अहिलेको अवस्थामा त फुटबल लगायत केही खेलहरु मैदानमा फर्किसक्दा पनि क्रिकेटका लागि अझै कठिन भइरहेको छ। केही खेलको तालिका तय भएर खेलाडीहरु अभ्यासमा छन्। बाँकी के कसरी फर्कनेछन् भन्ने यकिन छैन।

मानिसहरु सामान्य जीवनतर्फ फर्कने प्रयास गरिरहँदा आइसिसीले क्रिकेट सुरु गर्दा पालन गर्नुपर्ने केही नियमहरु बनायो। जेठ दोस्रो साता आइसिसीले बनाएका तीनै नियममा आधारित रहेर इंग्ल्याण्ड वेस्टइन्डिज पहिलो टेस्टको नजिक छन्।

जसमा खेलाडी र अफिसियललाई मैदान र मैदानबाहिर पनि शारीरिक दुरी बनाउन आग्रह गरिएको छ। यसअघि जस्तो खेलाडीले आफ्ना स्वेटर, क्याप टोपी, चस्मा जस्ता बस्तुहरु अम्पायरलाई बोक्न दिन पाउने छैनन्। खेलाडीले बल छोएपछि सेनिटाइजरले हात सफा गर्नुपर्नेछ। अम्पायरले हरसमय ग्लोब्स लगाएर नै बस्नुपर्नेछ।

खेलको दौरान मात्र होइन अभ्यासका बेलामा पनि यी नियमहरुको पालना गर्नुपर्नेछ। त्यसका साथै ‘सेलिब्रेसन’का समयमा पनि शारीरिक दुरी बनाउन भनिएको छ। खेलाडीहरुले पानीका बोतल, रुमाल या यस्ता अरु कुनै पनि बस्तु एकअर्काले मिलेर प्रयोग गर्न पाउने छैनन्।

विशेष गरी बलमार्फत नै भाइरसको संक्रमण हुन सक्ने हुँदा बल आफूसँग भएको समयमा पूरा सावधानी अपनाउन र बललाई अनावश्यक रुपमा ‘ह्यान्डल’ नगर्न समेत भनिएको छ। बल छोएको समयमा आँखा, मुख र नाकमा हात नलग्न भनिएको छ। बल छोएपछि सेनिटाइजर लगाउन अनिवार्य गरिएको छ।

मैदानमा हुने सबैको पहिले नै कोरोना भाइरसको परीक्षण गरिने बताइएको छ। यदि कसैमा खतरा देखिएमा आइसोलेसनमा बस्नुपर्ने बताइएको छ। खेलाडीसँगसँगै विशेष गरी अम्पायर र अन्य पदाधिकारीले पनि यी सबै नियमको पालना गर्नुपर्ने आइसिसीले जनाएको छ।

जतिसुकै स्वास्थ्य सुरक्षाका उपाय अपनाएर खेलाडीहरु मैदान फर्किने भए उनीहरुको हौसलाका लागि त्यहाँ प्रत्यक्ष दर्शक हुने छैनन्। यसैले खेल मैदानको फरक परिवेश कसरी देखिन्छ भन्ने यकिन छैन। यस्तैमा इएसपिएन क्रिकइन्फोका उपसम्पादक एन्ड्यू म्यागलासनले अवस्था कसरी फेरियो भन्नेबारेमा बताएका छन्।

मार्च ८
जतिबेला अन्तर्राष्ट्रिय क्रिकेटमा उत्कृष्ट मध्य एक बेलबोर्न क्रिकेट मैदानमा ८६ हजार भन्दा बढी दर्शक जम्मा भएका थिए। जहाँ एलैसा हिली र मेग ल्यानिङ जस्ता अस्ट्रेलियन महिला टिमका खेलाडीले महिला टी ट्वान्टी विश्वकप उपाधि उचालेका थिए। भारतलाई ८५ रनले हराएको त्यो खेलमा जति दर्शक साक्षी थिए त्यही अवस्था फर्कन अब लामो समय लाग्ने देखिन्छ। अमेरिकन गायिक क्याटी पेरीको प्रस्तुति समेत रहेको त्यो दिनपछि मानिसहरु त्यसरी नै रमाउन पाएका छैनन्।

मार्च ९
मेलबर्नको फेडेरेसन स्क्वायरमा विश्वकप जितको खुसी मनाउन हजारौँ समर्थक जम्मा भएका थिए। जहाँ खेलाडीहरु जितको खुसी, अन्तर्वार्ता र फोटोसेसनसँगै दक्षिण अफ्रिकामा खेल्न जानेबारेमा कुराकानी गरिरहेका थिए। विश्वकप आयोजनामा प्रत्यक्ष संलग्न भएकाहरु सफल आयोजनामा सुखको सास फेरेर रमाइरहेका थिए।

मार्च १०
क्रिकेट गतिविधि निरन्तर थियो। त्यसैले समर्थकहरु अस्ट्रेलिया र न्यूजिल्याण्डबीचको पुरुष एकदिवसीय सिरिजमा थिए। जहाँ अस्ट्रेलियाले भारत र दक्षिण अफ्रिका सिरिजमा भन्दा राम्रो गर्ने दबाब महसुस गरिरहेको थियो। कोरोना भाइरसको असर देखिन थालिसकेको त्यो समय खेलहरु पनि भइरहेका थिए।

