काठमाडौं- शनिबार नेपाल प्रवेश गरेका सलह किरा स-सानो झुण्डमा मात्रै रहेको कृषि तथा पशुपन्छी विकास मन्त्रालयले जनाएको छ।
मन्त्रालयले एक विज्ञप्ति जारी गर्दै ‘नेपालमा मनसुन शुरू भइसकेको सन्दर्भमा यस कीराको प्रवेश हुने संभावना न्यून रहेको आँकलन हुँदै गर्दा मौसममा खासगरी हावाको दिशा र गतिमा अचानक आएको परिवर्तनले सलह किरा साना साना झुण्डहरूमा छरिएर आएको हुनसक्ने प्रारम्भिक अनुमान गरिएको’ जनाएको छ।
मन्त्रालयले शनिबार नै विश्व खाद्य तथा कृषि संगठन (एफएओ) का विज्ञहरूसँग परामर्श गरी सलहका सम्बन्धमा प्राविधिक जानकारीहरू तयार गरी विभिन्न संचार माध्यमबाट प्रकाशन तथा प्रचार प्रसार गरिएको जनाएको छ। जल तथा मौसम विज्ञान विभागसँग समन्वय गरी यस कीराको संभावित प्रवेशको सम्बन्धमा अनुगमन गरिराखेको पनि मन्त्रालयले विज्ञप्तीमा उल्लेख गरेको छ।
सलह किराले बारा, पर्सा, सिन्धुली, सर्लाही, रूपन्देहीलगायतका जिल्लामा देखिएको पनि मन्त्रालयले जनाएको छ। यो कीरा लामो समयदेखि भारतका बिभिन्न स्थानमा देखिएको सन्दर्भमा नेपालमा पनि यसको संभावित प्रवेशलाई दृष्टिगत गरी सोको अध्ययन गरी आवश्यक तयारीका कार्य गर्न मन्त्रालयले मिति २०७७ जेठ १३ गते प्राविधिक कार्यदल गठन गरेको थियो।
उक्त कार्यदलले अध्ययन गरी आवश्यक कार्ययोजनासहित एक प्रतिवेदन तयार पारेको र उक्त प्रतिवेदन सबै सम्बद्ध निकायसहित प्रदेश भूमी व्यवस्था, कृषि तथा सहकारी मन्त्रालयलाई उपलब्ध गराइएको पनि मन्त्रालयले जनाएको छ।
साथै यस सम्बन्धमा संघ, प्रदेश र स्थानीय तहवीच पर्याप्त सम्वाद र सहकार्यमा काम भइरहेको र सलहको संख्या, अवस्था, फैलावट, क्षतिको आँकलन लगायतका विषयमा जानकारी लिन संघीय निकायहरू र प्रदेश अन्तर्गतका प्राविधिकहरू परिचालित भइसकेको मन्त्रालयले जनाएको छ।
‘संघमा रहेको प्राविधिक कार्यदल र सम्बन्धित निकायहरू सक्रिय भइसकेका छन्। प्राविधिकहरूको सम्पर्क र समन्वयमा रही यस किराको व्यवस्थापनमा सक्रिय रहन तीनै तहका सरकारका सम्बन्धित निकायहरूलाईआग्रह गर्दछौं’ विज्ञप्तीमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
