काठमाडौं- राष्ट्रिय खेलकुद परिषद (राखेप) को कार्यवाहक सदस्य सचिवमा युवा तथा खेलकुद मन्त्रालयका खेलकुद महाशाखा प्रमुख भक्त बहादुर ढकाल नियुक्त भएका छन्।
‘अर्को व्यवस्था नभएसम्मका लागि खेलकुद महाशाखा प्रमुख सह सचिव भक्त बहादुर ढकाललाई सदस्य सचिवको काम गर्ने गरी जिम्मेवारी दिइएको हो। नयाँ नियुक्तिका लागि सिफारिस समिति गठन हुने कुरा भइरहेको छ, त्यसको काम अघि बढेको छैन’ मन्त्रालयका प्रवक्ता डा. मानबहादुर बिकेले बताएका छन्।
‘राष्ट्रिय खेलकुद विकास ऐन, २०७७’ लागु भएसँगै रिक्त रहेको पदमा मन्त्रालयले सोमबार ढकाललाई कार्यवाहकको जिम्मेवारी दिएको हो। नयाँ ऐन लागु भएसँगै राखेपमा सदस्य सचिवसहित परिषद बोर्ड खाली भएको थियो।
अहिलेको अवस्थामा नयाँ सदस्य सचिवको नियुक्ति नभएसम्मका लागि मन्त्रालयले संघीय निजामती सेवाको राजपत्रांकित प्रथम श्रेणीको कर्मचारी वा परिषदको वरिष्ठतम कर्मचारीलाई सदस्य सचिवको कामकाज गर्नेगरी तोक्न सक्ने विषय नयाँ ऐनमा नै उल्लेख छ।
अब सदस्य सचिवको नियुक्तिका लागि पहिले त खेलकुद मन्त्रालयको सचिवको संयोजकत्वमा सम्बन्धित क्षेत्रका एक जना महिलासहित दुई जना विज्ञ रहेको तीन सदस्यीय सिफारिस समिति गठन हुनुपर्नेछ।
सिफारिस समितिले स्नातक उत्तिर्ण भएको, खेलकुदको क्षेत्रमा कम्तिमा पाँच वर्ष काम गरेको, ३० वर्ष उमेर पूरा भएको योग्यता पुग्ने एक जना महिलासहित तीन जनाको नाम मन्त्रालयमा सिफारिस गर्नेछ। मन्त्रालयले मन्त्रीपरिषदमा पेश गरेको त्यही नामबाट एक सदस्य सचिव हुनेछन्। त्यसरी मन्त्रालयको सिफारिसमा मन्त्रीपरिषदबाट नियुक्त भएका सदस्य सचिवको कार्यकाल चार वर्षको रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