मार्च १२
अस्ट्रेलिया र न्युजिल्याण्डबीचको पहिलो खेलको अघिल्लो दिन हो यो। त्यसबेला बिग्रिरहेको अवस्थाबारे मानिसहरुमा चिन्ता पनि देखिन थालेको थियो। महिला विश्वकप फाइनल धन्न सकियो भन्ने खुसीसँगै अब के हुने हो भन्ने दोधार पनि थियो। मेलबर्न मैदानमा आएका एक दर्शकमा पनि कोरोना संक्रमण देखियो भन्ने विषयले सबै चिन्तामा थिए।

त्यसबेला आरोन फिन्च र केन विलियमसन सम्मिलित पत्रकार सम्मेलन पनि बाहिर मैदानमा गरिएको थियो। उनीहरु दुवैले खेल गतिविधि कसरी प्रभावित हुनेछन् भन्नेबारे पनि बोलेका थिए। त्यतिबेलासम्म एनबिए, अस्ट्रेलियन ग्रान्डपिक्स जस्ता प्रतियोगिता रोकिइसकेका थिए। आइपिएल हुने नहुने दोधार थियो। ‘खाली मैदानमा खेल्नु भनेको अनोठौ हुनेछ’ फिन्चले भनेका थिए।

मार्च १३
क्रिकेट अस्ट्रेलियाले अस्ट्रेलिया र न्युजिल्याण्ड सिरिजका खेलहरु बन्द रंगशालामा हुने घोषणा गर्‍यो। महिला टिमको दक्षिण अफ्रिका भ्रमण रद्द गर्‍यो। र बाँकी परिस्थितिको आँकलन गरेर निर्णय हुँदै जाने बताइयो।

खेल हेर्न लामो दुरी तय गरेर आएकाहरु बाहिर रोकिएका थिए। उनीहरु निराश देखिन्थे। मैदान भित्रको अवस्था पनि भिन्न थियो। खेलाडीहरु दुरी बनाएर बसेका थिए। अन्य पदाधिकारी र अफिसियलसमेत एकअर्काबाट पर थिए। केन रिचार्डसनको स्वास्थ्यमा समस्या देखिएर कोरोना परीक्षण गरिएको खबरले त अझ सबैमा चिन्ता थपिसकेको थियो।

टस गर्ने बेलामा र त्यसपछि केन विलियमसन र फिन्चसँग हुने प्रश्नउत्तर पनि दुरी बनाएर लामो माइक राखेर गरिएको थियो। खेलाडीहरु दुरी बनाएर शान्त रुपमा मैदान प्रवेश गरेका थिए। खेल भइरहँदा पनि खाली मैदानले तर्साएको जस्तो अनुभव भइरहेको थियो। खेलाडीहरु विकेट लिएर हात मिलाउनुको साटो खुट्टा जुधाइरहेका थिए। छक्का भएको बल विज्ञापन राखिएका बोर्ड पछाडि जाँदा खेलाडीहरु आफै खोज्न गइरहेका थिए।

पहिलो खेलपछिको अभ्यास दुवै टिमले स्थगित गरेका थिए। पत्रकार सम्मेलन पनि सबै दुरी बनाएर नै गरिएको थियो। त्यतिबेला ती सबै विषयहरु नौला भइरहेका थिए। त्यहाँबाट फर्किनेहरु भारत र दक्षिण अफ्रिकाको खेल पनि बन्द रंगशालामा हुने र इंग्ल्याण्डको श्रीलंका भ्रमण रद्द भएको बारेमा कुराकानी गरिरहेका थिए।

मार्च १४
अवस्था सोचेभन्दा निकै नाजुक भइसकेको थियो। धेरै देशले लकडाउन गर्ने निर्णय गरिरहेका थिए। न्यूजिल्याण्डका प्रधानमन्त्री ज्याकिन्डाले पनि बाहिरबाट देश भित्रने सबैका लागि १४ दिनको सेल्फ आइसोलेसनमा बस्न अनिवार्य गरिएको बताएकी थिइन्। जसमा खेलका लागि आएका खेलाडीहरु पनि पर्थे। त्यसैले खेलाडीहरु फर्कने तयारीमा थिए।

मार्च १७
यतिञ्जेल तय भएका धेरै खेलहरु स्थगित हुने निर्णय आइसकेको थियो। धेरै देशमा घरेलु क्रिकेट पनि रोकिएका थिए। कतिसम्म भने अन्तिमतिर पुगिसकेको पाकिस्तान प्रिमियर लिग (पिएसएल) समेत रोकिएको थियो।

जुलाइ ७
लामो समय रोकिएको खेल गतिविधि मैदानमा फर्किएका छन्। इंग्ल्याण्ड र वेस्ट इन्डिज पहिलो टेस्ट खेल्ने तयारीमा लागिसकेका छन्। बुधबारदेखि पहिलो टेस्ट सुरु हुनेछ। सिरिजको दोस्रो टेस्ट जुलाइ १६ देखि २० सम्म हुनेछ। तेस्रो तथा अन्तिम टेस्ट जुलाइ २४ देखि २८ सम्म हुने तय छ। यही सिरिजले क्रिकेटका अरु गतिविधि कसरी हुन्छन् भन्नेमा सहयाग गर्ने भएकाले पनि विशेष रुपमा हेरिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।