काठमाडौं- नेपाल प्रहरीको २८ औं संगठन प्रमुखको प्रतिस्पर्धा शुरु भएसँगै आरोप प्रत्यारोप देखिएको छैन यसपाली। प्रहरी महानिरिक्षकका प्रतिस्पर्धी एआइजी शैलेश थापा क्षेत्री र हरि पाल एक अर्काको टिप्पणीमा मौन नै देखिन्छन्।
विगतमा प्रतिस्पर्धीबीच शत्रुतापूर्ण सम्बन्ध देखिन्थ्यो। यसपाली भने उनीहरु सार्वजनिक कार्यक्रममा समेत सँगै सहभागी हुने गरेका छन्। प्रहरी महानिरीक्षक (आइजी) ठाकुरप्रसाद ज्ञवालीले असार २४ मा अनिवार्य अवकाशमा पाउँदैछन्। ३० वर्षे सेवा हदका कारण उनको अवकाश हुन लागेको हो।
अहिले प्रहरीमा प्रशासनतर्फ तीन एआइजी छन्। उनीहरुमध्ये पहिलो नम्बरका एआइजी तारिणी लम्साल पनि आइजी ज्ञवालीकै ब्याची भएकाले उनीसँगै असार २४ गते अवकाश हुनेछ। जसकारण क्षेत्री र पालमात्रै आइजीका प्रतिस्पर्धी हुन्।
जानकार स्रोतका अनुसार यी दुवै प्रहरी प्रमुख बन्न आ-आफ्नै प्रकारले लबिङ् गर्ने तर सार्वजनिक रुपमा आलोचना नगर्न सहमति भएको थियो। सहमतिअनुसार दुवै सञ्चारमाध्यममा एक अर्काको आलोचनाबाट जोगिँदै आएका छन्। तर आफै बन्न शक्तिकेन्द्र धाउने क्रम भने जारी छ। यी दुईमध्ये जो आइजी भए पनि २०७९ वैशाख १८ गतेसम्म नेतृत्व सम्हाल्नेछन्।
बल्ल एआइजीबाट आइजिपी
अहिलेका आइजी ज्ञवाली तथा उनीभन्दा अघिल्ला आइजी सर्वेन्द्र खनाल, प्रकाश अर्याल एआइजी नभएकाले डिआइजीबाटै सिधै आइजी भएका थिए। प्रहरी नियमावली २०७१ अनुसार आइजीको नियुक्ति गर्दा ज्येष्ठता, कार्यदक्षता र कार्यसम्पादन मूल्यांकनलाई आधार मान्नुपर्छ। प्रहरी ऐन २०१२ र प्रहरी नियमावली २०७१ मा प्रहरी महानिरीक्षकमा बढुवा गर्दा अतिरिक्त महानिरीक्षक एआइजीमध्येबाट गर्नुपर्ने उल्लेख छ। तर, एआइजी नभएको अवस्थामा सरकारले डिआइजीमध्येबाटै आइजिपी नियुक्ति गर्न सक्ने व्यवस्था छ।
एकै ब्याची,फरक स्वभाव
क्षेत्री र पाल सँगै २०४९ वैशाख १९ गते प्रहरी निरीक्षकबाट संगठनमा प्रवेश गरेका थिए। उनीहरु ब्याची हुन्। तर यी दुवैको स्वभाव भने फरक छ। नीति निर्माण तहमा क्षेत्री अब्बल मानिन्छन् भने कमाण्ड कन्ट्रोलमा पाल निपुण मानिन्छन्। क्षेत्री अहिले मानव स्रोत एवं प्रशासन विभागमा प्रमुख छन् भने पाल अपराध अनुसन्धान विभागको जिम्मेवारीमा छन्। यसभन्दा अघि डिआइजी हुँदा क्षेत्रीले महानगरीय प्रहरी कार्यालय रानिपोखरी (मेट्रो) तथा केन्द्रीय प्रवक्ताको जिम्मेवारी सम्हालेका थिए।
त्यस्तै एसपी हुँदा कास्की, झापाको कमाण्ड सम्हालेका क्षेत्रीले डिएसपी हुँदा धादिङ प्रहरी प्रमुखको जिम्मेवारी निभाएका थिए। इन्सपेक्टर हुँदा सल्यान, सिन्धुपाल्चोकमा समेत क्षेत्रीले काम गरिसकेका छन्।
क्षेत्रीले लामो समय राष्ट्रिय प्रहरी प्रशिक्षण प्रतिष्ठान महाराजगञ्ज र प्रहरी महानिरीक्षकको सचिवालयमा बसेर समेत काम गरेका छन्। उनी इन्स्पेक्टरदेखि एआइजी बढुवा हुँदासम्म पहिलो नम्बरमा बढुवा हुँदै आएका छन्।
पालले डिआइजी हुँदा प्रदेश २ र विशेष ब्यूरोमा रहेर काम गरिसकेका छन्। त्यस्तै एसएसपी हुँदा संघीय प्रहरी इकाइ कोसी जिम्मेवारी सम्हालेका पालले एसपी हुँदा महानगरीय अपराध महाशाखा, जिल्ला प्रहरी कार्यालय कास्की, धनुषा र रुपन्देहीको प्रहरी प्रमुख भएर काम गरेका थिए।
डिएसपी हुँदा डडेल्धुरा, नुवाकोट प्रहरी प्रमुख भइएर पालले काम गरेका थिए। इन्स्पेक्टर हुँदा वडा प्रहरी कार्यालय धनगढी र बौद्धको नेतृत्व सम्हालेको अनुभव पालसँग छ।
एआइजी को?
अर्का एआइजी लम्साल पनि हालका आइजीसँगै अवकाशमा गएपछि र क्षेत्री र पालमध्ये एक जना आइजी भएपछि एआइजीका दुई पद रिक्त हुन्छ। रिक्त दुई पदमा बढुवा हुन डिआइजी प्रद्युम्न कार्की, निरज शाही र विश्वराज पोखरेलबीच प्रतिस्पर्धा हुनेछ।
कार्की र शाही अहिलेका एआइजी क्षेत्री र पालकै ब्याची हुन् भने पोखरेल उक्त ब्याचको वैकल्पिक रुपमा सेवा प्रवेश गरेका थिए। यी तीन प्रतिस्पर्धीमध्ये पोखरेल एआइजीमा बढुवा भएमा भावी आइजीका रुपमा प्रष्ट देखिन्छ। कार्की र शाही दुवै एआइजीमा बढुवा भए पनि उनीहरु एआइजीबाटै घर जानेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773582775.jpg)
-1764146706.png)
