काठमाडौं- नेपालमा भित्रिएका सलहका धेरैजसो झुण्डहरु बिहीबार दाङ तथा प्यूठानको सेरोफेरोमा रहेको प्लान्ट क्वारेन्टाइन तथा विषादी व्यवस्थापन केन्द्रले जनाएको छ। केन्द्रका अनुसार सलहका सबैभन्दा ठूला झुण्डहरुको समूह अहिले ती जिल्लामा रहेको देखिएको हो।
सलहले पारेको असर पनि ती दुई जिल्लामा बढी देखिएको छ। बिहीबार अर्घाखाँचीबाट पनि सलहको फौज प्यूठानतर्फ मोडिएकाले त्यस क्षेत्रमा बढी क्षति पुर्याउने अनुमान गरिएको छ। केन्द्रका अनुसार पानी परेको र बादल लागेको बेलामा सलहको स्थानान्तरण कम दूरीमा हुने हुँदा त्यस क्षेत्रको मौसम र हावाको बहावको आधारमा उनीहरुको फैलावट बढ्ने देखिन्छ।
हाल नेपालमा प्रवेश गरिसकेका अधिकांश झुण्डहरू सुदूरपश्चिम र कर्णाली प्रदेशमा दक्षिण पश्चिमबाट उत्तर पूर्वतर्फ र अन्य क्षेत्रमा दक्षिण पूर्वबाट उत्तर पश्चिमतर्फ हावाको बहावसँगै उडान गरिरहेका छन्।
त्यसैगरी, सलहका नयाँ झुण्डहरु भारतबाट नेपाल भित्रने क्रम पनि जारी रहेको केन्द्रले जनाएको छ। बिहीबार अर्थात् जुलाई २ को अपडेटअनुसार नेपालको सिमानाबाट सबैभन्दा नजिक रहेको सलहको झूण्ड बिहान ६ बजे भारतको उत्तर प्रदेशको इटावा क्षेत्रमा १०० हेक्टर र ५५ हेक्टर क्षेत्रफलमा २ वटा झुण्ड रहेको देखिएको थियो।
ती झुण्डहरू ३ दिनमा हावाको बहावको पूर्वानुमानअनुरुप फत्तेपुरसम्म आइपुग्ने अनुमान छ। झुण्डहरुको अवस्थितिको दैनिक अनुगमन भइरहेपनि मौसममा पूर्वानुमानको विपरीत कुनै परिवर्तन भएमा उक्त झुण्ड अन्यत्र मोडिई नेपालतर्फ समेत आउन सक्ने सम्भावना देखिएको केन्द्रले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
